ഡെമോക്രാറ്റിക് നിയന്ത്രണത്തിലുള്ള നഗരങ്ങളിൽ നിന്ന് ആളുകളെ നാടുകടത്താൻ മുൻഗണന നൽകാൻ അമേരിക്കൻ പ്രസിഡന്റ് ഡൊണാൾഡ് ട്രംപ് ഞായറാഴ്ച ഫെഡറൽ ഇമിഗ്രേഷൻ ഉദ്യോഗസ്ഥരോട് നിർദേശിച്ചതായി റിപ്പോർട്ട്. ട്രംപ് ഭരണകൂടത്തിന്റെ ഇമിഗ്രേഷൻ നയങ്ങൾക്കെതിരെ ലോസ് ആഞ്ചലസും മറ്റ് പ്രധാന നഗരങ്ങളിലും വൻ പ്രതിഷേധങ്ങൾ പൊട്ടിപ്പുറപ്പെട്ടതിനു ശേഷമാണ് ഈ പ്രഖ്യാപനം.
“ചരിത്രത്തിലെ ഏറ്റവും വലിയ കൂട്ട നാടുകടത്തൽ നടത്തുക എന്ന ലക്ഷ്യം നേടാൻ ശക്തമായി പ്രവർത്തിക്കണമെന്നാണ്” ട്രംപ് സോഷ്യൽ മീഡിയ പോസ്റ്റിലൂടെ യു.എസ് ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് (ICE) ഉദ്യോഗസ്ഥരോട് ആഹ്വാനം ചെയ്തത്.
ഈ ലക്ഷ്യത്തിലെത്താൻ ഉദ്യോഗസ്ഥർ “ലോസ് ആഞ്ചലസ്, ചിക്കാഗോ, ന്യൂയോർക്ക് തുടങ്ങിയ അമേരിക്കയിലെ ഏറ്റവും വലിയ നഗരങ്ങളിൽ അനധികൃത വിദേശികളെ തടങ്കലിലിടാനും നാടുകടത്താനുമുള്ള ശ്രമങ്ങൾ വിപുലീകരിക്കണമെന്നും” അദ്ദേഹം കൂട്ടിച്ചേർത്തു. ഈ പ്രഖ്യാപനം ആഴ്ചകളായുള്ള കർശന നടപടികൾക്കു ശേഷമാണ് വന്നത്.
ICE ഉദ്യോഗസ്ഥർ ദിവസേന കുറഞ്ഞത് 3,000 അറസ്റ്റുകൾ ലക്ഷ്യമിടണമെന്നാണ് വൈറ്റ് ഹൗസ് ഡെപ്യൂട്ടി ചീഫ് ഓഫ് സ്റ്റാഫും ട്രംപിന്റെ ഇമിഗ്രേഷൻ നയങ്ങളുടെ പ്രധാന ശില്പിയുമായ സ്റ്റീഫൻ മില്ലർ പറഞ്ഞത്. ഇത് ട്രംപിന്റെ രണ്ടാം ടേമിന്റെ ആദ്യ അഞ്ച് മാസങ്ങളിലെ ദിവസേന 650 അറസ്റ്റുകളിൽ നിന്ന് വലിയ വർധനയാണ്.
അതേസമയം, കാർഷിക മേഖല, റെസ്റ്റോറന്റുകൾ, ഹോട്ടലുകൾ എന്നിവയിൽ ആക്രമണാത്മക നടപടികൾ ഉണ്ടാക്കുന്ന ആഘാതത്തെക്കുറിച്ച് ട്രംപ് ആശങ്ക പ്രകടിപ്പിച്ചതിനെ തുടർന്ന്, ഈ മേഖലകളിൽ അറസ്റ്റുകൾ താൽക്കാലികമായി നിർത്തിവെക്കാൻ ട്രംപ് ഭരണകൂടം ഇമിഗ്രേഷൻ ഉദ്യോഗസ്ഥരോട് നിർദേശിച്ചിട്ടുണ്ട്. യു.എസ് സൈന്യത്തിന്റെ 250-ാം വാർഷികത്തിന് വാഷിംഗ്ടണിൽ ട്രംപ് നടത്തിയ വൻ പരേഡിനു ഒപ്പം ശനിയാഴ്ച “നോ കിംഗ്സ്” പ്രതിഷേധങ്ങൾ നടന്നു. ഈ പ്രതിഷేധങ്ങൾ മിക്കവാറും സമാധാനപരമായിരുന്നെങ്കിലും, പരിപാടി അവസാനിച്ചതിനു ശേഷം പ്രതിഷേധക്കാരെ പിരിച്ചു വിടാൻ ലോസ് ആഞ്ചലസിലെ പോലീസ് കണ്ണീർ വാതകവും ജനക്കൂട്ടത്തെ നിയന്ത്രിക്കുന്ന ആയുധങ്ങളും ഉപയോഗിച്ചു.
ആൽബർട്ടയിൽ നടക്കുന്ന ജി7 സാമ്പത്തിക ഉച്ച കോടിയിലേക്ക് യാത്ര ചെയ്യുന്നതിനിടെയാണ് ട്രംപ് ഡെമോക്രാറ്റിക് നിയന്ത്രണത്തിലുള്ള നഗരങ്ങളിൽ കർശന നടപടികൾ സ്വീകരിക്കാനുള്ള ആഹ്വാനം സോഷ്യൽ മീഡിയയിൽ പ്രസിദ്ധീകരിച്ചത്. ലോസ് ആഞ്ചലസിൽ നാഷണൽ ഗാർഡ് സേനയെ വിന്യസിച്ചതാണ് ആ നഗരത്തിലെ പ്രതിഷേധങ്ങൾ സമാധാനപരമായി നടന്നതിന്റെ കാരണമെന്ന് അദ്ദേഹം റിപ്പോർട്ടർമാരോട് പറഞ്ഞു. “നാഷണൽ ഗാർഡ് എല്ലാ സമയത്തും തയ്യാറായില്ലായിരുന്നെങ്കിൽ, അവർ ലോസ് ആഞ്ചലസിനെ കീറിമുറിക്കുമായിരുന്നു” എന്ന് ട്രംപ് പറഞ്ഞു
