മോൺട്രിയൽ: പകൽ സമയത്ത് പെട്ടെന്ന് രാത്രി വീണതുപോലൊരു അനുഭവമായിരുന്നു ക്യുബെക്കിലെ ലാ ട്യൂക്ക് (La Tuque) നഗരവാസികൾക്ക് ചൊവ്വാഴ്ച. രാവിലെ പത്ത് മണിയോടെ വരെ പുകമഞ്ഞിൽ മൂടിയിരുന്ന ആകാശം ഏതാനും നിമിഷങ്ങൾക്കുള്ളിൽ കറുത്ത മേഘങ്ങളാൽ പൂർണമായി മൂടപ്പെട്ടു. പിന്നാലെ ശക്തമായ ഇടിമിന്നലും കാറ്റും ആരംഭിച്ചതോടെ നഗരം മധ്യരാത്രിയിലെന്ന പോലെ ഇരുണ്ടു. അപൂർവമായ ഈ കാഴ്ച ക്യാമറയിൽ പകർത്താൻ നിരവധി പേർ വീടുകൾക്കും കടകൾക്കും പുറത്തേക്കിറങ്ങി.
“സൂര്യൻ അസ്തമിക്കുമ്പോൾ മാത്രം തെളിയാറുള്ള തെരുവ് വിളക്കുകൾ എല്ലാം ഒരുമിച്ച് തെളിഞ്ഞു. പകൽ സമയത്ത് ഇങ്ങനെ ഇരുട്ട് വീഴുന്നത് ജീവിതത്തിൽ ആദ്യമായാണ് കാണുന്നത്,” സംഭവത്തിന്റെ ദൃശ്യങ്ങൾ പകർത്തിയ താമസക്കാരിയായ മേരി പിയർ മെയിൽഹോട്ട് പറഞ്ഞു. രാജ്യത്തിന്റെ വടക്കൻ മേഖലകളിലെ കാട്ടുതീയിൽ നിന്നുയർന്ന കനത്ത പുക മണിക്കൂറുകളായി ലാ ട്യൂക്കിന്റെ ആകാശത്ത് തങ്ങി നിന്നിരുന്നു. അതിനിടെ ഇടിമിന്നൽ മേഘങ്ങൾ രൂപപ്പെട്ടതോടെ അന്തരീക്ഷം കൂടുതൽ സാന്ദ്രമാവുകയും, പകൽ സമയത്ത് അസാധാരണമായ ഇരുട്ട് അനുഭവപ്പെടുകയും ചെയ്തതായി വിദഗ്ധർ വിലയിരുത്തുന്നു. ഇതേ പുകമഞ്ഞ് മോൺട്രിയലിലും വ്യാപിച്ച് സൂര്യോദയ സമയത്ത് നഗരം മഞ്ഞകലർന്ന മൂടൽമഞ്ഞിൽ പൊതിഞ്ഞിരുന്നു.
മോൺട്രിയൽ സന്ദർശിച്ച അമേരിക്കൻ വിനോദസഞ്ചാരികളായ സാറ ലെറ്റ്സ്കിയും ഭർത്താവ് ബിലും ഈ കാഴ്ചയെ “ഭയപ്പെടുത്തുന്ന അനുഭവം” എന്നാണ് വിശേഷിപ്പിച്ചത്. അതേസമയം, നഗരത്തിൽ ജോലി ചെയ്തിരുന്ന ഫർണിച്ചർ മൂവർ മാർക്ക് ലാറാം പറഞ്ഞു, “ചൂടും പുകയും കാരണം ശ്വസിക്കാൻ പോലും ബുദ്ധിമുട്ടായിരുന്നു. പതുക്കെ ജോലി ചെയ്തില്ലെങ്കിൽ തളർന്നുവീഴുന്ന അവസ്ഥയായിരുന്നു.”
അതേസമയം, കാട്ടുതീയിൽ നിന്നുള്ള പുക ഒന്റാറിയോയിലും മാനിറ്റോബയിലും വായുവിന്റെ ഗുണനിലവാരം ഗണ്യമായി മോശമാക്കിയതായി എൻവയോൺമെന്റ് കാനഡ മുന്നറിയിപ്പ് നൽകി. പുകയുടെ സാന്ദ്രത കൂടുമ്പോൾ ആരോഗ്യപ്രശ്നങ്ങളുടെ സാധ്യതയും ഉയരുമെന്നും, കഴിയുന്നത്ര സമയം വീടിനുള്ളിൽ തുടരുകയും കായികപരിശീലനങ്ങൾ ഉൾപ്പെടെയുള്ള പുറംപ്രവർത്തനങ്ങൾ മാറ്റിവയ്ക്കുകയോ കുറയ്ക്കുകയോ ചെയ്യണമെന്നും അധികൃതർ നിർദേശിച്ചു.
Severe air pollution; Quebec blanketed in smog.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
