നിരവധി മരണങ്ങൾക്കും ദുരന്തങ്ങൾക്കും പിന്നിൽ സെപ്സിസ് എന്ന നിശ്ശബ്ദ കൊലയാളിയാണെന്ന് മുന്നറിയിപ്പ്. ഈ രോഗം അതിവേഗം മരണത്തിലേക്ക് നയിക്കുന്ന ഒന്നാണ്. എന്നാൽ, കൃത്യസമയത്ത് ഇത് തിരിച്ചറിയാനും പ്രതിരോധിക്കാനും ആവശ്യമായ പരിശീലനം ആരോഗ്യപ്രവർത്തകർക്ക് ലഭിക്കുന്നില്ലെന്ന് കനേഡിയൻ ഗവേഷകർ പറയുന്നു. “കാനഡയിൽ ഡോക്ടർമാരായി പരിശീലനം നേടുന്ന എല്ലാവർക്കും സെപ്സിസ് എന്താണെന്ന് മനസ്സിലാക്കേണ്ടത് അത്യാവശ്യമാണ്,” ഗവേഷകർ ചൂണ്ടിക്കാട്ടി.
എന്നാൽ നിലവിൽ അങ്ങനെയല്ല,” ടൊറന്റോയിലെ ക്രിട്ടിക്കൽ കെയർ ഫിസിഷ്യനായ ഡോ. കാളി ബാരറ്റ് പറഞ്ഞു. സെപ്സിസുമായി ബന്ധപ്പെട്ടുള്ള നയങ്ങൾ, മാർഗ്ഗനിർദ്ദേശങ്ങൾ, നിലവാരം എന്നിവയെക്കുറിച്ച് കനേഡിയൻ ഗവേഷകരുടെ സംഘം നടത്തിയ പഠനത്തിൽ ഒന്റാറിയോ ഉൾപ്പെടെയുള്ള മിക്ക പ്രവിശ്യകൾക്കും ആരോഗ്യപ്രവർത്തകർക്ക് പിന്തുടരാൻ കൃത്യമായ മാർഗ്ഗനിർദ്ദേശങ്ങളില്ലെന്ന് കണ്ടെത്തി.
അണുബാധയെ ചെറുക്കാൻ ശരീരം ശ്രമിക്കുമ്പോൾ അത് സെപ്സിസിന് കാരണമാകും. ഈ അവസ്ഥയിൽ ആന്തരികാവയവങ്ങൾക്ക് ഗുരുതരമായ കേടുപാടുകൾ സംഭവിക്കാനും മരണം സംഭവിക്കാനും സാധ്യതയുണ്ട്. സെപ്സിസ് അതിവേഗം വഷളാകാൻ സാധ്യതയുള്ള ഒരു അവസ്ഥയാണ്. രോഗനിർണ്ണയവും ആൻറിബയോട്ടിക് ചികിത്സയും അതിജീവനത്തിന് നിർണായകമാണെന്ന് ഡോ. ബാരറ്റ് പറയുന്നു. “ആളുകൾ മിനിറ്റുകൾക്കുള്ളിൽ സാധാരണ അവസ്ഥയിൽ നിന്ന് ഗുരുതരാവസ്ഥയിലേക്ക് മാറിയേക്കാം,” അവർ കൂട്ടിച്ചേർത്തു. 2020-ലെ ഒരു റിപ്പോർട്ട് അനുസരിച്ച്, കാനഡയിൽ പ്രതിവർഷം 75,000 സെപ്സിസ് കേസുകളാണ് റിപ്പോർട്ട് ചെയ്യപ്പെടുന്നത്. ഇതിൽ ശരാശരി 18,000 മരണങ്ങളും സംഭവിക്കുന്നു.
കഴിഞ്ഞ കുറച്ച് മാസങ്ങളായി രണ്ട് ആശുപത്രികളിൽ പ്രസവത്തെ തുടർന്ന് ഭാര്യമാരെ നഷ്ടപ്പെട്ട ഭർത്താക്കന്മാരുമായി മാധ്യമങ്ങൾ സംസാരിച്ചു. രണ്ട് കേസുകളിലും മരണകാരണം സെപ്സിസുമായി ബന്ധപ്പെട്ടായിരുന്നു. കഴിഞ്ഞ ഓഗസ്റ്റിൽ, തന്റെ ഭാര്യയെ നഷ്ടപ്പെട്ട ബ്രാംപ്ടണിലെ ഗുരീന്ദർ സിദ്ദു, താനും ഭാര്യയും സഹായത്തിനായി യാചിച്ചിട്ടും ഒരു വിദ്യാർത്ഥി നഴ്സും ഡോക്ടർമാരുടെ സംഘവും അവരുടെ ആവശ്യങ്ങൾ ഗൗരവമായി എടുത്തില്ലെന്ന് പറഞ്ഞു. അദ്ദേഹത്തിന്റെ ഭാര്യയുടെ കാലിൽ അണുബാധ ദൃശ്യമായതിന് ശേഷം മാത്രമാണ് ചികിത്സ ആരംഭിച്ചത്. “സെപ്സിസ് സമയത്തിനെതിരെയുള്ള ഒരു ഓട്ടമാണ്, പക്ഷെ ഡോക്ടർമാർ ക്ലോക്ക് ഓൺ ചെയ്തില്ല,” സിദ്ദു വികാരാധീനനായി പറഞ്ഞു.
ഒരു ദേശീയ കർമ്മപദ്ധതിക്ക് വേണ്ടി ഡോ. ബാരറ്റ് ഉൾപ്പെടെയുള്ള നിരവധി പേർ കേന്ദ്ര സർക്കാരിനോട് ആവശ്യപ്പെട്ടിട്ടുണ്ട്. “അനാവശ്യമായി സെപ്സിസ് ബാധിച്ച് മരണപ്പെടുന്ന ആളുകളെക്കുറിച്ചുള്ള കഥകൾ മാധ്യമങ്ങളിൽ വരാൻ പോവുകയാണോ എന്നതാണ് എന്റെ ഭയം,” ബാരറ്റ് ആശങ്ക പങ്കുവെച്ചു. “ആശുപത്രി മാനദണ്ഡങ്ങൾ നിർമ്മിക്കുകയോ അതിൽ മാറ്റങ്ങൾ വരുത്തുകയോ ചെയ്യുന്നത് അക്രഡിറ്റേഷൻ കാനഡയുടെ കീഴിലാണ്.
അക്രഡിറ്റേഷൻ പ്രവിശ്യകളുടെയും ടെറിട്ടറികളുടെയും അധികാരപരിധിയിൽ വരുന്ന ആശുപത്രികൾക്ക് ഒരു സ്വമേധയാ ഉള്ള പ്രക്രിയയാണ്,” ഒരു ആരോഗ്യ ഏജൻസി വക്താവ് ഇമെയിൽ മറുപടിയിൽ പറഞ്ഞു. എന്നിരുന്നാലും, മാറ്റങ്ങൾ കൊണ്ടുവരാൻ കഴിയുന്ന ദേശീയ ഏജൻസികളുണ്ടെന്ന് ബാരറ്റ് പറയുന്നു. “അക്രഡിറ്റേഷൻ കാനഡ അല്ലെങ്കിൽ ഫിസിഷ്യൻ ട്രെയിനിംഗ് സ്റ്റാൻഡേർഡ്സ് പോലെയുള്ള ദേശീയ സ്ഥാപനങ്ങളുണ്ട്, അവിടെ നയപരമായ മാറ്റങ്ങൾ വരുത്താൻ നമുക്ക് കഴിയും,” അവർ പറഞ്ഞു.
സാംക്രമിക രോഗങ്ങളുടെ പ്രതിരോധവും നിയന്ത്രണവുമായി ബന്ധപ്പെട്ടുള്ള നിലവിലുള്ള നയങ്ങൾ സെപ്സിസ് കുറയ്ക്കാൻ സഹായിച്ചിട്ടുണ്ടെന്ന് ഹെൽത്ത് കാനഡയും വ്യക്തമാക്കി. എന്നാൽ പ്രിയപ്പെട്ടവരെ നഷ്ടപ്പെട്ട കുടുംബങ്ങൾക്ക് ആ പ്രസ്താവന മതിയാകുന്നില്ല. “എന്തുകൊണ്ടാണ് ആശുപത്രികളിൽ ഇതിനെ ഗൗരവമായി എടുക്കാത്തത്? എന്തുകൊണ്ടാണ് കൃത്യമായ സെപ്സിസ് നിയന്ത്രണങ്ങൾ നടപ്പിലാക്കാത്തത്? മറ്റൊരു ദുരന്തം തടയാൻ നമ്മൾ ആഗ്രഹിക്കുന്നുണ്ടെങ്കിൽ ഈ ചോദ്യങ്ങൾക്കെല്ലാം ഉത്തരം നൽകേണ്ടതുണ്ട്,” സിദ്ദു പറഞ്ഞു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
