റഷ്യ: സർക്കസ് പ്രകടനത്തിനിടെ സുരക്ഷാവല തകർന്ന് കടുവ കാണികൾക്കിടയിലേക്ക് ചാടി. റഷ്യയിലെ റോസ്തോവ് ഓൺ ഡോണിൽ കഴിഞ്ഞ ഞായറാഴ്ച നടന്ന ഡോവ്ഗലിയുക് സർക്കസിനിടെയാണ് നടുക്കുന്ന ഈ സംഭവമുണ്ടായത്. സുരക്ഷാ ക്രമീകരണങ്ങളിലെ പാളിച്ച മൂലം കടുവ പെട്ടെന്ന് കാണികൾക്കിടയിലേക്ക് എത്തിയെങ്കിലും വലിയ അപകടങ്ങൾ ഒഴിവായത് ആശ്വാസമായി.
മൂന്ന് കടുവകളും രണ്ട് പരിശീലകരും ചേർന്ന് പ്രകടനം നടത്തുന്നതിനിടെ സുരക്ഷാവലയുടെ ഒരു ഭാഗം അപ്രതീക്ഷിതമായി തകരുകയായിരുന്നു. കീറിയ വലയ്ക്കിടയിലൂടെ ഒരു കടുവ കാണികൾക്കിടയിലേക്ക് ചാടുകയായിരുന്നു. ഇതോടെ പരിഭ്രാന്തരായ ആളുകൾ ചിതറിയോടി. എന്നാൽ കാണികളെക്കാൾ ഏറെ ഭയപ്പെട്ടത് കടുവയായിരുന്നുവെന്ന് ദൃക്സാക്ഷികൾ പറഞ്ഞു. അപ്രതീക്ഷിതമായി പുറത്തെത്തിയ കടുവ അമ്പരപ്പിലായിരുന്നതിനാൽ അക്രമണ സ്വഭാവം കാണിച്ചില്ല.
സംഭവത്തിന്റെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ വലിയ പ്രതിഷേധമാണ് ഉയരുന്നത്. സർക്കസുകളിൽ വന്യമൃഗങ്ങളെ ഉപയോഗിക്കുന്നതിലെ അപകടവും സുരക്ഷാ മാനദണ്ഡങ്ങളിലെ വീഴ്ചയും വീണ്ടും സജീവ ചർച്ചയായിരിക്കുകയാണ്. സംഭവത്തിൽ അധികൃതർ അന്വേഷണം ആരംഭിച്ചതായും സർക്കസ് കൂടാരത്തിന്റെ സുരക്ഷാ ക്രമീകരണങ്ങൾ പുനഃപരിശോധിക്കുമെന്നും റിപ്പോർട്ടുകൾ വ്യക്തമാക്കുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Safety net collapses during circus in Russia: Tiger jumps into audience; Shocking footage released
