റഷ്യൻ പ്രസിഡന്റ് വ്ലാഡിമിർ പുടിൻ രണ്ടു ദിവസത്തെ ഔദ്യോഗിക സന്ദർശനത്തിനായി ചൈനയിലെത്തി. ഇരുരാജ്യങ്ങളും തമ്മിലുള്ള സൗഹൃദ ഉടമ്പടിയുടെ 25-ാം വാർഷികത്തോടനുബന്ധിച്ചാണ് ഈ സന്ദർശനം. ചൈനീസ് പ്രസിഡന്റ് ഷി ജിൻപിംഗുമായി ഇന്ന് നടത്തുന്ന നിർണായക കൂടിക്കാഴ്ചയിൽ ആഗോള രാഷ്ട്രീയവും ഉഭയകക്ഷി ബന്ധങ്ങളും പ്രധാന ചർച്ചാവിഷയമാകും. യുക്രൈൻ യുദ്ധം, ഇറാൻ സംഘർഷം, ഹോർമുസ് കടലിടുക്കിലെ സുരക്ഷാ നിയന്ത്രണങ്ങൾ എന്നിവയുൾപ്പെടെയുള്ള വിഷയങ്ങളിൽ ഇരുനേതാക്കളും നിലപാടുകൾ പങ്കുവെക്കും.
സാമ്പത്തിക-പ്രതിരോധ സഹകരണം ശക്തമാക്കുന്നതിനൊപ്പം ഊർജ സുരക്ഷയ്ക്ക് മുൻഗണന നൽകുന്ന നാൽപ്പതോളം പുതിയ ഉഭയകക്ഷി കരാറുകളിൽ ഇരുരാജ്യങ്ങളും ഒപ്പുവെക്കുമെന്നാണ് റിപ്പോർട്ടുകൾ. ഇതിൽ പുതിയ സൈബീരിയൻ ഗ്യാസ് പൈപ്പ്ലൈൻ പദ്ധതി ഉൾപ്പെടെയുള്ള നിർണായക കരാറുകളും ഉൾപ്പെടുന്നു. പാശ്ചാത്യ രാജ്യങ്ങൾ ഏർപ്പെടുത്തിയ ശക്തമായ ഉപരോധങ്ങൾ നിലനിൽക്കുന്ന സാഹചര്യത്തിൽ, ചൈനയുമായുള്ള സാമ്പത്തിക പങ്കാളിത്തം റഷ്യയ്ക്ക് ഏറെ നിർണായകമാണ്.
അമേരിക്കൻ പ്രസിഡന്റ് ഡോണൾഡ് ട്രംപിന്റെ ചൈനീസ് സന്ദർശനം കഴിഞ്ഞ് തൊട്ടുപിന്നാലെയാണ് വ്ലാഡിമിർ പുടിൻ ബെയ്ജിംഗിൽ എത്തിയിരിക്കുന്നത് എന്നത് അന്താരാഷ്ട്ര തലത്തിൽ വലിയ പ്രാധാന്യത്തോടെയാണ് ലോകം ഉറ്റുനോക്കുന്നത്. അമേരിക്കയുമായി വ്യാപാര ബന്ധങ്ങൾ മെച്ചപ്പെടുത്താൻ ചൈന ശ്രമിക്കുന്നതിനിടയിലാണ് ഈ സന്ദർശനം. പാശ്ചാത്യ ശക്തികൾക്കെതിരെ റഷ്യയും ചൈനയും തമ്മിലുള്ള തന്ത്രപരമായ കൂട്ടുകെട്ട് കൂടുതൽ ദൃഢമാക്കാൻ ഈ കൂടിക്കാഴ്ച വഴിതുറക്കുമെന്നാണ് വിലയിരുത്തപ്പെടുന്നത്.
The world is eagerly awaiting the Xi Jinping-Putin meeting today: Russia to sign 40 agreements with China
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
