കാനഡയിൽ പ്രൈമറി മെഡിക്കൽ കെയർ സേവനങ്ങൾ മെച്ചപ്പെടുന്നു; പുതിയ സർവ്വേ ഇങ്ങനെ

ഒട്ടാവ: കാനഡയിൽ പ്രാഥമിക ആരോഗ്യ പരിചരണം (Primary Care) ലഭിക്കുന്നവരുടെ എണ്ണത്തിൽ നേരിയ പുരോഗതി രേഖപ്പെടുത്തിയതായി പുതിയ സർവ്വേ ഫലം. എന്നാൽ, ഏകദേശം 5.9 മില്യൺ കനേഡിയൻസിന് ഇപ്പോഴും ഒരു ഫാമിലി ഡോക്ടറോ നഴ്സ് പ്രാക്ടീഷണറോ പ്രൈമറി കെയർ ടീമോ പോലുള്ള ഒരു പ്രാഥമിക ആരോഗ്യ വിദഗ്ദ്ധന്റെ സേവനം ലഭ്യമല്ല. ‘ഔർകെയർ സർവ്വേ’ (OurCare Survey) എന്ന പഠനത്തിൽ നിന്നാണ് ഈ സുപ്രധാന വിവരങ്ങൾ പുറത്തുവന്നിരിക്കുന്നത്.

2022-ൽ നടന്ന അവസാന സർവ്വേയുമായി താരതമ്യം ചെയ്യുമ്പോൾ, പ്രാഥമിക പരിചരണം ലഭിക്കാത്തവരുടെ എണ്ണത്തിൽ കുറവുണ്ടായിട്ടുണ്ട്. 2022-ൽ ഇത് 65 ലക്ഷമായിരുന്നു. പുതിയ സർവ്വേ പ്രകാരം, സർവ്വേയിൽ പങ്കെടുത്തവരിൽ 81 ശതമാനം പേർക്ക് പ്രൈമറി കെയർ പ്രൊഫഷണൽ ഉണ്ടെന്ന് കണ്ടെത്തി, ഇത് 2022-ൽ 77 ശതമാനമായിരുന്നു.

കനേഡിയൻ മെഡിക്കൽ അസോസിയേഷനുമായി ചേർന്ന് സെന്റ് മൈക്കിൾസ് ഹോസ്പിറ്റലിലെ ഫിസിഷ്യൻ-ഗവേഷകനായ ഡോ. താര കിരണിന്റെ നേതൃത്വത്തിലുള്ള സംഘമാണ് സർവ്വേ നടത്തിയത്. 16,299 കനേഡിയൻസിന്റെ പ്രതികരണങ്ങളാണ് ഈ സർവ്വേയിൽ ഉൾപ്പെടുത്തിയത്. സർവ്വേയുടെ ഫലങ്ങൾ രാജ്യത്തെ എല്ലാ തലത്തിലുമുള്ള സർക്കാരുകൾക്കും ഒരു പ്രചോദനമാകണമെന്നും, പരിചരണ ലഭ്യത മെച്ചപ്പെടുത്താൻ അവർ കൂടുതൽ പരിശ്രമിക്കണമെന്നും ഡോ. താര കിരൺ പ്രസ്താവനയിൽ പറഞ്ഞു.

ഈ കണ്ടെത്തലുകൾ കാനഡയിലെ ഡോക്ടർമാരും രോഗികളും ദിവസവും അനുഭവിക്കുന്ന യാഥാർത്ഥ്യങ്ങളെ ശരിവെക്കുന്നതാണെന്ന് CMA പ്രസിഡന്റ് ഡോ. മാർഗോട്ട് ബർണൽ പറഞ്ഞു. “ഞങ്ങൾ പുരോഗതി കൈവരിച്ചിട്ടുണ്ടെങ്കിലും, വളരെയധികം കനേഡിയൻസിന് ഇപ്പോഴും പ്രാഥമിക പരിചരണത്തിന് അസ്വീകാര്യമായ തടസ്സങ്ങൾ നേരിടേണ്ടിവരുന്നു. പരിഹാരങ്ങൾ നമുക്കറിയാം, എല്ലാ കനേഡിയൻസിനും പരിചരണം ലഭ്യമാക്കുക എന്നത് യാഥാർത്ഥ്യവും കൈവരിക്കാൻ കഴിയുന്നതുമായ ലക്ഷ്യമാണ്,” എന്ന് അവർ കൂട്ടിച്ചേർത്തു.

കൂടാതെ, സർവ്വേയിൽ അടിയന്തിര കൂടിക്കാഴ്ചകൾക്കുള്ള ലഭ്യത, ജീവനക്കാരിലെ വൈവിധ്യം, ആരോഗ്യസംരക്ഷണ സംവിധാനത്തിന്റെ മൊത്തത്തിലുള്ള സംതൃപ്തി തുടങ്ങിയ വിഷയങ്ങളും പരിശോധിച്ചു. അടിയന്തിര അപ്പോയിന്റ്‌മെന്റ് ബുക്ക് ചെയ്യാൻ ശ്രമിച്ചവരിൽ 37 ശതമാനം പേർക്ക് മാത്രമേ അതേ ദിവസം തന്നെയോ അടുത്ത ദിവസമോ അത് സാധിച്ചുള്ളൂ. ആരോഗ്യ സംരക്ഷണ സംവിധാനത്തിന്റെ മൊത്തത്തിലുള്ള പ്രവർത്തനത്തിൽ കനേഡിയൻ ജനതയുടെ 28 ശതമാനം പേർ മാത്രമാണ് സംതൃപ്തരോ വളരെ സംതൃപ്തരോ ആണെന്നും സർവ്വേ റിപ്പോർട്ട് ചെയ്യുന്നുണ്ട്.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

Primary medical care services are improving in Canada; new survey shows