ടൊറന്റോ: കാനഡയിലെ ഏറ്റവും വലിയ ഇന്ത്യൻ സാംസ്കാരിക-ഭക്ഷ്യ മേളകളിലൊന്നായ ‘ടേസ്റ്റ് ഓഫ് ഇന്ത്യ’ ഫെസ്റ്റിവലിന്റെ ഒൻപതാം വാർഷികം ഓഗസ്റ്റ് ഒന്നു മുതൽ രണ്ട് വരെ ടൊറന്റോയിലെ പ്രശസ്തമായ നാഥൻ ഫിലിപ്സ് സ്ക്വയറിൽ വിപുലമായ രീതിയിൽ അരങ്ങേറും. ഇന്ത്യൻ ഭക്ഷണ വൈവിധ്യങ്ങളെയും സമ്പന്നമായ കലാപാരമ്പര്യത്തെയും കാനഡയിലെ ബഹുസാംസ്കാരിക സമൂഹത്തിന് മുന്നിൽ അനാവരണം ചെയ്യുക എന്ന ലക്ഷ്യത്തോടെയാണ് ഇത്തവണയും മേള സംഘടിപ്പിക്കുന്നത്.
രാജ്യത്തിന്റെ വിവിധ സംസ്ഥാനങ്ങളിൽ നിന്നുള്ള തനത് രുചികൾ പരിചയപ്പെടുത്തുന്ന നിരവധി ഭക്ഷണ സ്റ്റാളുകൾ മേളയുടെ പ്രധാന ആകർഷണമായിരിക്കും. ഭക്ഷണത്തിനപ്പുറം സന്ദർശകർക്കായി തത്സമയ സംഗീത പരിപാടികൾ, ആകർഷകമായ നൃത്തങ്ങൾ, വൈവിധ്യമാർന്ന സാംസ്കാരിക അവതരണങ്ങൾ, കുടുംബങ്ങൾക്ക് ഒത്തുചേരാനും ആസ്വദിക്കാനുമുള്ള പ്രത്യേക വിനോദ സംവിധാനങ്ങൾ, ഷോപ്പിംഗ് സ്റ്റാളുകൾ എന്നിവയും ഒരുക്കിയിട്ടുണ്ട്. സ്കൂൾ ഓഫ് ഫ്ലേവേഴ്സും യങ് കനേഡിയൻ അലയൻസും സംയുക്തമായാണ് ഇത്തവണത്തെ പരിപാടികൾ ഏകോപിപ്പിക്കുന്നത്. ഉച്ചയ്ക്ക് 12 മണി മുതൽ രാത്രി 11 മണി വരെ നീണ്ടുനിൽക്കുന്ന ഈ സാംസ്കാരിക സംഗമത്തിലേക്ക് ഏവർക്കും സൗജന്യമായി പ്രവേശനം അനുവദിച്ചിട്ടുണ്ട്.
ആയിരക്കണക്കിന് സന്ദർശകരാണ് മേളയുടെ ഭാഗമാകാൻ ടൊറന്റോയിൽ എത്തുമെന്നാണ് സംഘാടകർ പ്രതീക്ഷിക്കുന്നത്. കാനഡയിലെ ഇന്ത്യൻ പ്രവാസി സമൂഹത്തിന്റെ വലിയൊരു ആഘോഷമായി മാറുന്ന ഈ മേള, ഇരുരാജ്യങ്ങളും തമ്മിലുള്ള സാംസ്കാരിക വിനിമയത്തിന് വലിയൊരു വേദിയായിരിക്കും.
Taste of India Toronto is a premier Indian cultural and food festival in Canada
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
