ഓട്ടവ : കാനഡയുമായുള്ള വ്യാപാര യുദ്ധം മുറുകുന്നതിനിടയിൽ, ഒന്റാരിയോ തടാകത്തിന്റെ പേര് ‘ലേക്ക് അമേരിക്ക’ എന്ന് മാറ്റിക്കൊണ്ട് യു.എസ് പ്രസിഡന്റ് ഡൊണാൾഡ് ട്രംപ് ഉത്തരവിട്ടു. ഇതിനായി ഇന്റീരിയർ സെക്രട്ടറിയോട് ട്രംപ് ഔദ്യോഗിക ഉത്തരവിൽ ആവശ്യപ്പെടുകയായിരുന്നു. കാനഡ തങ്ങളോട് മോശമായി പെരുമാറിയെന്നും തങ്ങളെ ചൂഷണം ചെയ്യുകയാണെന്നും ആരോപിച്ചാണ് ട്രംപിന്റെ ഈ പുതിയ നടപടി.
വ്യാപാര കരാർ ചർച്ചകൾ പരാജയപ്പെട്ടതിനെ തുടർന്ന് ഇരു രാജ്യങ്ങളും തമ്മിലുള്ള ബന്ധം വഷളായിരിക്കുകയാണ്. കനേഡിയൻ പ്രധാനമന്ത്രി മാർക്ക് കാർണി പ്രഖ്യാപിച്ച പ്രത്യാക്രമണ നടപടികൾ സെപ്റ്റംബർ 8-ന് നിലവിൽ വരാനിരിക്കെയാണ് ട്രംപിന്റെ ഈ നീക്കം. ഒന്റാരിയോ പ്രീമിയർ ഡഗ് ഫോർഡുമായുള്ള വാക്പോരിനിടെയാണ് തടാകത്തിന്റെ പേര് മാറ്റുമെന്ന് ട്രംപ് ആദ്യം ഭീഷണിപ്പെടുത്തിയിരുന്നത്.
എന്നാൽ ട്രംപിന്റെ ഈ നടപടിയെ കാനഡ രൂക്ഷമായി വിമർശിച്ചു. കാനഡക്കാർ എക്കാലത്തും ആ തടാകത്തെ ‘ഒന്റാരിയോ’ എന്ന് മാത്രമേ വിളിക്കൂ എന്ന് പ്രധാനമന്ത്രി മാർക്ക് കാർണി വ്യക്തമാക്കി. ഇതൊരു വെറും വിവരക്കേടാണെന്ന് നോവ സ്കോഷ്യ പ്രീമിയർ ടിം ഹൂസ്റ്റണും പ്രതികരിച്ചു. അമേരിക്കയും കാനഡയും രാജ്യങ്ങളായി രൂപപ്പെടുന്നതിന് 400 വർഷം മുമ്പേ നിലവിൽ വന്നതാണ് ഈ പേരെന്നും കാർണി ചൂണ്ടിക്കാണിച്ചു.
അമേരിക്കയും കാനഡയും തമ്മിൽ അതിർത്തി പങ്കിടുന്ന അഞ്ച് വലിയ തടാകങ്ങളിൽ ഒന്നാണ് ഒന്റാരിയോ ലേക്ക്. ‘തിളങ്ങുന്ന ജലാശയം’ എന്നർത്ഥം വരുന്ന ഹ്യൂറോൺ തദ്ദേശീയ ജനവിഭാഗത്തിന്റെ ‘ഓനിയതാരിയോ’ എന്ന വാക്കിൽ നിന്നാണ് ഈ പേരുണ്ടായത്. കഴിഞ്ഞ വർഷം മെക്സിക്കോ ഉൾക്കടലിന്റെ പേര് ‘അമേരിക്കയുടെ ഉൾക്കടൽ’ എന്ന് ട്രംപ് മാറ്റിയത് സമാനമായ രീതിയിൽ വിവാദമായിരുന്നു.
ഫെഡറൽ രേഖകളിലും ഭൂമിശാസ്ത്ര സേവനങ്ങളിലും മാത്രമാണ് ഈ മാറ്റം ബാധകമാകുന്നതെങ്കിലും ചില ഓൺലൈൻ മാപ്പുകളും പേര് മാറ്റിയിട്ടുണ്ട്. മുൻപ് മെക്സിക്കോ ഉൾക്കടലിന്റെ പേര് മാറ്റം റിപ്പോർട്ട് ചെയ്യുന്നതിനിടയിൽ അസോസിയേറ്റഡ് പ്രസ് മാധ്യമവുമായി ബന്ധപ്പെട്ട തർക്കങ്ങളും വൈറ്റ് ഹൗസിൽ ഉടലെടുത്തിരുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
