സെന്റ് ജോൺസ്: ന്യൂഫൗണ്ട്ലാൻഡ് ആൻഡ് ലാബ്രഡോറിലെ മലയാളി സമൂഹത്തിന് ആവേശം പകർന്ന് സെന്റ് ജോൺസിൽ ആദ്യമായി മെഗാ മലയാളി സംഗീതവിരുന്ന് സംഘടിപ്പിക്കുന്നു. പ്രമുഖ ഇവന്റ് കമ്പനിയായ ലെവിറ്റേറ്റ് അവതരിപ്പിക്കുന്ന “റിമി ടോമി ലൈവ് കാനഡ” എന്ന ഷോ പ്രാദേശിക കൂട്ടായ്മയായ എൻഎൽ ബീറ്റ്സ് ആണ് ഇവിടെ സംഘടിപ്പിക്കുന്നത്. പ്രദേശത്തെ മലയാളി സമൂഹത്തിന്റെ വളർച്ച ആഘോഷിക്കുന്നതിന്റെ ഭാഗമായാണ് ഈ പരിപാടി സംഘടിപ്പിക്കുന്നതെന്ന് സംഘാടകർ പറഞ്ഞു.
ന്യൂഫൗണ്ട്ലാൻഡിന്റെ ചരിത്രത്തിൽ ഇത്രയും വലിയ ഒരു മലയാളി സംഗീത-വിനോദ പരിപാടി ഇതാദ്യമായാണ് സംഘടിപ്പിക്കപ്പെടുന്നത്. കാനഡയിലെ മലയാളി സാന്നിധ്യം സാംസ്കാരിക വേദിയിൽ കൂടുതൽ ശക്തിപ്പെടുത്താനും, പ്രവാസി മലയാളികളെ ഒന്നിപ്പിക്കാനുമാണ് ഈ വമ്പൻ ഷോയിലൂടെ ലക്ഷ്യമിടുന്നത്. പ്രദേശത്തെ മലയാളി കൂട്ടായ്മയ്ക്ക് ഇതൊരു പുതിയ അനുഭവമായിരിക്കുമെന്നാണ് കരുതപ്പെടുന്നത്.
പരിപാടിയുടെ മുന്നൊരുക്കങ്ങൾ ഇതിനോടകം തന്നെ ആരംഭിച്ചതായി എൻഎൽ ബീറ്റ്സ് ഭാരവാഹികൾ വ്യക്തമാക്കി. സംഗീതനിശ നടക്കുന്ന വേദി, പ്രവേശന ടിക്കറ്റുകൾ ലഭ്യമാകുന്ന രീതികൾ എന്നിവയുൾപ്പെടെയുള്ള കൂടുതൽ വിവരങ്ങൾ വരും ദിവസങ്ങളിൽ ഔദ്യോഗികമായി പുറത്തുവിടുമെന്നും സംഘാടകർ അറിയിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
First big Malayali show in Newfoundland; 'Rimi Tomi Live Canada' coming to rock St. John's
