കാനഡയിൽ കുട്ടികളിലെ തീവ്രവാദ സ്വാധീനം വർദ്ധിക്കുന്നതായി റിപ്പോർട്ട്; നിരീക്ഷണത്തിൽ പ്രായപൂർത്തിയാകാത്തവരും

ഒട്ടാവ: കാനഡയിൽ കൗമാരക്കാർക്കിടയിൽ തീവ്രവാദ ആശയങ്ങൾ സ്വാധീനം ചെലുത്തുന്നതായി ഇന്റലിജൻസ് ഏജൻസിയുടെ മുന്നറിയിപ്പ്. കനേഡിയൻ സെക്യൂരിറ്റി ഇന്റലിജൻസ് സർവീസ് (CSIS) പുറത്തുവിട്ട 2025-ലെ വാർഷിക റിപ്പോർട്ടിലാണ് രാജ്യത്തെ സുരക്ഷാ സാഹചര്യത്തെ ബാധിക്കുന്ന ഗൗരവകരമായ വിവരങ്ങളുള്ളത്. ഭീകരവിരുദ്ധ അന്വേഷണങ്ങളുടെ പരിധിയിൽ വരുന്നവരിൽ പത്തിൽ ഒരാൾ 18 വയസ്സിൽ താഴെയുള്ളവരാണെന്ന് റിപ്പോർട്ട് വ്യക്തമാക്കുന്നു. 13 വയസ്സുള്ള കുട്ടികൾ പോലും ഇത്തരത്തിൽ തീവ്രവാദ ആശയങ്ങളിലേക്ക് ആകൃഷ്ടരാകുന്നത് അധികൃതരെ ആശങ്കയിലാഴ്ത്തിയിട്ടുണ്ട്.

ഓൺലൈൻ ഇടങ്ങളിലൂടെ കുട്ടികൾ തീവ്രവാദ ആശയങ്ങൾ ഉൾക്കൊള്ളുന്നതും അക്രമങ്ങളിലേക്ക് തിരിയുന്നതും പതിവാകുകയാണെന്ന് സിഎസ്ഐഎസ് റിപ്പോർട്ട് ചൂണ്ടിക്കാട്ടുന്നു. ഇന്റർനെറ്റിന്റെ അമിത ഉപയോഗവും ഡിജിറ്റൽ മാധ്യമങ്ങളുമായുള്ള നിരന്തര സമ്പർക്കവും കൗമാരക്കാരെ എളുപ്പത്തിൽ സ്വാധീനിക്കാൻ ഭീകരസംഘടനകളെ സഹായിക്കുന്നുണ്ട്. മുൻ സിഎസ്ഐഎസ് ഉദ്യോഗസ്ഥനായ നീൽ ബിസന്റെ നിരീക്ഷണത്തിൽ, ഇത് അപ്രതീക്ഷിതമല്ലെങ്കിലും അതീവ ഗൗരവത്തോടെ കാണേണ്ട സാഹചര്യമാണ്. കുട്ടികൾ ഓൺലൈനിൽ കാണുന്ന കാര്യങ്ങളും അവർ സംവദിക്കുന്ന വ്യക്തികളും അവരെ തീവ്രമായ നിലപാടുകളിലേക്ക് നയിക്കുന്നതിൽ പ്രധാന പങ്കുവഹിക്കുന്നു.

മതപരവും രാഷ്ട്രീയവുമായ തീവ്രവാദ നിലപാടുകൾ പ്രചരിപ്പിക്കുന്ന ഉള്ളടക്കങ്ങൾ കുട്ടികളിലേക്ക് എത്തുന്നത് തടയുക എന്നതാണ് നിലവിലെ പ്രധാന വെല്ലുവിളി. സോഷ്യൽ മീഡിയ പ്ലാറ്റ്‌ഫോമുകൾക്ക് പുറമെ, എൻക്രിപ്റ്റഡ് മെസേജിംഗ് ആപ്പുകളും ഓൺലൈൻ ഗെയിമിംഗ് പ്ലാറ്റ്‌ഫോമുകളും ഇതിനായി ദുരുപയോഗം ചെയ്യപ്പെടുന്നുണ്ടെന്ന് സൈബർ സുരക്ഷാ വിദഗ്ധനായ റിതേഷ് കോട്ടക് വ്യക്തമാക്കുന്നു. ഇത്തരം പ്ലാറ്റ്‌ഫോമുകളിൽ കുട്ടികളുടെ സുരക്ഷ ഉറപ്പാക്കുന്നതിനോ നിയമവിരുദ്ധമായ ഉള്ളടക്കങ്ങൾ നിയന്ത്രിക്കുന്നതിനോ ടെക് കമ്പനികൾ വേണ്ടത്ര ജാഗ്രത പുലർത്തുന്നില്ലെന്ന ആക്ഷേപവും ശക്തമാണ്.

നിയന്ത്രണങ്ങൾ കർശനമാക്കാൻ സർക്കാർ ഇടപെടലുകൾ ആവശ്യമാണെന്നും അദ്ദേഹം ചൂണ്ടിക്കാട്ടുന്നു. അടുത്തിടെ റിപ്പോർട്ട് ചെയ്യപ്പെട്ട കേസുകൾ ഈ ആശങ്ക ശരിവെക്കുന്നതാണ്. തീവ്രവാദ വിരുദ്ധ അന്വേഷണങ്ങളുടെ ഭാഗമായി 2023-ൽ അഞ്ച് പ്രായപൂർത്തിയാകാത്തവരും 2024-ൽ രണ്ട് പേരും 2025-ൽ നാല് പേരും കാനഡയിൽ പിടിയിലായിട്ടുണ്ട്. ഏതാനും ആഴ്ചകൾക്ക് മുൻപ് ഒട്ടാവയിൽ ഇസ്ലാമിക് സ്റ്റേറ്റ് (IS) ആശയങ്ങളിൽ ആകൃഷ്ടനായി ജൂത സമൂഹത്തിന് നേരെ ആക്രമണത്തിന് പദ്ധതിയിട്ട കൗമാരക്കാരനെ കോടതി കുറ്റക്കാരനായി കണ്ടെത്തിയിരുന്നു. വികസിത രാജ്യങ്ങളിൽ പോലും കൗമാരക്കാർ ഇത്തരത്തിൽ വഴിതെറ്റുന്നത് ആഗോള സുരക്ഷാ ഏജൻസികൾക്ക് വലിയ വെല്ലുവിളിയായി മാറുകയാണ്.

Report: Terrorism influence among children on the rise in Canada

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt