തെഹ്റാന്/വാഷിംഗ്ടണ്: അമേരിക്കയും ഇറാനും തമ്മിൽ മാസങ്ങളായി നിലനിൽക്കുന്ന കടുത്ത നയതന്ത്ര-സൈനിക സംഘർഷങ്ങൾക്ക് അയവുവരുത്തിക്കൊണ്ട് ഇരുരാജ്യങ്ങളും ഒരു പ്രാഥമിക കരാറിലേക്ക് അടുക്കുന്നതായി റിപ്പോർട്ടുകൾ. ദിവസങ്ങൾക്കുള്ളിൽ ഒപ്പുവെച്ചേക്കാവുന്ന ഈ കരാറിന്റെ കരട് രൂപത്തിൽ ഇരുപക്ഷവും ധാരണയിലെത്തിയതായി അന്താരാഷ്ട്ര വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്തു. തന്ത്രപ്രധാനമായ ഹോർമുസ് കടലിടുക്ക് വീണ്ടും തുറക്കാനും ടെഹ്റാന് മേലുള്ള സാമ്പത്തിക സമ്മർദ്ദം കുറയ്ക്കാനും വ്യവസ്ഥ ചെയ്യുന്നതാണ് പുതിയ ധാരണകൾ. എന്നാൽ മുൻ യുഎസ് പ്രസിഡന്റ് ഡൊണാൾഡ് ട്രംപ് വലിയ തർക്കവിഷയമാക്കിയ ഇറാന്റെ ആണവ പദ്ധതികൾ പോലുള്ള സങ്കീർണ്ണമായ കാര്യങ്ങൾ ഉടൻ പരിഗണിക്കില്ലെന്നും, അവ വരാനിരിക്കുന്ന തുടർചർച്ചകളിലേക്ക് മാറ്റിവെച്ചതായും വിവരങ്ങൾ വ്യക്തമാക്കുന്നു.
നിലവിലെ കരട് കരാർ ഏറെക്കുറെ ഇറാന്റെ നിബന്ധനകളെയാണ് പ്രതിഫലിപ്പിക്കുന്നത് എന്ന് പാകിസ്താനി, വെസ്റ്റേൺ വൃത്തങ്ങൾ സൂചിപ്പിക്കുന്നു. ഈ താൽക്കാലിക കരാർ ടെഹ്റാന്റെ തന്ത്രപരമായ വിജയമാണെന്ന് വിശേഷിപ്പിച്ച ഇറാൻ വിദേശകാര്യ മന്ത്രി അബ്ബാസ് അരാഗ്ചി, അമേരിക്കയുമായുള്ള യുദ്ധത്തിൽ ഇറാനാണ് വിജയിച്ചതെന്ന് പ്രഖ്യാപിച്ചു. പുതിയ കരാർ പ്രകാരം ഇറാന്റെ മരവിപ്പിച്ചു നിർത്തിയിരിക്കുന്ന ആസ്തികൾ ഘട്ടങ്ങളായി വിട്ടുനൽകുകയും എണ്ണ കയറ്റുമതിയെ ലക്ഷ്യമിട്ടുള്ള ചില യുഎസ് ഉപരോധങ്ങളിൽ ഇളവ് അനുവദിക്കുകയും ചെയ്യും. ഇതിന് പകരമായി, ആഗോള എണ്ണ-വാതക വിതരണത്തിന്റെ അഞ്ചിലൊന്നും കടന്നുപോകുന്നതും യുഎസ്-ഇസ്രായേൽ വ്യോമാക്രമണങ്ങളെ തുടർന്ന് ഇറാൻ അടച്ചിട്ടതുമായ ഹോർമുസ് കടലിടുക്ക് വീണ്ടും തുറന്നുകൊടുക്കും. ഒമാനോടൊപ്പം ചേർന്ന് ഇറാൻ ഈ ജലപാതയുടെ സമുദ്ര ഗതാഗതത്തിന് മേൽനോട്ടം വഹിക്കുമെന്നും അരാഗ്ചി കൂട്ടിച്ചേർത്തു.
ഏറ്റവും നിർണ്ണായകമായ ആണവ പദ്ധതികളെക്കുറിച്ച് 60 ദിവസത്തെ പ്രത്യേക ചർച്ചകൾ നടത്താനാണ് കരാറിൽ വിഭാവനം ചെയ്തിരിക്കുന്നത്. ഇറാന്റെ ആണവ പദ്ധതി പൂർണ്ണമായും ഇല്ലാതാക്കുക, യുറേനിയം സമ്പുഷ്ടീകരണ ശേഖരം നശിപ്പിക്കുക, ദീർഘകാല പരിശോധന സംവിധാനം നടപ്പിലാക്കുക എന്നിവയാണ് അമേരിക്കയുടെ ലക്ഷ്യം. എന്നാൽ ഇതിനോട് കടുത്ത എതിർപ്പ് പ്രകടിപ്പിക്കുന്ന ഇറാൻ, തങ്ങളുടെ ആണവ പദ്ധതി സിവിലിയൻ ആവശ്യങ്ങൾക്കുള്ളതാണെന്നും സമ്പുഷ്ടീകരിച്ച യുറേനിയത്തിന്റെ തീവ്രത കുറയ്ക്കുക (Dilute) എന്നതൊഴിച്ചാൽ മറ്റ് പരിഹാരമാർഗ്ഗങ്ങൾ സ്വീകരിക്കില്ലെന്നും വ്യക്തമാക്കിയിട്ടുണ്ട്. അതേസമയം, വ്യവസ്ഥകൾ പൂർണ്ണമായി നടപ്പിലാക്കാതെ പണമൊന്നും വിട്ടുനൽകില്ലെന്നും ഭീകര സംഘടനകൾക്ക് ഇറാൻ ഫണ്ടിംഗ് നൽകരുതെന്നും പേര് വെളിപ്പെടുത്താത്ത യുഎസ് ഉദ്യോഗസ്ഥൻ മുന്നറിയിപ്പ് നൽകി. ഇത് പൂർണ്ണമായും ഒരു പെർഫോമൻസ് അധിഷ്ഠിത കരാറാണെന്നാണ് യുഎസ് വാദം.
അമേരിക്കയുമായി ചേർന്ന് പോരാടിയ ഇസ്രായേൽ ഈ ചർച്ചകളുടെ ഭാഗമല്ലാത്തതിനാൽ നിർദ്ദിഷ്ട കരാറിനെ ആശങ്കയോടെയാണ് അവർ വീക്ഷിക്കുന്നത്. തങ്ങളുടെ സർക്കാർ ഈ കരാറിലെ വ്യവസ്ഥകൾ പാലിക്കാൻ ബാധ്യസ്ഥരല്ലെന്നും സ്വതന്ത്രമായി പ്രവർത്തിക്കാനുള്ള അവകാശം നിലനിർത്തുമെന്നും ഇസ്രായേൽ പ്രധാനമന്ത്രി ബെന്യാമിൻ നെതന്യാഹു വ്യക്തമാക്കി കഴിഞ്ഞു. എന്നിരുന്നാലും, സമാധാന ചർച്ചകളിലെ പുരോഗതി ആഗോള സാമ്പത്തിക വിപണിയിൽ വലിയ ആശ്വാസമുണ്ടാക്കി. ഹോർമുസ് കടലിടുക്ക് തുറക്കുന്നത് ഊർജ്ജ വിതരണ ആശങ്കകൾ കുറച്ചതോടെ ആഗോള ഓഹരി വിപണികൾ നേട്ടമുണ്ടാക്കുകയും എണ്ണവിലയിൽ വലിയ ഇടിവ് രേഖപ്പെടുത്തുകയും ചെയ്തു. ഈ കരാർ അന്തിമമാവുകയാണെങ്കിൽ 2015-ലെ ആണവ കരാർ റദ്ദാക്കിയതിന് ശേഷം വാഷിംഗ്ടണും ടെഹ്റാനും തമ്മിൽ നടക്കുന്ന ഏറ്റവും വലിയ നയതന്ത്ര ഇടപെടലായി ഇത് മാറും.
US-Iran War Takes Key Turn; Hormuz Strait Deal Reached
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
