സെന്റ് ജോൺസ്: മുൻ ജീവിതപങ്കാളിയെ ഗുരുതരമായി ഉപദ്രവിക്കാൻ സാധ്യതയുണ്ടെന്ന കണ്ടെത്തലിനെ തുടർന്ന് യുവാവിന് ന്യൂഫൗണ്ട്ലാൻഡിലുള്ള രണ്ട് നഗരങ്ങളിൽ പ്രവേശിക്കുന്നതിന് കോടതി വിലക്കേർപ്പെടുത്തി. തുടർച്ചയായി നിയമങ്ങൾ ലംഘിച്ച് യുവതിയെയും കുടുംബത്തെയും ഭീഷണിപ്പെടുത്തിയ ‘ഡി.എം’ എന്ന് അറിയപ്പെടുന്ന പ്രതിക്കെതിരെയാണ് ജഡ്ജി വെയ്ൻ ഗോർമാൻ ഈ അപൂർവ ഉത്തരവ് പുറപ്പെടുവിച്ചത്. മുൻ പങ്കാളിയെ നിരന്തരം പിന്തുടർന്ന് ശല്യം ചെയ്തതിനും കോടതി ഉത്തരവുകൾ ലംഘിച്ചതിനും ഇയാൾക്ക് 12 മാസം തടവും മൂന്ന് വർഷത്തെ നിരീക്ഷണ കാലാവധിയും (പ്രൊബേഷൻ) കോടതി വിധിച്ചിട്ടുണ്ട്.
യുവതിക്ക് നേരെ പ്രതി മുൻപും ക്രൂരമായ ആക്രമണം നടത്തിയിട്ടുള്ളതായി കോടതി രേഖകൾ വ്യക്തമാക്കുന്നു. മുൻപ് ഒൻപത് മാസം തടവുശിക്ഷ അനുഭവിച്ചിട്ടുള്ള ഇയാൾ, ജാമ്യത്തിലിറങ്ങിയ ശേഷവും യുവതിയുടെ വീടിന് സമീപം നിരന്തരം എത്തുകയും ഭീഷണിപ്പെടുത്തുകയും ചെയ്തു. വെറും 15 ദിവസത്തിനിടെ 15 തവണയാണ് ഇയാൾ യുവതിയുടെ വീടിന് മുന്നിൽ വാഹനവുമായി എത്തിയത്. ഇയാളുടെ ശല്യം കാരണം തങ്ങളും മക്കളും സ്വന്തം വീട്ടിൽ പോലും കടുത്ത ഭയത്തിലാണ് കഴിയുന്നതെന്ന് ഇരയായ യുവതിയുടെ മകൾ കോടതിയെ അറിയിച്ചിരുന്നു. പ്രതിയിൽ നിന്നും കുടുംബത്തിന് ആവശ്യമായ സുരക്ഷ ഉറപ്പാക്കാൻ മറ്റ് വഴികളില്ലാത്തതിനാലാണ് ഇത്തരമൊരു കടുത്ത നടപടിയെന്ന് ജഡ്ജി വിധിന്യായത്തിൽ വ്യക്തമാക്കി.
പ്രതിക്ക് കനത്ത ശിക്ഷ നൽകിയ കോടതി, അടുത്ത മൂന്ന് വർഷത്തേക്ക് പ്രൊബേഷൻ ഓഫീസറുടെ പ്രത്യേക അനുമതിയില്ലാതെ ഈ നഗരങ്ങളിൽ പ്രവേശിക്കരുതെന്ന് കർശനമായി നിർദേശിച്ചു. കൂടാതെ യുവതിയോ മക്കളോ താമസിക്കുന്ന സ്ഥലങ്ങളിൽ പോകുന്നതിനും അവരുമായി ഏതെങ്കിലും രീതിയിൽ ബന്ധപ്പെടുന്നതിനും പൂർണ്ണ വിലക്കുണ്ട്. അടുത്ത 25 വർഷത്തേക്ക് ഇയാൾക്ക് ആയുധങ്ങൾ കൈവശം വെക്കാൻ അനുവാദമുണ്ടാകില്ലെന്നും കോടതി ഉത്തരവിട്ടിട്ടുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Court bans man from entering two Newfoundland cities for threatening violence against ex-partner
