മോൺട്രിയൽ: മോൺട്രിയലിൽ കനാലിൽ മുങ്ങിമരിച്ച രണ്ട് പഞ്ചാബ് സ്വദേശികളായ യുവാക്കളുടെ മരണം കാനഡയിലെ ഇന്ത്യക്കാർക്ക് വലിയ വേദനയായി. വാരാന്ത്യത്തിൽ മോൺട്രിയലിലെ റെനെ-ലെവെസ്ക് പാർക്കിന് സമീപമുള്ള ലഷീൻ കനാലിലാണ് സംഭവം നടന്നത്. അർദ്ധരാത്രിയോടെ വിവരം ലഭിച്ചതിനെത്തുടർന്ന് മോൺട്രിയൽ അഗ്നിശമന സേനയുടെയും കാനഡ കോസ്റ്റ് ഗാർഡിന്റെയും നേതൃത്വത്തിൽ 20-30 ഓളം ഉദ്യോഗസ്ഥർ മണിക്കൂറുകളോളം നടത്തിയ തെരച്ചിലിനൊടുവിൽ സോണാർ സാങ്കേതികവിദ്യ ഉപയോഗിച്ചാണ് യുവാക്കളെ കണ്ടെത്തിയത്. ഉടൻ തന്നെ ആശുപത്രിയിൽ എത്തിച്ചെങ്കിലും ഇരുവരുടെയും ജീവൻ രക്ഷിക്കാനായില്ല.
പഞ്ചാബിലെ ബർണാല ജില്ലയിലെ തപ മണ്ഡി സ്വദേശിയായ 26 കാരൻ ലവ്പ്രീത് സിംഗ് ആണ് മരിച്ചവരിൽ ഒരാൾ. രണ്ടര വർഷം മുമ്പ് വർക്ക് പെർമിറ്റിൽ കാനഡയിലെത്തിയ ഇദ്ദേഹം ട്രെയിലർ ട്രക്ക് ഡ്രൈവറായി ജോലി ചെയ്യുകയായിരുന്നു. മരിച്ച രണ്ടാമത്തെ യുവാവ് അമൃത്സർ ജില്ലയിലെ ബുതാല ഗ്രാമത്തിൽ നിന്നുള്ളയാളാണെന്നാണ് കരുതപ്പെടുന്നത്. ഇരുവരുടെയും മരണം ക്യുബെക്ക് കൊറോണറുടെ ഓഫീസ് സ്ഥിരീകരിച്ചിട്ടുണ്ട്.
അപകടത്തിലേക്ക് നയിച്ച സാഹചര്യങ്ങൾ വ്യക്തമല്ലെങ്കിലും ക്യുബെക്ക് കൊറോണറുടെ ഓഫീസ് സംഭവത്തിൽ അന്വേഷണം ആരംഭിച്ചിട്ടുണ്ട്. സമാനമായ സംഭവങ്ങൾ ആവർത്തിക്കാതിരിക്കാൻ ഭാവിയിൽ ആവശ്യമായ മുൻകരുതൽ നടപടികൾ സ്വീകരിക്കുമെന്ന് അധികൃതർ വ്യക്തമാക്കിയിട്ടുണ്ട്. ഈ വർഷം ക്യുബെക്കിൽ മാത്രം റിപ്പോർട്ട് ചെയ്യപ്പെടുന്ന 24-ാമത്തെയും 25-ാമത്തെയും മുങ്ങിമരണങ്ങളാണിത്. മൃതദേഹങ്ങൾ നാട്ടിലെത്തിക്കുന്നതിനായി ഇന്ത്യൻ സർക്കാരിന്റെ അടിയന്തര സഹായം തേടി കുടുംബാംഗങ്ങൾ അപേക്ഷ നൽകിയിട്ടുണ്ട്.
Two youngsters from Punjab succumb to injuries after drowning in Lachine Canal in Canada
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
