ടൊറോന്റോ: ടൊറോന്റോയിൽ റോഡപകടങ്ങളിൽ കൊല്ലപ്പെടുന്ന കാൽനടയാത്രക്കാരുടെ എണ്ണം മുൻവർഷങ്ങളെ അപേക്ഷിച്ച് കുത്തനെ ഉയരുന്നു. പൊലീസിന്റെ ട്രാഫിക് സർവീസസ് യൂണിറ്റ് പുറത്തുവിട്ട പുതിയ കണക്കുകൾ പ്രകാരം ഈ വർഷം ഇതുവരെ 21 കാൽനടയാത്രക്കാരാണ് വാഹനാപകടങ്ങളിൽ കൊല്ലപ്പെട്ടത്. കഴിഞ്ഞ വർഷത്തെ അപേക്ഷിച്ച് 24 ശതമാനത്തിന്റെ വർധനയാണിത്. നിലവിലെ പോക്ക് തുടർന്നാൽ അടുത്ത അഞ്ച് വർഷത്തിനിടയിലെ ഏറ്റവും ഉയർന്ന മരണസംഖ്യയിലേക്ക് നഗരം എത്തിയേക്കുമെന്നാണ് മുന്നറിയിപ്പ്.
കഴിഞ്ഞ നവംബറിൽ പ്രവിശ്യാ ഭരണകൂടം വേഗത അളക്കുന്ന സ്പീഡ് ക്യാമറകൾ നീക്കം ചെയ്തതാണ് സ്ഥിതി വഷളാക്കിയതെന്ന് റോഡ് സുരക്ഷാ പ്രവർത്തകർ ആരോപിക്കുന്നു. ഡ്രൈവർമാരുടെ അശ്രദ്ധയും അമിതവേഗതയുമാണ് അപകടങ്ങൾക്ക് പ്രധാന കാരണമെന്ന് പൊലീസും സമ്മതിക്കുന്നു. കൂടാതെ, മോട്ടോർ സൈക്കിൾ യാത്രക്കാരുടെ മരണത്തിലും 57 ശതമാനത്തിന്റെ വലിയ വർധന രേഖപ്പെടുത്തിയിട്ടുണ്ട്.
കാൽനടയാത്രക്കാർക്ക് കൂടുതൽ സുരക്ഷിതമായ റോഡ് അടിസ്ഥാനസൗകര്യങ്ങൾ ഒരുക്കണമെന്നും സ്പീഡ് ക്യാമറകൾ പുനഃസ്ഥാപിക്കണമെന്നും ആവശ്യപ്പെട്ട് പ്രതിഷേധം ശക്തമാണ്. എന്നാൽ ട്രാഫിക് നിയന്ത്രണത്തിനായി വേഗപ്പൂട്ടുകളും റൗണ്ട് എബൗട്ടുകളും സ്ഥാപിക്കുന്നതിന് 52 ദശലക്ഷം ഡോളറോളം ചെലവും 13 വർഷത്തോളം സമയവും വേണമെന്നാണ് സിറ്റി അധികൃതരുടെ റിപ്പോർട്ട്. അപകടങ്ങൾ കുറയ്ക്കുന്നതിനായി ഡ്രൈവർമാർക്കിടയിൽ ബോധവൽക്കരണ പരിപാടികളും പൊലീസ് ശക്തമാക്കിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
