മുതിർന്ന പൗരന്മാർക് സന്തോഷ വാർത്ത
ഫെഡറൽ കൺസർവേറ്റിവ് പാർട്ടി തിരഞ്ഞെടുക്കപ്പെട്ടാൽ ജോലി ചെയ്യുന്ന മുതിർന്ന പൗരന്മാർക്ക് നികുതി ആശ്വാസം നൽകുമെന്ന് വാഗ്ദാനം ചെയ്തിരിക്കുകയാണ് പാർട്ടി നേതാവ് പിയറി പൊയിലീവ്ര. മുതിർന്ന പൗരന്മാർക്ക് 34,000 ഡോളർ വരെ നികുതി രഹിതമായി സമ്പാദിക്കാൻ അനുവദിക്കുന്ന പദ്ധതികൾ പ്രഖ്യാപിച്ചു, ഇത് നിലവിലെ നികുതി ഇളവ് പരിധിയിൽ നിന്നും 10,000 ഡോളറിന്റെ വർദ്ധനവാണ്. ഈ പ്രഖ്യാപനം മുതിർന്ന പൗരന്മാരുടെ സാമ്പത്തിക സ്ഥിതി മെച്ചപ്പെടുത്തുന്നതിനും റിട്ടയർമെന്റിന് ശേഷവും ജോലി ചെയ്യാൻ പ്രോത്സാഹിപ്പിക്കുന്നതിനും ലക്ഷ്യമിടുന്നു.
പാർട്ടി RRSP (റിട്ടയർമെന്റ് സേവിംഗ്സ് പ്ലാൻ) പിൻവലിക്കലിനുള്ള കാലാവധി 71 വയസ്സിൽ നിന്ന് 73 വയസ്സിലേക്ക് നീട്ടുന്നതിനുള്ള നിർദ്ദേശവും മുന്നോട്ട് വച്ചിട്ടുണ്ട്. ഇത് മുതിർന്ന കാനഡക്കാർക്ക് അവരുടെ റിട്ടയർമെന്റ് സമ്പാദ്യം കൂടുതൽ കാലം വളരാൻ അനുവദിക്കുകയും, അതുവഴി അവരുടെ സാമ്പത്തിക സുരക്ഷ വർദ്ധിപ്പിക്കുകയും ചെയ്യും. റിട്ടയർമെന്റ് ആസൂത്രണത്തിന് കൂടുതൽ സൗകര്യം നൽകുന്ന ഈ നിർദ്ദേശം മുതിർന്ന പൗരന്മാരുടെ സാമ്പത്തിക ആവശ്യങ്ങൾ മികച്ച രീതിയിൽ കൈകാര്യം ചെയ്യുന്നതിന് സഹായകരമാകും.
പൊയിലീവ്ര ഓൾഡ് ഏജ് സെക്യൂരിറ്റി ഗാരന്റീഡ് ഇൻകം സപ്ലിമെന്റ്, കാനഡ പെൻഷൻ പ്ലാൻ എന്നിവയുടെ റിട്ടയർമെന്റ് പ്രായം 65 വയസ്സിൽ തന്നെ നിലനിർത്തുമെന്നും ഉറപ്പു നൽകി. ഈ പ്രതിജ്ഞാബദ്ധത കാനഡയിലെ മുതിർന്ന പൗരന്മാർക്ക് അവരുടെ റിട്ടയർമെന്റ് ആസൂത്രണത്തിൽ സ്ഥിരത ഉറപ്പാക്കുന്നു. ഭാവിയിലെ സർക്കാർ മാറ്റങ്ങൾ മൂലം റിട്ടയർമെന്റ് പ്രായം വർധിക്കപ്പെടും എന്ന മുതിർന്ന പൗരന്മാർക്കിടയിലെ ആശങ്കകൾക്ക് ഒരു പരിധി വരെ ആശ്വാസം നൽകുന്ന വാഗ്ദാനമാണ് ഫെഡറൽ കൺസർവേറ്റിവ് പാർട്ടി നൽകിയത്.
