രാമേശ്വരം: ഇന്ത്യയ്ക്കും ശ്രീലങ്കയ്ക്കും ഇടയിലുള്ള പാൽക് കടലിടുക്ക് പത്തു മണിക്കൂറിനുള്ളിൽ നീന്തിക്കടന്ന് ഏഴുവയസ്സുകാരൻ ലോക റെക്കോർഡ് സ്വന്തമാക്കി. ജാർഖണ്ഡിലെ റാഞ്ചി സ്വദേശിയായ ഇഷാങ്ക് സിംഗാണ് അതിസാഹസികമായ ഈ നേട്ടം കൈവരിച്ചത്. ശ്രീലങ്കയിലെ തലൈമന്നാറിൽ നിന്ന് തമിഴ്നാട്ടിലെ ധനുഷ്കോടിക്ക് സമീപമുള്ള അരിചൽമുന വരെയുള്ള 29 കിലോമീറ്റർ ദൂരമാണ് ഈ ബാലൻ നീന്തി പൂർത്തിയാക്കിയത്.
വെള്ളിയാഴ്ച പുലർച്ചെ നാല് മണിയോടെയാണ് തലൈമന്നാറിൽ നിന്ന് ഇഷാങ്ക് നീന്തൽ ആരംഭിച്ചത്. കടലിലെ ശക്തമായ അടിയൊഴുക്കുകളെയും വലിയ തിരമാലകളെയും പ്രവചനാതീതമായ കാലാവസ്ഥയെയും അതിജീവിച്ച് ഒൻപത് മണിക്കൂർ 50 മിനിറ്റ് കൊണ്ടാണ് ലക്ഷ്യസ്ഥാനത്തെത്തിയത്. ഉച്ചയ്ക്ക് 1:50-ഓടെ ധനുഷ്കോടിയിലെ അരിചൽമുനയിൽ എത്തിയ ഇഷാങ്കിനെ ഉദ്യോഗസ്ഥരും നാട്ടുകാരും ചേർന്ന് ആവേശപൂർവ്വം സ്വീകരിച്ചു. 2019-ൽ പത്ത് വയസ്സുകാരനായ ജയ് ജശ്വന്ത് സ്വന്തമാക്കിയ പത്ത് മണിക്കൂർ 30 മിനിറ്റിന്റെ റെക്കോർഡാണ് ഇഷാങ്ക് ഇതോടെ തിരുത്തിക്കുറിച്ചത്.
ഇഷാങ്കിന്റെ ചരിത്രപരമായ ഈ നേട്ടത്തെ ജാർഖണ്ഡ് മുഖ്യമന്ത്രി ഹേമന്ത് സോറൻ പ്രശംസിച്ചു. ഇഷാങ്കിന്റേത് അസാധാരണ പ്രതിഭയാണെന്നും ഈ കുഞ്ഞു നീന്തൽക്കാരൻ രാജ്യത്തിന് തന്നെ അഭിമാനമായി മാറിയെന്നും അദ്ദേഹം എക്സിൽ കുറിച്ചു. കൃത്യമായ പരിശീലനവും കഠിനാധ്വാനവുമാണ് ഇത്ര ചെറിയ പ്രായത്തിൽ ഇത്തരമൊരു കഠിനമായ ദൗത്യം വിജയകരമായി പൂർത്തിയാക്കാൻ ഇഷാങ്കിന് കരുത്തായത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Seven-year-old Ishank Singh sets world record by swimming across Palk Strait
