അമേരിക്കൻ പാസ്‌പോർട്ടിൽ ട്രംപിന്റെ ചിത്രം; പുതിയ ഡിസൈൻ പുറത്തുവിട്ട് യുഎസ് പ്രസിഡന്റ്

വാഷിംങ്ടൺ; അമേരിക്കയുടെ ഇരുനൂറ്റി അമ്പതാം (250) സ്വാതന്ത്ര്യ വാർഷികത്തോടനുബന്ധിച്ച് പുറത്തിറക്കുന്ന പ്രത്യേക പരിമിതകാല (ലിമിറ്റഡ് എഡിഷൻ) പാസ്‌പോർട്ടിന്റെ പുതിയ ഡിസൈൻ യുഎസ് പ്രസിഡന്റ് ഡൊണാൾഡ് ട്രംപ് പുറത്തുവിട്ടു. ട്രംപിന്റെ ഔദ്യോഗിക ചിത്രവും ഒപ്പും ഉൾപ്പെടുത്തിയുള്ളതാണ് ഈ പുതിയ ഡിസൈൻ. തന്റെ ഉടമസ്ഥതയിലുള്ള സോഷ്യൽ മീഡിയ പ്ലാറ്റ്‌ഫോമായ ‘ട്രൂത്ത് സോഷ്യൽ’ (Truth Social) വഴിയാണ് ട്രംപ് പുതിയ പാസ്‌പോർട്ട് പേജിന്റെ മാതൃക പങ്കുവെച്ചത്. ഒപ്പം “അമേരിക്കയുടെ പുതിയ പാസ്‌പോർട്ട്; സ്വാഗതം, പക്ഷേ നന്നായി പെരുമാറുക!” എന്നൊരു കുറിപ്പും അദ്ദേഹം പങ്കുവെച്ചിട്ടുണ്ട്.

വൈറ്റ് ഹൗസിലെ പ്രസിഡന്റിന്റെ ഔദ്യോഗിക മേശയായ ‘റെസല്യൂട്ട് ഡെസ്കിന്’ (Resolute Desk) സമീപം നിൽക്കുന്ന ട്രംപിന്റെ ചിത്രമാണ് പാസ്‌പോർട്ട് പേജിലുള്ളത്. ഇതിന്റെ പശ്ചാത്തലത്തിൽ അമേരിക്കൻ സ്വാതന്ത്ര്യ പ്രഖ്യാപനത്തിന്റെ (Declaration of Independence) യഥാർത്ഥ രേഖയും താഴെ ട്രംപിന്റെ ഒപ്പും കാണാം. ഇതിന് എതിർവശത്തുള്ള പേജിൽ പ്രശസ്ത ചിത്രകാരൻ ജോൺ ട്രംബുൾ വരച്ച സ്വാതന്ത്ര്യ പ്രഖ്യാപനത്തിന്റെ ചിത്രവും ഉൾപ്പെടുത്തിയിട്ടുണ്ട്. വാഷിംഗ്ടണിലെ സ്മിത്സോണിയൻ നാഷണൽ പോർട്രെയ്റ്റ് ഗാലറിയിലുള്ള ട്രംപിന്റെ ഔദ്യോഗിക ചിത്രത്തെ ആസ്പദമാക്കിയാണ് ഇത് തയ്യാറാക്കിയിരിക്കുന്നത്.

ഈ വർഷം ഏപ്രിലിലാണ് അമേരിക്കയുടെ 250-ാം വാർഷികാഘോഷങ്ങളുടെ ഭാഗമായി സവിശേഷമായ പാസ്‌പോർട്ട് പുറത്തിറക്കുമെന്ന പ്രഖ്യാപനം ഉണ്ടാകുന്നത്. പ്രത്യേക കലാവിരുതുകളും സുരക്ഷാ സംവിധാനങ്ങളും ഉൾപ്പെടുത്തിയായിരിക്കും ഇതെന്നായിരുന്നു യുഎസ് സ്റ്റേറ്റ് ഡിപ്പാർട്ട്മെന്റ് അന്ന് അറിയിച്ചിരുന്നത്. എന്നാൽ, ഈ വർഷം ആദ്യം സ്റ്റേറ്റ് ഡിപ്പാർട്ട്മെന്റ് പുറത്തുവിട്ട മാതൃകകളിൽ നിന്നും തികച്ചും വ്യത്യസ്തമായ ചിത്രമാണ് ട്രംപ് ഇപ്പോൾ പങ്കുവെച്ചിരിക്കുന്നത്. അതുകൊണ്ടുതന്നെ, ട്രംപ് ഇപ്പോൾ പുറത്തുവിട്ടത് ഔദ്യോഗികമായി അംഗീകരിച്ച ഡിസൈൻ തന്നെയാണോ അതോ അദ്ദേഹത്തിന് ഇഷ്ടപ്പെട്ട ഒരു മാതൃക പങ്കുവെച്ചതാണോ എന്നതിൽ നിലവിൽ വ്യക്തതയില്ല. ഇത് സംബന്ധിച്ച മാധ്യമങ്ങളുടെ ചോദ്യങ്ങൾക്ക് വ്യക്തമായ മറുപടി നൽകാതിരുന്ന വൈറ്റ് ഹൗസ്, വിവരങ്ങൾക്കായി സ്റ്റേറ്റ് ഡിപ്പാർട്ട്മെന്റിനെ സമീപിക്കാൻ നിർദ്ദേശിക്കുകയായിരുന്നു.

നിലവിലുള്ള യുഎസ് പാസ്‌പോർട്ടിന്റെ ഉൾപ്പേജിൽ അമേരിക്കൻ ദേശീയഗാനത്തിന് പ്രചോദനമായ ഫോർട്ട് മക്ഹെൻറി യുദ്ധത്തിന്റെ ചിത്രവും ദേശീയഗാനത്തിന്റെ വരികളുമാണ് ഉള്ളത്. ഇതിന് പകരമായാണ് പുതിയ പരിമിതകാല പാസ്‌പോർട്ട് വരുന്നത്. വാഷിംഗ്ടൺ പാസ്‌പോർട്ട് ഏജൻസി വഴി നേരിട്ടെത്തി പാസ്‌പോർട്ട് പുതുക്കുന്നവർക്ക് മാത്രമായിരിക്കും ആദ്യഘട്ടത്തിൽ ഈ പ്രത്യേക പാസ്‌പോർട്ട് ലഭിക്കുകയെന്ന് അധികൃതർ നേരത്തെ വ്യക്തമാക്കിയിരുന്നു. അതേസമയം, ഓൺലൈൻ വഴിയോ മറ്റ് കേന്ദ്രങ്ങൾ വഴിയോ അപേക്ഷിക്കുന്നവർക്ക് നിലവിലുള്ള സാധാരണ പാസ്‌പോർട്ട് ഡിസൈൻ തന്നെയായിരിക്കും ലഭിക്കുക.

Trump's picture on American passport; US President releases new design

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt