കാനഡ വർക്ക് പെർമിറ്റുകളിൽ ഭാഷാ പരീക്ഷ നിർബന്ധമാക്കുന്നു? ആശങ്കപ്പെടേണ്ട; യാഥാർത്ഥ്യം അറിയാം!

ഒട്ടാവ: കാനഡയിലേക്ക് താല്കാലിക വർക്ക് പെർമിറ്റിൽ വരാൻ ആഗ്രഹിക്കുന്നവരെയും നിലവിൽ അവിടെയുള്ളവരെയും ഒരുപോലെ ആശങ്കയിലാഴ്ത്തിയ ഒരു വാർത്തയാണ് ഇപ്പോൾ പുറത്തുവരുന്നത്. ഇന്റർനാഷണൽ മൊബിലിറ്റി പ്രോഗ്രാമിന് (IMP) കീഴിൽ വരുന്ന ചില വർക്ക് പെർമിറ്റ് അപേക്ഷകർക്ക് ഭാഷാ പരീക്ഷാ ഫലം (IELTS/CELPIP) നിർബന്ധമാക്കാൻ ഇമിഗ്രേഷൻ വകുപ്പ്ആലോചിക്കുന്നു എന്നതാണ് പുതിയ വിവരം. എന്നാൽ, ഇതിന്റെ പേരിൽ ഇപ്പോൾ ആരും പരിഭ്രാന്തരാകേണ്ടതില്ല. ഈ നിർദ്ദേശത്തെക്കുറിച്ചുള്ള യഥാർത്ഥ വിവരങ്ങൾ പരിശോധിക്കാം

എന്താണ് പുതിയ നിർദ്ദേശം?

കാനഡയിലെ തൊഴിൽ മേഖലയിലേക്ക് എത്തുന്ന വിദേശ തൊഴിലാളികൾക്ക് മികച്ച ആശയവിനിമയ ശേഷിയുണ്ടെന്ന് ഉറപ്പുവരുത്താനും, ജോലിസ്ഥലങ്ങളിലെ സുരക്ഷിതത്വവും അവരുടെ മികച്ച ഭാഷാ നിലവാരവും ഉറപ്പാക്കാനുമാണ് കാനഡ ഇമിഗ്രേഷൻ ഇത്തരമൊരു ഭേദഗതി കൊണ്ടുവരാൻ ശ്രമിക്കുന്നത്.

നിലവിലെ അവസ്ഥ എന്താണ്?

ഇത് നിലവിൽ വന്ന ഒരു നിയമമല്ല, മറിച്ച് ഒരു നിർദ്ദേശം (Proposal) മാത്രമാണ്. IMP-ക്ക് കീഴിൽ വരുന്ന ഏതൊക്കെ വർക്ക് പെർമിറ്റുകളെയാണ് ഇത് ബാധിക്കുക എന്ന് IRCC ഔദ്യോഗികമായി സ്ഥിരീകരിച്ചിട്ടില്ല. പങ്കാളികൾക്ക് നൽകുന്ന സ്പൗസൽ ഓപ്പൺ വർക്ക് പെർമിറ്റുകൾ ഇതിൽ ഉൾപ്പെടുമോ എന്ന കാര്യത്തിലും നിലവിൽ യാതൊരു സ്ഥിരീകരണവുമില്ല.

ഇനി എന്താണ് സംഭവിക്കുക?

ഈ നിർദ്ദേശം വരും ആഴ്ചകളിൽ (2026 സ്പ്രിങ്/സമ്മർ സീസണിൽ) കാനഡ ഗസറ്റിൽ (Canada Gazette, Part I) പ്രസിദ്ധീകരിക്കും. അതിനുശേഷം പൊതുജനങ്ങൾക്കും വിദഗ്ദ്ധർക്കും അഭിപ്രായം രേഖപ്പെടുത്താൻ 30 ദിവസത്തെ സമയമുണ്ടാകും. ഈ പ്രക്രിയകൾക്കെല്ലാം ശേഷമേ അന്തിമ തീരുമാനം ഉണ്ടാകൂ.

കാനഡ ഇമിഗ്രേഷൻ വകുപ്പിന്റെ ഭാഗത്തുനിന്ന് ഔദ്യോഗിക പ്രഖ്യാപനങ്ങൾ വരുന്നത് വരെ ആരും പരിഭ്രാന്തരാകുകയോ, ധൃതിപ്പെട്ട് ഭാഷാ പരീക്ഷകൾക്ക് ബുക്ക് ചെയ്യുകയോ ചെയ്യേണ്ടതില്ല. വ്യാജ വാർത്തകളിൽ വഞ്ചിതരാകാതിരിക്കുക.

Proposed Canada Work Permit Language Requirement

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla