സെന്റ് ജോൺ : ന്യൂഫൗണ്ട്ലാൻഡിലെ മസ്ഗ്രേവ് ഹാർബറിൽ 2009 മുതൽ അടഞ്ഞുകിടക്കുന്ന ഉപേക്ഷിക്കപ്പെട്ട പലചരക്ക് കട പ്രദേശവാസികൾക്ക് വലിയ ദുരിതമാകുന്നു. കടയ്ക്കടുത്തുള്ള വീട്ടിൽ താമസിക്കുന്ന സ്റ്റീവ് ബട്ട്ലർ എന്നയാളാണ് വർഷങ്ങളായി ഈ കെട്ടിടത്തിനെതിരെ നിയമപോരാട്ടം നടത്തുന്നത്. വീടിനോട് ചേർന്നുകിടക്കുന്ന ഈ കെട്ടിടത്തിൽ നിന്നുള്ള അവശിഷ്ടങ്ങൾ കാറ്റിൽ പറന്നുവീണ് തന്റെ വീടിന് നിരന്തരം കേടുപാടുകൾ സംഭവിക്കുന്നുണ്ടെന്ന് അദ്ദേഹം പറയുന്നു. കെട്ടിടത്തിന്റെ ശോഭനമല്ലാത്ത അവസ്ഥ കാരണം തനിക്ക് വീടിന് ഇൻഷുറൻസ് പോലും ലഭിക്കുന്നില്ലെന്നും അദ്ദേഹം വ്യക്തമാക്കുന്നു.
തുറന്നുകിടക്കുന്ന ഈ കെട്ടിടം കുട്ടികൾക്കും പൊതുജനങ്ങൾക്കും വലിയ സുരക്ഷാ ഭീഷണിയാണ് ഉയർത്തുന്നത്. ചീഞ്ഞളിഞ്ഞ തറയും തുറന്ന നിലവറയും ഒപ്പം ശക്തമായ പൂപ്പൽ നാറ്റവും ഇവിടെയുള്ളതായി ബട്ട്ലർ ചൂണ്ടിക്കാണിക്കുന്നു. ഈ പ്രശ്നത്തിന് ശാശ്വത പരിഹാരം കാണുക ലക്ഷ്യമിട്ട് അദ്ദേഹം അടുത്തിടെ നടന്ന ഉപതെരഞ്ഞെടുപ്പിൽ മസ്ഗ്രേവ് ഹാർബർ ടൗൺ കൗൺസിൽ അംഗമായി തെരഞ്ഞെടുക്കപ്പെട്ടിരുന്നു. അധികാരികളിൽ കൂടുതൽ സമ്മർദ്ദം ചെലുത്താനാണ് താൻ ഈ പദവി സ്വീകരിച്ചതെന്നും അദ്ദേഹം വ്യക്തമാക്കി.
എന്നാൽ കെട്ടിടത്തിന്റെ ഉടമസ്ഥാവകാശത്തെച്ചൊല്ലി ആശയക്കുഴപ്പം തുടരുകയാണ്. ബിസിനസ് ഡെവലപ്മെന്റ് ബാങ്ക് ഓഫ് കാനഡയാണ് (ബി.ഡി.സി) ഈ കെട്ടിടത്തിന്റെ ഉടമയെന്നാണ് മേയർ ജേസൺ ചോൾക്ക് വ്യക്തമാക്കുന്നത്. ബാങ്ക് ഉടമസ്ഥതയേറ്റ് എടുത്ത് കെട്ടിടം വൃത്തിയാക്കണമെന്നാണ് കൗൺസിലിന്റെ ആവശ്യം. എന്നാൽ 2012-ൽ തന്നെ വായ്പാ കാലാവധി അവസാനിക്കുകയും മോർട്ട്ഗേജ് റദ്ദാക്കുകയും ചെയ്തതിനാൽ നിലവിൽ ഈ വസ്തുവുമായി ബന്ധമില്ലെന്നാണ് ബി.ഡി.സിയുടെ നിലപാട്. സമാനമായ ഒട്ടനവധി ഉപേക്ഷിക്കപ്പെട്ട കെട്ടിടങ്ങൾ പ്രവിശ്യയിൽ വലിയ പ്രതിസന്ധിയാകുന്നുണ്ടെന്ന് മുൻസിപ്പാലിറ്റീസ് ന്യുഫൗണ്ട്ലാൻഡ് ആൻഡ് ലബ്രഡോർ പ്രസിഡന്റ് ആമി കോഡിയും വ്യക്തമാക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
