എസ്.ഐ.ആറിൽ പേര് വെട്ടിയോ? വിഷമിക്കേണ്ട, തിരികെ ചേർക്കാൻ വഴിയുണ്ട്; പ്രവാസികൾ അറിയേണ്ടതെല്ലാം!

തിരുവനന്തപുരം: സംസ്ഥാനത്തെ വോട്ടർപട്ടികയുടെ അന്തിമ പുതുക്കൽ നടപടികൾ (SIR) പൂർത്തിയായിക്കഴിഞ്ഞു. ശനിയാഴ്ച പ്രസിദ്ധീകരിച്ച അന്തിമ വോട്ടർപട്ടികയിൽ പേര് ഉൾപ്പെടാത്തവർക്ക് ആശങ്കപ്പെടേണ്ടതില്ലെന്ന് തിരഞ്ഞെടുപ്പ് കമ്മീഷൻ അറിയിച്ചു. വോട്ടെടുപ്പിന് മുന്നോടിയായി പത്രിക സമർപ്പിക്കാനുള്ള അവസാന തീയതി വരെ പുതിയ വോട്ടർമാർക്ക് പേര് ചേർക്കാൻ അവസരമുണ്ട്. മുൻപ് വോട്ട് ചെയ്തിട്ടുള്ളവരാണെങ്കിലും പട്ടികയിൽ പേരില്ലെങ്കിൽ പുതിയ വോട്ടറായി തന്നെ അപേക്ഷ സമർപ്പിക്കേണ്ടതാണ്. എന്നാൽ, ഇ-റോൾ അപ്ഡേഷൻ നടപടികൾക്ക് ചുരുങ്ങിയത് 10 ദിവസമെങ്കിലും ആവശ്യമായതിനാൽ അവസാന നിമിഷം വരെ കാത്തുനിൽക്കാതെ അപേക്ഷിക്കണമെന്ന് അധികൃതർ നിർദ്ദേശിക്കുന്നു.

മുഖ്യ തിരഞ്ഞെടുപ്പ് ഓഫീസറുടെ വെബ്‌സൈറ്റ് (ceokerala.gov.in), voters.eci.gov.in പോർട്ടൽ അല്ലെങ്കിൽ ‘ecinet’ മൊബൈൽ ആപ്പ് എന്നിവ വഴി ഓൺലൈനായി അപേക്ഷിക്കാം. 2026 ജനുവരി ഒന്നിന് 18 വയസ്സ് പൂർത്തിയായവർക്കും, അതിന് ശേഷം പ്രായപൂർത്തിയാകുന്നവർക്കും മുൻകൂറായി അപേക്ഷ നൽകാവുന്നതാണ്. 17 വയസ്സ് തികഞ്ഞവർ മുൻകൂറായി അപേക്ഷ നൽകിയാൽ 18 വയസ്സ് പൂർത്തിയാകുന്ന മുറയ്ക്ക് അവരെ പട്ടികയിൽ ഉൾപ്പെടുത്തും. രേഖകളുടെ സുരക്ഷയും വേഗത്തിലുള്ള പരിശോധനയും പരിഗണിച്ച് ഓൺലൈൻ അപേക്ഷകളാണ് തിരഞ്ഞെടുപ്പ് കമ്മീഷൻ പ്രോത്സാഹിപ്പിക്കുന്നത്. പുതിയ അപേക്ഷകർക്കായി ഫോറം 6-ഉം, പ്രവാസികൾക്കായി ഫോറം 6-എയുമാണ് നീക്കിവെച്ചിരിക്കുന്നത്.

നിലവിലെ പട്ടികയിൽ തിരുത്തലുകൾ വരുത്താനോ വിലാസം മാറ്റാനോ ആഗ്രഹിക്കുന്നവർക്ക് ഫോറം 8 ഉപയോഗിക്കാം. വോട്ടർ ഐ.ഡിയുടെ ഡ്യൂപ്ലിക്കേറ്റ് കോപ്പി എടുക്കുന്നതിനും ഭിന്നശേഷി വിഭാഗത്തിൽ പേര് രേഖപ്പെടുത്തുന്നതിനും ഈ ഫോറം സഹായകരമാണ്. പോളിങ് ബൂത്തുകളിൽ വീൽചെയർ ഉൾപ്പെടെയുള്ള സൗകര്യങ്ങൾ ഉറപ്പാക്കാൻ ഭിന്നശേഷി വിഭാഗത്തിൽ പേര് ചേർക്കുന്നത് അത്യാവശ്യമാണ്. പുതിയ അപേക്ഷകർക്ക് പ്രത്യേക ഹിയറിംഗ് നടപടികൾ ഉണ്ടായിരിക്കില്ല. പകരം, ജനനത്തീയതി തെളിയിക്കുന്നതിന് എസ്.എസ്.എൽ.സി സർട്ടിഫിക്കറ്റോ ജനന സർട്ടിഫിക്കറ്റോ, വിലാസം തെളിയിക്കാൻ ആധാർ കാർഡോ അപ്‌ലോഡ് ചെയ്താൽ മതിയാകും.

ഇരട്ട വോട്ട് തടയുന്നതിനായി കർശന നടപടികളാണ് കമ്മീഷൻ സ്വീകരിച്ചിരിക്കുന്നത്. രണ്ടിടത്ത് വോട്ടുള്ളവർ ഫോറം 7 വഴി അത് ഒഴിവാക്കാൻ അപേക്ഷിക്കണം. തിരഞ്ഞെടുപ്പ് സമയത്ത് രാഷ്ട്രീയ പാർട്ടികൾക്കും പ്രിസൈഡിംഗ് ഓഫീസർമാർക്കും ഇരട്ട വോട്ടുള്ളവരുടെ പട്ടിക (ASD List) കൈമാറും. പുതുതായി പേര് ചേർക്കുന്നവർക്ക് തപാൽ വഴി വോട്ടർ ഐ.ഡി കാർഡ് ലഭിക്കുമെങ്കിലും, കാർഡ് കൈവശമില്ലാത്തവർക്കും കമ്മീഷൻ അംഗീകരിച്ചിട്ടുള്ള മറ്റ് തിരിച്ചറിയൽ രേഖകൾ ഉപയോഗിച്ച് വോട്ട് രേഖപ്പെടുത്താവുന്നതാണ്. അടുത്ത നിയമസഭാ തിരഞ്ഞെടുപ്പിൽ വോട്ടവകാശം വിനിയോഗിക്കാൻ അർഹരായ മുഴുവൻ ആളുകളും ഈ അവസരം പ്രയോജനപ്പെടുത്തണമെന്ന് മുഖ്യ തിരഞ്ഞെടുപ്പ് ഓഫീസർ അറിയിച്ചു.

Missed the final voter list? Still time to register! Learn how to add your name and ensure you can vote in the next election. Easy online process.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt