ഭൂപടത്തിലെ അതിരുകൾ അളന്നാൽ കേരളവും പശ്ചിമേഷ്യയും തമ്മിൽ കാതങ്ങളുടെ ദൂരമുണ്ടാകാം. എന്നാൽ അങ്ങ് മണലാരണ്യത്തിൽ ഒരു മിസൈൽ പതിക്കുമ്പോൾ അതിന്റെ ആദ്യ പ്രകമ്പനമേൽക്കുന്നത് കേരളത്തിലെ ഒരു സാധാരണ പ്രവാസിയുടെ വീടിന്റെ അടുക്കളയിലായിരിക്കും. ടിവി സ്ക്രീനുകളിൽ മിസൈൽ-ഡ്രോൺ ആക്രമണങ്ങളുടെ ദീപ്തി തെളിയുമ്പോൾ, ഇവിടെ പ്രിയപ്പെട്ടവരുടെ നെഞ്ചിടിപ്പുകൾക്കൊപ്പം ഫോൺ ബെല്ലുകളും നിലയ്ക്കാതെ മുഴങ്ങാൻ തുടങ്ങും. കാരണം, മലയാളിക്ക് ഈ യുദ്ധം വെറുമൊരു അന്താരാഷ്ട്ര വാർത്താ വിശകലനമല്ല; അത് അക്കരെയുള്ള പ്രാണന്റെ കാവലിനെക്കുറിച്ചുള്ള വ്യാകുലതയാണ്, നാളത്തെ ജീവിത ബഡ്ജറ്റിനെക്കുറിച്ചുള്ള ആശങ്കയാണ്. പതിറ്റാണ്ടുകളായി മണലാരണ്യത്തിലേക്ക് പറന്നുയർന്ന മലയാളി സ്വപ്നങ്ങൾക്ക് മേൽ കരിനിഴൽ വീഴ്ത്തുകയാണ് ഈ പശ്ചിമേഷ്യൻ പ്രതിസന്ധി.
പശ്ചിമേഷ്യൻ പ്രതിസന്ധി കേവലം ഒരു സാമ്പത്തിക ഭീഷണി മാത്രമല്ല, അത് പ്രവാസികളുടെ ജീവനെടുക്കുന്ന ഘട്ടത്തിലേക്ക് വളർന്നിരിക്കുന്നു. ചെങ്കടലിലും ഒമാൻ ഉൾക്കടലിലും വ്യാപാരക്കപ്പലുകൾക്ക് നേരെ നടക്കുന്ന ഡ്രോൺ-മിസൈൽ ആക്രമണങ്ങളിലും, മുൻപ് യുഎഇയിലെ അബുദാബി നാഷണൽ ഓയിൽ കമ്പനി (ADNOC) സംഭരണശാലയിലുണ്ടായ സ്ഫോടനത്തിലും ഇന്ത്യക്കാരുടെ ജീവൻ പൊലിഞ്ഞത് നമ്മൾ കണ്ടതാണ്. ഇതിന് പുറമെ സൗദി-യമൻ അതിർത്തി പ്രദേശങ്ങളിലുണ്ടായ ഷെല്ലാക്രമണങ്ങളിലും നിരവധി ഇന്ത്യൻ തൊഴിലാളികൾ ഇരകളാക്കപ്പെട്ടു. വ്യോമപാതകൾ യുദ്ധമേഖലകളായി മാറുകയും വിമാന സർവീസുകൾ റദ്ദാക്കപ്പെടുകയും ചെയ്യുമ്പോൾ ജന്മനാട്ടിലേക്ക് മടങ്ങാനാവാതെ വിമാനത്താവളങ്ങളിൽ കുടുങ്ങിപ്പോകുന്ന പ്രവാസികളുടെയും, അവരെയോർത്ത് ഇവിടെ ഉരുകിക്കഴിയുന്ന കുടുംബങ്ങളുടെയും മാനസിക സംഘർഷം വിവരണാതീതമാണ്. അന്യനാട്ടിൽ ചോരനീരാക്കി പണിയെടുക്കുന്ന സാധാരണക്കാരായ തൊഴിലാളികളാണ് വൻശക്തികളുടെ ഈ അധികാരപ്പോരാട്ടത്തിൽ നിരപരാധികളായ ഇരകളായി മാറുന്നത്.
കേരളത്തിന്റെ വികസനഗാഥയും ഇന്നത്തെ സമൃദ്ധിയും ഗൾഫ് പണത്തിന്റെ കരുത്തിലാണ് കെട്ടിപ്പടുത്തിട്ടുള്ളത്. അതുകൊണ്ടുതന്നെ, പശ്ചിമേഷ്യയിലുണ്ടാകുന്ന ഏത് ചലനവും ആദ്യം തകർക്കുന്നത് നമ്മുടെ സാമ്പത്തിക നട്ടെല്ലിനെയാണ്. അക്കരെ ബിസിനസുകൾ പ്രതിസന്ധിയിലാവുകയും ശമ്പളം മുടങ്ങുകയും ചെയ്യുമ്പോൾ നാട്ടിലേക്കുള്ള പണമൊഴുക്കിന്റെ ഉറവ വറ്റും. ഇത് കേരളത്തിലെ റിയൽ എസ്റ്റേറ്റ്, സ്വർണ്ണ വിപണി, നിർമ്മാണ മേഖല, ബാങ്കിങ് നിക്ഷേപം എന്നിവയുടെ ചക്രങ്ങളെ പാടെ നിശ്ചലമാക്കും. ജനങ്ങളുടെ കൈകളിൽ പണമില്ലാതാകുന്നതോടെ ആഭ്യന്തര വിപണി കനത്ത മാന്ദ്യത്തിലേക്ക് വഴുതിവീഴും. സാഹചര്യം കൈവിട്ടുപോയാൽ, 1990-കളിലെ കുവൈറ്റ് യുദ്ധകാലത്തെ അനുസ്മരിപ്പിക്കും വിധം പ്രവാസികളുടെ ഒരു കൂട്ടപ്പാലായനത്തിന് നാട് സാക്ഷിയാകേണ്ടി വരും. ജീവൻ മാത്രം കൈപ്പിടിയിലൊതുക്കി തിരിച്ചെത്തുന്ന ലക്ഷക്കണക്കിന് മനുഷ്യർക്ക് പുനരധിവാസവും ഉപജീവനവും ഒരുക്കുക എന്നത് കേരളത്തിന് താങ്ങാനാവാത്ത ബാധ്യതയായി മാറും.
ഹോർമൂസ് കടലിടുക്കിലും ചെങ്കടലിലും കപ്പൽ ഗതാഗതം തടസ്സപ്പെടുമ്പോൾ അത് ആഗോള വിതരണ ശൃംഖലയെയാണ് തകിടം മറിക്കുന്നത്. അന്താരാഷ്ട്ര തലത്തിൽ ക്രൂഡ് ഓയിൽ വിലയിലുണ്ടാകുന്ന കുതിച്ചുചാട്ടം ആഭ്യന്തര വിപണിയിൽ ഇന്ധനവില വർദ്ധിപ്പിക്കും. ഇത് ചരക്കുകൂലി കുത്തനെ കൂട്ടുകയും, ഉപ്പ് തൊട്ട് കർപ്പൂരം വരെ ഇതര സംസ്ഥാനങ്ങളിൽ നിന്ന് ഇറക്കുമതി ചെയ്യുന്ന ഉപഭോക്തൃ സംസ്ഥാനമായ കേരളത്തിൽ കടുത്ത വിലക്കയറ്റത്തിന് കാരണമാവുകയും ചെയ്യും. നിത്യോപയോഗ സാധനങ്ങളുടെ വില നിയന്ത്രണാതീതമാകുന്നതോടെ സാധാരണക്കാരന്റെ കുടുംബ ബഡ്ജറ്റുകൾ പാടെ തകരും. ചുരുക്കത്തിൽ, യുദ്ധമുഖം ദൂരെയെവിടെയോ ആണെങ്കിലും അതിന്റെ പരോക്ഷമായ സാമ്പത്തിക ബാധ്യത പേറേണ്ടി വരുന്നത് ഇവിടുത്തെ സാധാരണക്കാരനാണ്.
പരമ്പരാഗത തൊഴിൽ മേഖലകൾക്ക് പുറമെ, അടുത്ത കാലത്തായി ഐടി, ആരോഗ്യ പരിപാലനം, സ്റ്റാർട്ടപ്പുകൾ തുടങ്ങിയ അത്യാധുനിക മേഖലകളിലേക്ക് ചുവടുവെച്ച പുതുതലമുറ മലയാളി പ്രവാസികളെയും ഈ അസ്ഥിരത സാരമായി ബാധിക്കുന്നുണ്ട്. അന്താരാഷ്ട്ര കമ്പനികൾ പശ്ചിമേഷ്യയിലെ തങ്ങളുടെ നിക്ഷേപങ്ങളും വിപുലീകരണ പദ്ധതികളും മരവിപ്പിക്കുമ്പോൾ, ഉയർന്ന ശമ്പളവും മികച്ച ജീവിതസാഹചര്യങ്ങളും മോഹിച്ച് അങ്ങോട്ട് കുടിയേറിയ യുവ പ്രൊഫഷണലുകളുടെ കരിയറാണ് പ്രതിസന്ധിയിലാകുന്നത്. വിദേശ ജോലി എന്ന സ്വപ്നവുമായി ബാങ്ക് വായ്പയെടുത്തും കുടുംബ സ്വത്ത് പണയം വെച്ചും വിസയെടുത്ത യുവാക്കൾക്ക് മുന്നിൽ കരിയർ ബ്രേക്കുകളും പിരിച്ചുവിടലുകളും വലിയൊരു ചോദ്യചിഹ്നമായി മാറുന്നു. ഇത് കേരളത്തിലെ ഉന്നത വിദ്യാഭ്യാസ മേഖലയെയും യുവാക്കളുടെ തൊഴിൽ സ്വപ്നങ്ങളെയും നിരാശയുടെ നിഴലിലാഴ്ത്തുന്നു.
പശ്ചിമേഷ്യയിൽ സമാധാനം പുലരേണ്ടത് കേവലം ലോകത്തിന്റെ ആവശ്യമല്ല, മറിച്ച് കേരളത്തിന്റെ അതിജീവനത്തിന്റെ പ്രശ്നമാണ്. ഗൾഫിനെ മാത്രം അമിതമായി ആശ്രയിക്കുന്ന നമ്മുടെ വികസന മാതൃകയെക്കുറിച്ച് ഗൗരവമായി പുനർചിന്തിക്കേണ്ട സമയം അതിക്രമിച്ചിരിക്കുന്നു. വിദേശത്തുനിന്നുള്ള പണമൊഴുക്ക് എപ്പോൾ വേണമെങ്കിലും നിലയ്ക്കാം എന്ന യാഥാർത്ഥ്യം ഉൾക്കൊണ്ടുകൊണ്ട്, സ്വന്തം മണ്ണിൽ കൂടുതൽ വ്യവസായങ്ങളും ഉൽപ്പാദന മേഖലകളും ഐടി സംരംഭങ്ങളും തൊഴിലവസരങ്ങളും സൃഷ്ടിക്കേണ്ടതുണ്ട്. തിരിച്ചെത്തുന്ന പ്രവാസികളുടെ പ്രവൃത്തിപരിചയവും മൂലധനവും നാടിന്റെ വികസനത്തിനായി വിനിയോഗിക്കാൻ സാധിക്കണം. സുരക്ഷിതമായ ഒരു ബദൽ സാമ്പത്തിക അടിത്തറ കെട്ടിപ്പടുക്കേണ്ട സമയം അതിക്രമിച്ചിരിക്കുന്നുവെന്ന് ഈ കനൽക്കാലം നമ്മെ ഓർമ്മിപ്പിക്കുന്നു; കാരണം, അക്കരെയെരിയുന്ന ആ തീ കെടുത്തിയാൽ മാത്രമേ ഇക്കരെയുള്ള നമ്മുടെ വീടുകളിൽ അടുപ്പ് പുകയുകയുള്ളൂ.
The shadow of war in the desert; The silenced dreams of expatriates and Kerala in crisis
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
