ന്യൂയോർക്ക്: ലോകമെമ്പാടുമുള്ള സിനിമാ-സംഗീത പ്രേമികൾ ഉറ്റുനോക്കുന്ന ട്രൈബെക്ക ഫിലിം ഫെസ്റ്റിവലിൽ ഇത്തവണ ക്യാമറക്കണ്ണുകൾ മുഴുവൻ ഒരു പുതിയ താരജോഡിക്ക് പിന്നാലെയായിരുന്നു. മുൻ കനേഡിയൻ പ്രധാനമന്ത്രി ജസ്റ്റിൻ ട്രൂഡോയും പ്രശസ്ത പോപ്പ് ഗായിക കാറ്റി പെറിയും തങ്ങളുടെ പ്രണയം ഔദ്യോഗികമായി പരസ്യപ്പെടുത്തിക്കൊണ്ട് ആദ്യമായി ഒരുമിച്ച് റെഡ് കാർപെറ്റിലെത്തി. കാറ്റി പെറിയുടെ ഏറ്റവും പുതിയ കൺസേർട്ട് ഫിലിം ആയ “Katy Perry: The Lifetimes Tour – Live from Paris”-ന്റെ പ്രീമിയർ ഷോയ്ക്ക് മുന്നോടിയായാണ് ഇരുവരും ഒന്നിച്ച് മാധ്യമങ്ങൾക്ക് മുന്നിലെത്തിയത്.
ന്യൂയോർക്കിലെ ഒ.കെ.എക്സ് (OKX) തിയേറ്ററിൽ നടന്ന ചടങ്ങിൽ 41-കാരിയായ കാറ്റി പെറി വെള്ള നിറത്തിലുള്ള അതീവ സുന്ദരമായ ഹാൾട്ടർ-നെക്ക് ഗൗൺ ധരിച്ചാണ് എത്തിയത്. 54-കാരനായ ജസ്റ്റിൻ ട്രൂഡോ കറുത്ത സ്യൂട്ടും വെള്ള ഷർട്ടുമണിഞ്ഞ് ലളിതവും എന്നാൽ ക്ലാസിക് ലുക്കിലുമായിരുന്നു. ആരാധകരെയും മാധ്യമപ്രവർത്തകരെയും ഏറെ ആവേശത്തോടെയാണ് ഇരുവരും അഭിവാദ്യം ചെയ്തത്.
കഴിഞ്ഞ വർഷം ജൂലൈയിൽ മോൺട്രിയലിലെ ഒരു റെസ്റ്റോറന്റിൽ ഇരുവരും ഒരുമിച്ച് അത്താഴവിരുന്ന് കഴിക്കുന്ന ചിത്രം പുറത്തുവന്നതോടെയാണ് ഇവരുടെ പ്രണയത്തെക്കുറിച്ചുള്ള വാർത്തകൾ പ്രചരിച്ചു തുടങ്ങിയത്. തുടർന്ന് കൊച്ചെല്ല മ്യൂസിക് ഫെസ്റ്റിവലിലും, ‘ബീഫ്’ ടേസ്റ്റ്മേക്കർ ചടങ്ങിലുമെല്ലാം ഇവർ ഒന്നിച്ച് പങ്കെടുത്തിരുന്നെങ്കിലും, ഒരു ഔദ്യോഗിക ചടങ്ങിൽ ഇരുവരും കൈകോർത്ത് എത്തുന്നത് ഇതാദ്യമായാണ്.
ജസ്റ്റിൻ ട്രൂഡോയുടെ 18 വയസ്സുകാരനായ മകൻ സേവ് അടുത്തിടെ ഒരു പോഡ്കാസ്റ്റിൽ കാറ്റി പെറിയുമായുള്ള തന്റെ സൗഹൃദത്തെക്കുറിച്ച് തുറന്നു പറഞ്ഞിരുന്നു. ഒരു മ്യൂസിഷ്യൻ കൂടിയായ സേവ് താൻ ചെയ്യുന്ന പുതിയ പാട്ടുകൾ കാറ്റിക്ക് അയച്ചുകൊടുക്കാറുണ്ടെന്നും, അവർ കൃത്യമായ നിർദ്ദേശങ്ങളും ഉപദേശങ്ങളും നൽകാറുണ്ടെന്നും വ്യക്തമാക്കിയിരുന്നു. എന്തായാലും രാഷ്ട്രീയ-സംഗീത ലോകത്തെ ഈ അപൂർവ്വ പ്രണയ ജോഡികളുടെ പുതിയ ചിത്രങ്ങൾ ഇപ്പോൾ സോഷ്യൽ മീഡിയയിൽ തരംഗമാവുകയാണ്.
Justin Trudeau, Katy Perry step into limelight for premiere of the pop star’s concert film
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
