ക്യുബെക്ക്: ക്യുബെക്കിൽ സ്ഥിരതാമസത്തിന് അപേക്ഷിക്കുന്നവരുടെ പങ്കാളികൾക്ക് (Spouses/Common-law partners) പ്രത്യേക വർക്ക് പെർമിറ്റുകൾ നൽകാൻ അനുമതി നൽകിക്കൊണ്ട് പുതിയ താൽക്കാലിക പബ്ലിക് പോളിസി പ്രഖ്യാപിച്ചു. കാനഡയിലെ കഠിനമായ തൊഴിൽ നിയമങ്ങളിൽ വൻ ഇളവുകൾ നൽകുന്നതാണ് ഈ പുതിയ തീരുമാനം. ഇതുപ്രകാരം, യോഗ്യരായ അപേക്ഷകരുടെ പങ്കാളികൾക്ക് സാധാരണയായി ആവശ്യമുള്ള കർശനമായ നിബന്ധനകൾ ഇല്ലാതെ തന്നെ ഓപ്പൺ വർക്ക് പെർമിറ്റ് സ്വന്തമാക്കാൻ സാധിക്കും.
സാധാരണയായി ഒരു വർക്ക് പെർമിറ്റ് ലഭിക്കുന്നതിനോ കാനഡയിൽ പദവി പുതുക്കുന്നതിനോ ആവശ്യമായ കടുത്ത നിയമങ്ങളിൽ നിന്നാണ് പങ്കാളികൾക്ക് ഇളവ് ലഭിക്കുക. മുൻപ് അനുമതിയില്ലാതെ ജോലി ചെയ്യുകയോ പഠിക്കുകയോ ചെയ്തിട്ടുണ്ടെങ്കിൽ സാധാരണ ഉണ്ടാകുന്ന വിലക്കുകൾ ഇനി ബാധകമാകില്ല. കൂടാതെ, താൽക്കാലിക താമസ പദവിയിലെ ചില ഗുരുതരമല്ലാത്ത നിയമലംഘനങ്ങളുടെ പേരിൽ അപേക്ഷ നിരസിക്കില്ലെന്ന് മാത്രമല്ല, കാനഡയ്ക്കുള്ളിൽ നിന്ന് വർക്ക് പെർമിറ്റിനായി അപേക്ഷിക്കുമ്പോൾ പാലിക്കേണ്ട ചില സങ്കീർണ്ണമായ നിബന്ധനകളിൽ നിന്ന് ഒഴിവാക്കുകയും ചെയ്യും. നിലവിൽ വിസ കാലാവധി കഴിഞ്ഞവർക്കും, വിസിറ്റർ അല്ലെങ്കിൽ സ്റ്റുഡന്റ് വിസയുള്ളവർക്കും പദവി പുനഃസ്ഥാപിക്കാൻ ഈ പോളിസി വഴി അപേക്ഷിക്കാം. എന്നാൽ ഇവർ വിസ കാലാവധി കഴിഞ്ഞ് 90 ദിവസത്തിനകം അപേക്ഷ സമർപ്പിച്ചിരിക്കണം.
പ്രധാന അപേക്ഷകൻ ക്യുബെക്കിന്റെ സ്കിൽഡ് വർക്കർ സെലക്ഷൻ പ്രോഗ്രാം (PSTQ) വഴി സ്ഥിരതാമസത്തിന് ക്ഷണം ലഭിച്ച ആളായിരിക്കണം. കൂടാതെ അവർ പ്രവിശ്യയിലേക്ക് സ്ഥിരതാമസത്തിനുള്ള അപേക്ഷ (DSP) സമർപ്പിച്ചിട്ടുണ്ടാകണം. ഇവർ പ്രധാനമായും മൂന്ന് സാഹചര്യങ്ങളിൽ ഒന്നിൽ ഉൾപ്പെടുന്നവരായിരിക്കണം. അതിൽ ആദ്യത്തേത്, അപേക്ഷകന് ക്യുബെക്കിലെ ഒരു തൊഴിലുടമയ്ക്ക് കീഴിൽ 2026 ഡിസംബർ 31-നോ അതിന് മുൻപോ കാലാവധി തീരുന്ന വർക്ക് പെർമിറ്റ് ഉണ്ടായിരിക്കണം, ഒപ്പം ഇത് പുതുക്കാൻ അപേക്ഷിച്ചിട്ടുമുണ്ടാകണം. അല്ലെങ്കിൽ, നിലവിലെ വിസ കാലാവധി നീട്ടാൻ അപേക്ഷ നൽകി കാനഡയിൽ തുടരാൻ അനുമതിയുള്ളവരും (Maintained status), തുടർന്ന് അതേ തൊഴിലുടമയ്ക്ക് കീഴിൽ ജോലി ചെയ്യാൻ വീണ്ടും അപേക്ഷിച്ചവരും ആയിരിക്കണം. മൂന്നാമത്തെ സാഹചര്യം, ക്യുബെക്കിലെ തൊഴിലുടമയ്ക്ക് കീഴിലുള്ള വർക്ക് പെർമിറ്റ് 2026 മാർച്ച് 13-നോ അതിന് ശേഷമോ കാലാവധി കഴിഞ്ഞവരും, നിലവിൽ താമസം നീട്ടാനോ പദവി പുനഃസ്ഥാപിക്കാനോ അപേക്ഷിച്ചവരും ആയിരിക്കണം എന്നതാണ്.
ഈ പുതിയ പോളിസി 2026 ജൂൺ 5 മുതലാണ് പ്രാബല്യത്തിൽ വന്നത്. ഈ തീയതിയിലോ അതിനുശേഷമോ ലഭിക്കുന്ന അപേക്ഷകൾക്കും, നിലവിൽ തീർപ്പാക്കാതെ കിടക്കുന്ന അപേക്ഷകൾക്കും ഈ നിയമം ബാധകമായിരിക്കും. ഈ താൽക്കാലിക നിയമം 2026 ഡിസംബർ 31 വരെ നിലവിലുണ്ടാകും. എന്നാൽ കനേഡിയൻ ഇമിഗ്രേഷൻ വകുപ്പിന്റെ സാധാരണ രീതി അനുസരിച്ച്, മുൻകൂട്ടി അറിയിപ്പുകൾ ഒന്നും കൂടാതെ തന്നെ ഈ പോളിസി എപ്പോൾ വേണമെങ്കിലും റദ്ദാക്കാനുള്ള അധികാരവും സർക്കാരിനുണ്ട്.
Quebec extends special work permits to spouses of applicants for permanent selection
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
