ഷാർലറ്റൗൺ: ആപൽഘട്ടങ്ങളിൽ സഹായത്തിനായി വിളിക്കുന്ന 911 അടിയന്തര സേവന സംവിധാനം അടിമുടി പരിഷ്കരിക്കാനൊരുങ്ങി പ്രിൻസ് എഡ്വേർഡ് ഐലൻഡ് (PEI). കാലഹരണപ്പെട്ട അനലോഗ് സംവിധാനത്തിൽ നിന്ന് ഇന്റർനെറ്റ് അധിഷ്ഠിത ഡിജിറ്റൽ പ്ലാറ്റ്ഫോമിലേക്കുള്ള നിർണായക ചുവടുവെപ്പിലാണ് പ്രവിശ്യ. ‘നെക്സ്റ്റ് ജനറേഷൻ 911’ (NG911) എന്ന് പേരിട്ടിരിക്കുന്ന ഈ പുതിയ പദ്ധതി നടപ്പിലാകുന്നതോടെ, അപകടസ്ഥലത്തെ ദൃശ്യങ്ങൾ തത്സമയം അധികൃതർക്ക് കൈമാറാൻ സാധിക്കുമെന്നതാണ് പ്രധാന സവിശേഷത.
നിലവിൽ ശബ്ദസന്ദേശങ്ങൾ മാത്രം കൈമാറാൻ കഴിയുന്ന സ്ഥാനത്ത്, ഇനി മുതൽ ഫോട്ടോകളും വീഡിയോകളും ടെക്സ്റ്റ് മെസ്സേജുകളും വഴി സഹായം തേടാം. അപകടത്തിൽപ്പെട്ടവർ പരിഭ്രാന്തിയിലായിരിക്കുന്ന സാഹചര്യത്തിൽ കൃത്യമായ വിവരങ്ങൾ കൈമാറാൻ പ്രയാസപ്പെടാറുണ്ട്. എന്നാൽ പുതിയ സാങ്കേതികവിദ്യയിലൂടെ അപകടസ്ഥലത്തെ ദൃശ്യങ്ങൾ നേരിട്ട് കണ്ട് സ്ഥിതിഗതികൾ വിലയിരുത്താൻ ഡിസ്പാച്ചർമാർക്കും രക്ഷാപ്രവർത്തകർക്കും സാധിക്കും. കെട്ടിടങ്ങളുടെ പ്ലാൻ, രോഗികളുടെ ആരോഗ്യവിവരങ്ങൾ എന്നിവയും ഈ ഡിജിറ്റൽ സംവിധാനത്തിലൂടെ അതിവേഗം കൈമാറാൻ കഴിയും.
സംസാരശേഷി കുറഞ്ഞവർക്കും കേൾവിപരിമിതിയുള്ളവർക്കും ഈ മാറ്റം വലിയ ആശ്വാസമാകും. അടിയന്തര സാഹചര്യങ്ങളിൽ 911 കേന്ദ്രവുമായി തത്സമയം ചാറ്റ് ചെയ്യാനുള്ള സൗകര്യം ഇതിലൂടെ ലഭ്യമാകും. സാധാരണ ഫോൺ വിളികൾ പോലെ തന്നെ ലളിതമായി ഈ സേവനം പൊതുജനങ്ങൾക്ക് ഉപയോഗിക്കാമെന്നും ഇതിനായി പ്രത്യേക പരിശീലനത്തിന്റെ ആവശ്യമില്ലെന്നും പ്രവിശ്യാ 911 കോർഡിനേറ്റർ പാട്രിക് കെല്ലി വ്യക്തമാക്കി. രക്ഷാപ്രവർത്തനം കൂടുതൽ കാര്യക്ഷമമാക്കാനും ജീവൻ രക്ഷിക്കാനുള്ള സമയം ലാഭിക്കാനും ഇതിലൂടെ സാധിക്കുമെന്നാണ് വിലയിരുത്തൽ.
2027 മാർച്ച് അവസാനത്തോടെ പുതിയ ഡിജിറ്റൽ സംവിധാനം പൂർണ്ണമായും സജ്ജമാകുമെന്നാണ് അധികൃതർ അറിയിച്ചിരിക്കുന്നത്. കനേഡിയൻ റേഡിയോ-ടെലിവിഷൻ ആൻഡ് ടെലികമ്മ്യൂണിക്കേഷൻസ് കമ്മീഷന്റെ (CRTC) നിർദ്ദേശപ്രകാരം രാജ്യത്തെ എല്ലാ ടെലികോം സേവനദാതാക്കളും ഈ മാറ്റത്തിന്റെ ഭാഗമാകും. നിലവിലുള്ള അനലോഗ് ശൃംഖലകൾ ഒഴിവാക്കി ഡിജിറ്റൽ പ്ലാറ്റ്ഫോമിലേക്ക് മാറുന്നതോടെ കാനഡയിലെ പൊതുജന സുരക്ഷാ സംവിധാനങ്ങളിൽ വിപ്ലവകരമായ മാറ്റമാണ് പ്രതീക്ഷിക്കുന്നത്.
prince-edward-island/pei-next-generation-
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
