തിരുവനന്തപുരം: പാങ്ങപ്പാറയിൽ പതിനേഴുകാരനായ അഭിരാം കൊല്ലപ്പെട്ട കേസിൽ നിർണായക വഴിത്തിരിവുകളുമായി അന്വേഷണ സംഘം. മുൻവൈരാഗ്യത്തെ തുടർന്ന് അഭിരാമിന്റെ സുഹൃത്തിനെ കൊലപ്പെടുത്താൻ പദ്ധതിയിട്ട പ്രതികൾ, തുടർന്നുണ്ടായ തർക്കത്തിനൊടുവിൽ അഭിരാമിനെ കൊലപ്പെടുത്തുകയായിരുന്നുവെന്ന് പോലീസ് കണ്ടെത്തി. സംഭവവുമായി ബന്ധപ്പെട്ട് പ്രതിയുടെ മുൻ പെൺസുഹൃത്തായ മണക്കാട് സ്വദേശിനി അനന്തയെ (18) കേസിൽ മൂന്നാം പ്രതിയായി ഉൾപ്പെടുത്തി. ഐടിഐ വിദ്യാർത്ഥിനിയായ ഇവരുടെ അറസ്റ്റ് ഉടൻ രേഖപ്പെടുത്തുമെന്നാണ് വിവരം. കൊലപാതകം നടത്തിയ പതിനേഴുകാരനെയും കൃത്യത്തിന് സഹായം നൽകിയ ഗുണ്ടാപ്പട്ടികയിലുള്ള ഉമറിനെയും പോലീസ് നേരത്തെ കസ്റ്റഡിയിലെടുത്തിരുന്നു.
പോലീസ് അന്വേഷണത്തിൽ വ്യക്തമായ വിവരങ്ങൾ പ്രകാരം പ്രണയപ്പകയാണ് അരുംകൊലയിലേക്ക് നയിച്ചത്. മുഖ്യപ്രതിയായ പതിനേഴുകാരനുമായി അകന്ന ശേഷം അനന്ത അഭിരാമിന്റെ സുഹൃത്തുമായി പ്രണയത്തിലാവുകയായിരുന്നു. അടുത്തിടെ പുതിയ കാമുകനൊപ്പമുള്ള ചിത്രം പെൺകുട്ടി മുൻ കാമുകന് അയച്ചുകൊടുത്തത് ഇയാളിൽ കടുത്ത പകയ്ക്ക് കാരണമായി. തുടർന്ന് പുതിയ കാമുകനെ വധിക്കാൻ തീരുമാനിച്ച പ്രതി, പെൺകുട്ടിയുടെ ഫോൺ കൈക്കലാക്കി ഇൻസ്റ്റാഗ്രാം വഴി സന്ദേശമയച്ചാണ് അഭിരാമിനെ പാങ്ങപ്പാറയിലേക്ക് വിളിച്ചുവരുത്തിയത്. അഭിരാം വഴി സുഹൃത്തിനെ അവിടേക്ക് എത്തിക്കുകയായിരുന്നു പ്രതിയുടെ പ്രധാന ലക്ഷ്യം.
പാങ്ങപ്പാറയിലെത്തിയ അഭിരാമിനോട് സുഹൃത്തിനെ വിളിച്ചുവരുത്താൻ ആവശ്യപ്പെട്ടെങ്കിലും അഭിരാം അതിന് വഴങ്ങിയില്ല. ഇത് ഇരുകൂട്ടരും തമ്മിൽ രൂക്ഷമായ വാക്കുതർക്കത്തിന് ഇടയാക്കി. ഇതിനിടെ പിതാവ് ഫോണിൽ വിളിച്ചപ്പോൾ സംസാരിക്കാൻ അനുവദിക്കാതെ തടസ്സപ്പെടുത്തിയതോടെ അഭിരാം അവിടെനിന്ന് ഓടി രക്ഷപ്പെടാൻ ശ്രമിച്ചു. തുടർന്ന് ക്രൂരമായി മർദ്ദിച്ച ശേഷം ബെൽറ്റ് കഴുത്തിൽ മുറുക്കി കൊലപ്പെടുത്തുകയായിരുന്നുവെന്ന് പ്രതി പോലീസിനോട് സമ്മതിച്ചു. കൊലപാതകത്തിന് ശേഷം ഗുണ്ടയായ ഉമറിനെ പ്രതി സ്ഥലത്തേക്ക് വിളിച്ചുവരുത്തുകയായിരുന്നു. കൊലപാതകത്തിന് പിന്നിലെ ഗൂഢാലോചനയിൽ പെൺകുട്ടിയുടെ പങ്കിനെക്കുറിച്ചും പോലീസ് വിശദമായ അന്വേഷണം ആരംഭിച്ചിട്ടുണ്ട്.
അതേസമയം, സംഭവത്തിന്റെ പ്രാരംഭ ഘട്ടത്തിൽ പോലീസിന്റെ ഭാഗത്തുനിന്ന് ഗുരുതരമായ വീഴ്ച സംഭവിച്ചതായി അഭിരാമിന്റെ പിതാവ് മധു ആരോപിച്ചു. സംഭവദിവസം രാത്രി കസ്റ്റഡിയിലെടുത്ത ശേഷം പ്രതിയെ വിട്ടയച്ചതാണ് യഥാർത്ഥത്തിൽ എന്താണ് സംഭവിച്ചതെന്ന് കൃത്യസമയത്ത് തിരിച്ചറിയാൻ വൈകിച്ചതെന്നും, എന്നാൽ പിന്നീട് പോലീസ് സമഗ്രമായ അന്വേഷണം നടത്തിയെന്നും കുടുംബം വ്യക്തമാക്കി. അവസാനം ഫോൺ ചെയ്തപ്പോൾ മകൻ അതീവ ഭയത്തോടെയാണ് സംസാരിച്ചതെന്നും പിതാവ് കൂട്ടിച്ചേർത്തു.
Sreekaryam Abhiram Murder Case
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
