തമിഴ്നാട് മുഖ്യമന്ത്രി എം.കെ. സ്റ്റാലിനും ഡിഎംകെയ്ക്കുമെതിരെ രൂക്ഷമായ അഴിമതി, കുടുംബവാഴ്ച ആരോപണങ്ങളുമായി പ്രധാനമന്ത്രി നരേന്ദ്ര മോദി. ഡിഎംകെയുടെ ഭരണ മാതൃക “കുടുംബത്തിനുവേണ്ടി, കുടുംബം വഴി” എന്നതാണെന്നും തമിഴ്നാടിനെ കൊള്ളയടിക്കാൻ ആ കുടുംബത്തിനുള്ളിൽ തന്നെ മത്സരമാണെന്നും എൻഡിഎയുടെ തിരഞ്ഞെടുപ്പ് റാലിയെ അഭിസംബോധന ചെയ്തുകൊണ്ട് അദ്ദേഹം ആരോപിച്ചു. കഴിഞ്ഞ അഞ്ച് വർഷത്തിനിടെ തമിഴ്നാട്ടിൽ ഓരോ വ്യക്തിയുടെയും കടം വർധിക്കുമ്പോൾ ഡിഎംകെ കുടുംബം മാത്രം സമ്പന്നരാകുകയാണെന്നും മോദി കുറ്റപ്പെടുത്തി.
മുഖ്യമന്ത്രിയും ഉപമുഖ്യമന്ത്രിയും ഡൽഹിയിലെ പ്രമുഖ എംപിയും ഒരേ കുടുംബത്തിൽ നിന്നുള്ളവരാണെന്ന് ചൂണ്ടിക്കാട്ടിയ പ്രധാനമന്ത്രി, സിനിമയും മാധ്യമങ്ങളും പോലും ഈ കുടുംബത്തിന്റെ നിയന്ത്രണത്തിലാണെന്ന് പറഞ്ഞു. മുതിർന്ന നേതാക്കൾ വരെ കുടുംബത്തിലെ ഇളയ അംഗങ്ങൾക്ക് വഴങ്ങേണ്ടി വരുന്ന അവസ്ഥയാണ് സംസ്ഥാനത്തുള്ളത്. മകനോ മരുമകനോ നയിക്കുന്ന രാഷ്ട്രീയമല്ല, വ്യക്തമായ കാഴ്ചപ്പാടുള്ള ഭരണമാണ് തമിഴ്നാടിന് ആവശ്യമെന്നും, കേന്ദ്രത്തിലെ കോൺഗ്രസ്-ഡിഎംകെ സഖ്യത്തിന് സമാനമായ അഴിമതി ബന്ധങ്ങളാണ് ഇവർക്കുള്ളതെന്നും അദ്ദേഹം കൂട്ടിച്ചേർത്തു.
തമിഴ്നാടിന്റെ വികസനത്തിന് കേന്ദ്ര സർക്കാർ നൽകുന്ന പിന്തുണയെക്കുറിച്ചും മോദി പ്രസംഗത്തിൽ വിശദീകരിച്ചു. കഴിഞ്ഞ പതിനൊന്ന് വർഷത്തിനിടെ 14 ലക്ഷം കോടിയിലധികം രൂപയാണ് വിവിധ പദ്ധതികളിലൂടെയും നികുതി വിഹിതമായും കേന്ദ്രം തമിഴ്നാടിന് നൽകിയത്. കോൺഗ്രസ് ഭരണകാലത്തെ അപേക്ഷിച്ച് ഇത് വളരെ കൂടുതലാണെന്ന് അദ്ദേഹം അവകാശപ്പെട്ടു. രാഷ്ട്രീയ പശ്ചാത്തലമില്ലാതിരുന്നിട്ടും കഠിനാധ്വാനത്തിലൂടെ ഉയർന്നുവന്ന സി.പി. രാധാകൃഷ്ണനെ പോലുള്ളവരുടെ സേവനങ്ങൾ തമിഴ് വികസനത്തിന് മാതൃകയാണെന്നും അദ്ദേഹം ഓർമ്മിപ്പിച്ചു.
Stalin is looting Tamil Nadu by giving it ‘share’; Prime Minister Narendra Modi slams DMK!
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
