മോസ്കോ: റഷ്യയിലെ സൈബീരിയൻ മേഖലയിലുള്ള ഇർകുട്സ്ക് ‘ആന്റി-പ്ലേഗ് റിസർച്ച് ഇൻസ്റ്റിറ്റ്യൂട്ടിലെ’ ലാബ് ടെക്നീഷ്യൻ ദാരിയ ഷിപിലോവ (28) അജ്ഞാത രോഗലക്ഷണങ്ങളോടെ മരണപ്പെട്ടു. ഇതിന് പിന്നാലെ മേഖലയിൽ 197 പേരെ റഷ്യൻ ആരോഗ്യവകുപ്പ് അടിയന്തരമായി നിരീക്ഷണത്തിലാക്കി. ലാബിൽ സാമ്പിളുകൾ ശേഖരിക്കുന്നതിനിടെ ബാക്ടീരിയ അടങ്ങിയ ടെസ്റ്റ് ട്യൂബ് അബദ്ധത്തിൽ പൊട്ടി അപകടമുണ്ടായതായി റിപ്പോർട്ടുകളുണ്ട്. ശ്വാസകോശത്തെ ബാധിക്കുന്ന ന്യൂമോണിക് പ്ലേഗ് (Pneumonic Plague) ബാധിച്ചാണ് മരണമെന്നാണ് പ്രാഥമിക നിഗമനമെങ്കിലും, രോഗബാധ ഔദ്യോഗികമായി സ്ഥിരീകരിക്കാൻ റഷ്യൻ അധികൃതർ തയ്യാറായിട്ടില്ല.
സെപ്റ്റംബർ 25-നാണ് ലാബിൽ ടെസ്റ്റ് ട്യൂബ് പൊട്ടിയുള്ള അപകടം നടക്കുന്നത്. തുടർന്ന് സെപ്റ്റംബർ 29-ന് കടുത്ത ന്യൂമോണിയ ലക്ഷണങ്ങളോടെ ഷെലെഖോവയിലെ ആശുപത്രിയിൽ പ്രവേശിപ്പിക്കപ്പെട്ട ഷിപിലോവ, ഒക്ടോബർ 1 രാത്രിയിലാണ് വെന്റിലേറ്ററിൽ കഴിയവെ മരണപ്പെടുന്നത്. ഇതിന് പിന്നാലെ ഷെലെഖോവ ഡിസ്ട്രിക്റ്റ് ആശുപത്രിയും പരിസരത്തെ മെറ്റേണിറ്റി വാർഡുകളും അടച്ചുപൂട്ടി പൂർണ്ണമായി ക്വാറന്റൈനിലാക്കി.
മരിച്ച യുവതിയുമായി സമ്പർക്കത്തിൽ വന്ന 197 പേരെ കണ്ടെത്തിയതിൽ 189 പേരെ നിലവിൽ വിവിധ ആശുപത്രികളിൽ നിരീക്ഷണത്തിലാക്കിയിരിക്കുകയാണ്. സംഭവത്തിന് പിന്നാലെ ഇർകുട്സ്ക് മേഖലയിൽ പൊതുപരിപാടികൾ റദ്ദാക്കുകയും അടിയന്തിര പ്രതിരോധ നടപടികൾ ഏകോപിപ്പിക്കാൻ റഷ്യൻ പബ്ലിക് ഹെൽത്ത് ഏജൻസിയായ ‘റോസ്പോട്രെബ്നാഡ്സോർ’ (Rospotrebnadzor) മേധാവി അണ്ണാ പോപോവ മോസ്കോയിൽ നിന്ന് നേരിട്ടെത്തുകയും ചെയ്തു. കൂടാതെ സുരക്ഷാ വീഴ്ച വരുത്തിയതിന് ക്രിമിനൽ കേസ് രജിസ്റ്റർ ചെയ്തിട്ടുമുണ്ട്.
എന്നാൽ ഇർകുട്സ്ക് റീജിയണൽ ഗവർണർ ഈഗോർ കോബ്സെവ് ഉൾപ്പെടെയുള്ള ഉദ്യോഗസ്ഥർ “പ്രത്യേക അപകടകരമായ രോഗബാധ” എന്ന് മാത്രമാണ് പ്രസ്താവനകളിൽ വ്യക്തമാക്കുന്നത്; ‘പ്ലേഗ്’ എന്ന വാക്ക് ഉപയോഗിക്കാൻ തയ്യാറായിട്ടില്ല. നിരീക്ഷണത്തിലുള്ള ആർക്കും നിലവിൽ രോഗലക്ഷണങ്ങളില്ലെന്നും പരിശോധനാ ഫലങ്ങൾ നെഗറ്റീവാണെന്നും ഗവർണർ അറിയിച്ചു.
അതേസമയം, ബാങ്കോക്കിലേക്ക് നടത്തിയ യാത്രയ്ക്കിടയിലോ, ബുര്യാത്തിയ റിപ്പബ്ലിക്കിലേക്ക് നടത്തിയ ജോലി സംബന്ധമായ യാത്രയ്ക്കിടയിലോ ആകാം രോഗബാധയെന്ന മറ്റ് രണ്ട് സാധ്യതകളും ഇതിനിടെ ഉയർന്നു വന്നിട്ടുണ്ട്. എന്നാൽ ഇതിൽ ഒരു വാദവും ഔദ്യോഗികമായി തെളിയിക്കപ്പെട്ടിട്ടില്ല. സുരക്ഷാ മാനദണ്ഡങ്ങൾ പാലിച്ച് പ്രദേശത്ത് നിരീക്ഷണം തുടരുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
