ട്രംപിന്റെ മുഖച്ഛായയുള്ള മാരക ലഹരിഗുളിക: ‘റെഡ് അലേർട്ട്’ പ്രഖ്യാപിച്ച് ഡച്ച് മാനസികാരോഗ്യ സംഘടന

ഹേഗ്: അമേരിക്കൻ മുൻ പ്രസിഡന്റ് ഡോണൾഡ് ട്രംപിന്റെ മുഖാകൃതിയിലുള്ള അതീവ അപകടകാരിയായ ലഹരിഗുളികയുടെ പ്രചാരണത്തിനെതിരെ മുന്നറിയിപ്പുമായി ഡച്ച് മാനസികാരോഗ്യ സംഘടനയായ ട്രിംബാസ് ഇൻസ്റ്റിറ്റ്യൂട്ട് (Trimbos Institute). ഈ ലഹരിമരുന്നിന്റെ ഉപയോഗം ജീവനുതന്നെ ഭീഷണിയായേക്കാം എന്ന് ചൂണ്ടിക്കാട്ടി ഇൻസ്റ്റിറ്റ്യൂട്ട് തങ്ങളുടെ ഔദ്യോഗിക വെബ്‌സൈറ്റിലും സമൂഹമാധ്യമങ്ങളിലും ‘റെഡ് അലേർട്ട്’ ജാഗ്രതാ നിർദേശം പുറപ്പെടുവിച്ചു. MDMA യ്ക്ക് സമാനമായ, എന്നാൽ ഗുരുതരമായ ആരോഗ്യപ്രശ്നങ്ങൾ സൃഷ്ടിക്കുന്ന PMMA (Para-Methoxy-Methamphetamine) എന്ന രാസവസ്തു ക്രമാതീതമായ അളവിൽ ഈ ഗുളികയിൽ അടങ്ങിയിട്ടുണ്ടെന്ന് പരിശോധനകളിൽ കണ്ടെത്തിയിട്ടുണ്ട്.

ലഹരിമരുന്നുകളിൽ PMMA യുടെ സാന്നിധ്യം കണ്ടെത്തിയാൽ അതിനെ മാരകമായ ഒന്നായിത്തന്നെ കണക്കാക്കേണ്ടതുണ്ടെന്ന് ട്രിംബാസ് ഇൻസ്റ്റിറ്റ്യൂട്ട് വ്യക്തമാക്കുന്നു. ഈ ഗുളികകൾ ഉപയോഗിക്കുന്ന വേളയിൽ പെട്ടെന്ന് ലഹരി അനുഭവപ്പെടില്ല എന്നതും അപകട സാധ്യത വർധിപ്പിക്കുന്നു. ക്രമേണ തലചുറ്റൽ, ഉയർന്ന ഹൃദയമിടിപ്പ് എന്നിവ ഉണ്ടാകുകയും, അമിത അളവിൽ ഉള്ളിൽ ചെന്നാൽ ശരീരതാപനില ഉയർന്ന അളവിലേക്ക് മാറുക ചെയ്യും. തുടർന്ന് അപസ്മാരബാധ, ബോധക്ഷയം, ഹൃദയസ്തംഭനം എന്നിവ സംഭവിക്കാനും ഇത് മരണത്തിലേക്ക് നയിക്കാനും കാരണമാകാം. ഇതിനാൽ ഇത്തരം ഗുളികകളുടെ ഉപയോഗം പൂർണമായും ഒഴിവാക്കണമെന്നാണ് അധികൃതരുടെ ശക്തമായ നിർദേശം.

ട്രംപിന്റെ കൃത്യമായ മുഖച്ഛായയിൽ നിർമിച്ചിരിക്കുന്ന ഈ ഗുളികകളുടെ പിൻവശത്ത് ‘NL’, ‘Trump’ എന്ന് രേഖപ്പെടുത്തിയിട്ടുണ്ട്. പച്ച, ചുവപ്പ്, മഞ്ഞ, നീല എന്നീ നിറങ്ങളിലാണ് ഇവ വിപണിയിൽ പ്രത്യക്ഷപ്പെട്ടിട്ടുള്ളത്. നിലവിൽ ഇതുവരെ ഈ ഗുളിക ഉപയോഗിച്ചതായി ആരുടെയും വിവരങ്ങളോ അല്ലെങ്കിൽ മരണമോ ഗുരുതര ആരോഗ്യപ്രശ്നങ്ങളോ റിപ്പോർട്ട് ചെയ്തിട്ടില്ലെന്ന് സംഘടനയുടെ വക്താവ് അന്നീക്ക് ഗ്രൂത്തൂയിസ് അസോസിയേറ്റ് പ്രെസിനോട് വ്യക്തമാക്കി. നെതർലൻഡ്സിൽ MDMA ഉൾപ്പെടെയുള്ള ലഹരിമരുന്നുകളുടെ ഉത്പാദനത്തിനും വിൽപനയ്ക്കും നിയമപരമായ വിലക്കുണ്ടെങ്കിലും, നൈറ്റ് ക്ലബുകളിലും സംഗീതപരിപാടികളിലും ഇവ വ്യാപകമായി ഉപയോഗിക്കപ്പെടുന്നുണ്ട്.

രാഷ്ട്രീയ നേതാക്കളുടെ മുഖച്ഛായയിൽ ലഹരിഗുളികകൾ വിപണിയിൽ എത്തുന്നത് ഇതാദ്യമല്ല. 2017-ൽ ജർമനിയിൽ ഓറഞ്ച് (കാരറ്റ്) നിറത്തിലുള്ള ട്രംപിന്റെ തലയുടെ ആകൃതിയിലുള്ള ലഹരിഗുളികകൾ പൊലീസ് പിടിച്ചെടുത്തിരുന്നു. ഇത്തരം ആകർഷകമായ ആകൃതികളിലും നിറങ്ങളിലും ലഹരിമരുന്നുകൾ വിപണിയിൽ എത്തിക്കുന്നത് യുവാക്കളെയും പൊതുജനങ്ങളെയും ആകർഷിക്കാനും ലഹരിമരുന്ന് സംഘങ്ങളുടെ കച്ചവടം കൂട്ടാനുമാണ്. എന്നാൽ ഇവയിൽ അടങ്ങിയിരിക്കുന്ന വിനാശകരമായ രാസവസ്തുക്കൾ ഉണ്ടാക്കുന്ന പ്രത്യാഘാതങ്ങൾ അതീവ ഗുരുതരമാണെന്ന് വിദഗ്ധർ മുന്നറിയിപ്പ് നൽകുന്നു.

Trump-Faced Drug Pill: Dutch Mental Health Alert

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq