ഓട്ടവ: കാനഡയിൽ താത്കാലിക വിദേശ തൊഴിലാളികളെ നിയമിക്കുന്നതിനായുള്ള ‘ലേബർ മാർക്കറ്റ് ഇംപാക്ട് അസസ്മെന്റ്’ (LMIA) അപേക്ഷകളുടെ പ്രോസസിംഗ് സമയത്തിൽ വീണ്ടും വർദ്ധനവ് രേഖപ്പെടുത്തി. എംപ്ലോയ്മെന്റ് ആൻഡ് സോഷ്യൽ ഡെവലപ്മെന്റ് കാനഡ പുറത്തുവിട്ട ഏറ്റവും പുതിയ കണക്കുകൾ പ്രകാരം മിക്ക വിഭാഗങ്ങളിലെയും കാത്തിരിപ്പ് കാലാവധി ഉയർന്നപ്പോൾ, പെർമനന്റ് റെസിഡന്റ് സ്ട്രീമിൽ മാത്രമാണ് കാര്യമായ ആശ്വാസമുള്ളത്.
പ്രധാന വിഭാഗമായ ഹൈ-വേജ് സ്ട്രീമിൽ പ്രോസസിംഗ് സമയം മുൻ മാസത്തെ 79 ദിവസത്തിൽ നിന്ന് 88 ദിവസമായി ഉയർന്നു. ഈ വർഷം ഫെബ്രുവരിയിൽ 60 ദിവസമായിരുന്ന സ്ഥാനത്താണ് ഈ വലിയ വർദ്ധനവ് രേഖപ്പെടുത്തിയത്. ലോ-വേജ് സ്ട്രീമിലെ അപേക്ഷകൾ പ്രൊസസ് ചെയ്യാൻ 73 ദിവസവും, ഗ്ലോബൽ ടാലന്റ് സ്ട്രീമിൽ 10 ദിവസവും, കാർഷിക മേഖലയിൽ 23 ദിവസവും ആവശ്യമായി വരുന്നുണ്ട്. എന്നാൽ പെർമനന്റ് റെസിഡന്റ് സ്ട്രീമിലെ കാത്തിരിപ്പ് സമയം 99 ദിവസത്തിൽ നിന്ന് 86 ദിവസമായി കുറഞ്ഞത് അല്പം ആശ്വാസമായിട്ടുണ്ട്.
കാനഡയിലെ തൊഴിലുടമകൾക്ക് ഒരു വിദേശിയെ ജോലിക്ക് എടുക്കണമെങ്കിൽ ESDC-യിൽ നിന്ന് അനുകൂലമായ LMIA അംഗീകാരം ലഭിക്കേണ്ടതുണ്ട്. ഇതിന് ശേഷമേ തൊഴിലാളിക്ക് വർക്ക് പെർമിറ്റിനായി അപേക്ഷിക്കാൻ സാധിക്കൂ എന്നതിനാൽ, പ്രോസസിംഗ് സമയം നീളുന്നത് വിദേശ ഉദ്യോഗാർത്ഥികൾക്ക് തിരിച്ചടിയാണ്. രാജ്യത്തെ താത്കാലിക താമസക്കാരുടെ എണ്ണം ആകെ ജനസംഖ്യയുടെ 5 ശതമാനത്തിൽ താഴെയായി കുറയ്ക്കാനുള്ള സർക്കാരിന്റെ നയരൂപീകരണത്തിന്റെ ഭാഗമായാണ് നിലവിലെ മാറ്റങ്ങൾ.
ഈ വർഷം വിദേശ തൊഴിലാളികളുടെ വരവ് കുറയ്ക്കാൻ ലക്ഷ്യമിടുന്നതിനാൽ അപേക്ഷകളുടെ എണ്ണത്തിൽ കുറവുണ്ടാകാൻ സാധ്യതയുണ്ട്. വരും മാസങ്ങളിൽ ഈ പ്രതിസന്ധി പരിഹരിക്കപ്പെട്ട് പ്രോസസിംഗ് സമയം വീണ്ടും സാധാരണ നിലയിലാകുമെന്ന പ്രതീക്ഷയിലാണ് ഉദ്യോഗാർത്ഥികൾ.
Wait Times to Increase: Rise in LMIA Processing Time
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
