ന്യൂഡൽഹി: പ്രധാനമന്ത്രി നരേന്ദ്ര മോദിക്ക് നോർവേയുടെ പരമോന്നത സിവിലിയൻ ബഹുമതിയായ ‘ഗ്രാൻഡ് ക്രോസ് ഓഫ് ദി റോയൽ നോർവീജിയൻ ഓർഡർ ഓഫ് മെറിറ്റ്’ ലഭിച്ചു. ഒസ്ലോയിൽ വെച്ച് നടന്ന ഔദ്യോഗിക ചടങ്ങിൽ നോർവേ ഭരണാധികാരി ഹരാൾഡ് അഞ്ചാമൻ രാജാവാണ് പുരസ്കാരം സമ്മാനിച്ചത്. അന്താരാഷ്ട്ര തലത്തിൽ പ്രധാനമന്ത്രി മോദിക്ക് ലഭിക്കുന്ന 32-ാമത്തെ പുരസ്കാരമാണിത്. 43 വർഷത്തിന് ശേഷമാണ് ഒരു ഇന്ത്യൻ പ്രധാനമന്ത്രി നോർവേ സന്ദർശിക്കുന്നത് എന്ന പ്രത്യേകതയും ഈ ചടങ്ങിനുണ്ട്. ഇന്ത്യയും നോർവേയും തമ്മിലുള്ള ദീർഘകാല സൗഹൃദം ദൃഢമാക്കുന്നതിന്റെ ഭാഗമായാണ് ഈ ആദരവ്.
യൂറോപ്യൻ സന്ദർശനത്തിന്റെ ഭാഗമായാണ് പ്രധാനമന്ത്രി നരേന്ദ്ര മോദി നോർവേയിൽ എത്തിയത്. നോർവേ പ്രധാനമന്ത്രി ജോനാസ് ഗഹർ സ്റ്റോറുമായി അദ്ദേഹം വിപുലമായ ഉഭയകക്ഷി ചർച്ചകൾ നടത്തി. സാമ്പത്തിക സഹകരണം, സമുദ്ര സുരക്ഷ, കാലാവസ്ഥാ വ്യതിയാനം തുടങ്ങിയ മേഖലകളിൽ ഇരുരാജ്യങ്ങളും ഒന്നിച്ച് പ്രവർത്തിക്കാൻ ചർച്ചയിൽ ധാരണയായി. കഴിഞ്ഞ വർഷം പഹൽഗാമിലുണ്ടായ ഭീകരാക്രമണ സമയത്ത് ഇന്ത്യക്ക് നൽകിയ പിന്തുണയ്ക്ക് നോർവേയ്ക്ക് പ്രധാനമന്ത്രി നന്ദി അറിയിച്ചു. കൂടാതെ, ഇന്ത്യയുടെ നേതൃത്വത്തിലുള്ള ഇന്തോ-പസഫിക് സമുദ്ര സംരംഭത്തിൽ പങ്കാളിയാകാനുള്ള നോർവേയുടെ തീരുമാനത്തെ അദ്ദേഹം സ്വാഗതം ചെയ്യുകയും ചെയ്തു.
നോർവേ, ഡെൻമാർക്ക്, ഫിൻലാൻഡ്, ഐസ്ലാൻഡ്, സ്വീഡൻ എന്നീ രാജ്യങ്ങൾ പങ്കെടുക്കുന്ന മൂന്നാമത് ഇന്ത്യ-നോർഡിക് ഉച്ചകോടിയിൽ പ്രധാനമന്ത്രി മോദി നാളെ പങ്കെടുക്കും. ഇന്ത്യയിലേക്ക് കൂടുതൽ വിദേശ നിക്ഷേപങ്ങൾ ആകർഷിക്കുക, ശുദ്ധമായ ഊർജ്ജം, ഗ്രീൻ ഹൈഡ്രജൻ, ആർട്ടിക് മേഖലയിലെ ഗവേഷണം, പുതിയ സാങ്കേതികവിദ്യകൾ എന്നിവയിൽ സഹകരണം ഉറപ്പാക്കുക എന്നിവയാണ് ഉച്ചകോടിയുടെ പ്രധാന ലക്ഷ്യങ്ങൾ. ഇന്ത്യയും യൂറോപ്യൻ ഫ്രീ ട്രേഡ് അസോസിയേഷനും തമ്മിൽ ഒപ്പുവെച്ച സ്വതന്ത്ര വ്യാപാര കരാർ ഇരുരാജ്യങ്ങളുടെയും സാമ്പത്തിക വളർച്ചയ്ക്ക് പുതിയ ഊർജ്ജം നൽകുമെന്ന് കൂടിക്കാഴ്ചയ്ക്ക് ശേഷം പ്രധാനമന്ത്രി വ്യക്തമാക്കി.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Prime Minister Narendra Modi receives Norway's highest honour; 32nd award globally
