വാഷിങ്ടൺ : ആർട്ടിഫിഷ്യൽ ഇന്റലിജൻസ് (AI) രംഗത്തെ നിയന്ത്രണങ്ങളെക്കുറിച്ചുള്ള ചർച്ചകൾ ശക്തമാകുന്നതിനിടയിൽ ആന്ത്രോപിക് സി.ഇ.ഒ ഡാരിയോ അമോഡിയുമായി യു.എസ് പ്രസിഡന്റ് ഡൊണാൾഡ് ട്രംപ് കൂടിക്കാഴ്ച നടത്തി. ഞായറാഴ്ച രാത്രിയായിരുന്നു ഇരു നേതാക്കളും തമ്മിലുള്ള അത്താഴ വിരുന്ന് നടന്നത്. എന്നാൽ എ.ഐ വികസനത്തിന്റെ വേഗത കുറയ്ക്കില്ലെന്ന നിലപാടിൽ ട്രംപ് ഉറച്ചുനിന്നു.
ചൈനയേക്കാൾ മുന്നിൽ നിൽക്കാനാണ് അമേരിക്ക മുൻഗണന നൽകേണ്ടതെന്നും എ.ഐ നിയന്ത്രണങ്ങൾ അമേരിക്കയ്ക്ക് തിരിച്ചടിയാകുമെന്നുമാണ് ട്രംപ് വ്യക്തമാക്കിയിരുന്നത്. ചൈനയേക്കാൾ ഒന്നര വർഷത്തോളം മുന്നിലാണ് തങ്ങളെന്നും ട്രംപ് ചൂണ്ടിക്കാണിച്ചു. എ.ഐ സാങ്കേതികവിദ്യയുടെ വേഗത കുറയ്ക്കുന്നത് അപകടസാധ്യതകൾ കുറയ്ക്കുമെന്ന അമോഡിയുടെ ആശങ്കകൾ നിലനിൽക്കെത്തന്നെ, ചൈനയ്‌ക്കെതിരായ സാങ്കേതിക മേധാവിത്വം നിലനിർത്താനാണ് മുൻഗണനയെന്ന് ട്രംപ് ആവർത്തിച്ചു.
അതേസമയം, ആർട്ടിഫിഷ്യൽ ഇന്റലിജൻസ് രംഗത്ത് കർശന നിയന്ത്രണങ്ങളും സുരക്ഷാ മുൻകരുതലുകളും വേണമെന്ന ആവശ്യവുമായി മൈക്രോസോഫ്റ്റ് സഹസ്ഥാപകൻ ബിൽ ഗേറ്റ്സും രംഗത്തെത്തിയിരുന്നു. എ.ഐ സുരക്ഷയെക്കുറിച്ചുള്ള ആശങ്കകൾ തമാശയല്ലെന്നും ഗേറ്റ്സ് വ്യക്തമാക്കുകയുണ്ടായി. ഈ വിഷയത്തിൽ ട്രംപുമായി ചർച്ച നടത്താൻ ആഗ്രഹിക്കുന്നതായും അദ്ദേഹം എൻ.ബി.സി അഭിമുഖത്തിൽ പറഞ്ഞു.
എ.ഐയുടെ അനിയന്ത്രിതമായ വളർച്ച മനുഷ്യരാശിക്ക് തന്നെ വലിയ ഭീഷണിയാകുമെന്ന് പ്രമുഖ എ.ഐ ഗവേഷകരും മുന്നറിയിപ്പ് നൽകിയിരുന്നു. എന്നാൽ ഇത്തരം അപകട മുന്നറിയിപ്പുകളെക്കുറിച്ചുള്ള ചോദ്യങ്ങളോട്, തനിക്ക് ഇക്കാര്യത്തിൽ ആശങ്കയില്ലെന്നായിരുന്നു ട്രംപിന്റെ പ്രതികരണം. എ.ഐ സാങ്കേതികവിദ്യയുടെ സാധ്യതകളിൽ തനിക്ക് പൂർണ്ണ ആത്മവിശ്വാസമുണ്ടെന്നും ട്രംപ് ആവർത്തിച്ച് വ്യക്തമാക്കുകയുണ്ടായി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
