വിന്നിപെഗിൽ ഇസ്ലാമിക് സെന്ററിന് നേരെ പെല്ലറ്റ് ഗൺ ആക്രമണം; സുരക്ഷ ശക്തമാക്കി പൊലീസ്

വിന്നിപെഗ്: വിന്നിപെഗിലുള്ള റഹ്മ ഇസ്ലാമിക് സെന്ററിന് (Rahma Islamic Centre) നേരെ നടന്ന ആക്രമണം വിദ്വേഷപ്രേരിത കുറ്റകൃത്യമാണെന്ന സംശയത്തിൽ വിന്നിപെഗ് പൊലീസ് അന്വേഷണം ആരംഭിച്ചു. ബുധനാഴ്ച രാത്രി വാഹനത്തിലെത്തിയ രണ്ട് പേർ പെല്ലറ്റ് ഗൺ ഉപയോഗിച്ച് പള്ളിക്ക് നേരെ നിരവധി തവണ വെടിയുതിർക്കുകയും തുടർന്ന് ജനൽച്ചില്ലുകൾ തകർക്കുകയും ചെയ്തതായി പൊലീസ് അറിയിച്ചു. സംഭവത്തിൽ ആർക്കും പരിക്കേറ്റിട്ടില്ലെങ്കിലും ഏകദേശം 3,000 ഡോളറിന്റെ നാശനഷ്ടമുണ്ടായെന്നാണ് കണക്കാക്കുന്നത്.

സംഭവത്തിന് പിന്നാലെ പള്ളിയുടെ പരിസരത്ത് ചില്ലുകൾ ചിതറിക്കിടക്കുന്നതായും തകർന്ന ജനലുകൾ താൽക്കാലികമായി അടച്ചുപൂട്ടിയതായും അധികൃതർ അറിയിച്ചു. ആക്രമണത്തിന് മുമ്പ് അതേ ദിവസം പള്ളിക്ക് പുറത്തുകൂടിയിരുന്നവർക്കുനേരെ പ്രതികൾ വംശീയ അധിക്ഷേപങ്ങൾ മുഴക്കിയതായും സെന്റർ ആരോപിച്ചു. പള്ളിക്ക് നേരെ വെടിയുതിർന്നതും സ്വത്ത് നശിപ്പിച്ചതും ഉൾപ്പെടെയുള്ള ഈ സംഭവം വിദ്വേഷപ്രേരിത കുറ്റകൃത്യമായി പരിഗണിച്ചാണ് അന്വേഷണം നടക്കുന്നതെന്ന് വിന്നിപെഗ് പൊലീസ് വ്യക്തമാക്കി.

റഹ്മ ഇസ്ലാമിക് സെന്ററിനും സമീപത്തെ മറ്റ് പള്ളികൾക്കും ചുറ്റുമുള്ള പൊലീസ് പട്രോളിംഗും ശക്തമാക്കിയിട്ടുണ്ട്. സംഭവം വിന്നിപെഗിലെ മുസ്ലിം സമൂഹത്തിൽ വലിയ ആശങ്കയ്ക്ക് ഇടയാക്കി. പ്രാർഥനയ്ക്കായി വിശ്വാസികൾ സമാധാനപരമായി ഒത്തുകൂടിയിരിക്കെയായിരുന്നു ആക്രമണമെന്ന് സെന്ററിന്റെ ഡയറക്ടറും ഇമാമുമായ ഫൈസൽ ആദം പറഞ്ഞു. ആരാധനാലയങ്ങളിൽ അംഗങ്ങൾ അനുഭവിച്ചിരുന്ന സുരക്ഷാബോധത്തിന് ഈ സംഭവം വലിയ ആഘാതമാണെന്നും കുറ്റക്കാർക്കെതിരെ കർശന നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.

സമൂഹം മാനസികമായി വലിയ ആഘാതത്തിലാണ് കഴിയുന്നതെന്നും നിരവധി കുടുംബങ്ങൾ ഭയന്നിരിക്കുകയാണെന്നും മാനിറ്റോബ ഇസ്ലാമിക് അസോസിയേഷന്റെ ഭാരവാഹിയായ നോറിസ് സെയ്ദ് പ്രതികരിച്ചു. സംഭവത്തെ തുടർന്ന് നിരവധി രാഷ്ട്രീയ നേതാക്കൾ ശക്തമായ അപലപനവുമായി രംഗത്തെത്തി. പള്ളിയുടെ അറ്റകുറ്റപ്പണികൾക്കുള്ള ചെലവ് മാനിറ്റോബ സർക്കാർ വഹിക്കുമെന്ന് പ്രവിശ്യയുടെ കായിക, സംസ്കാര, പൈതൃക, ടൂറിസം മന്ത്രി നെല്ലി കെനഡി അറിയിച്ചു.

വിന്നിപെഗ് മേയർ സ്കോട്ട് ഗില്ലിംഗം നഗരത്തിൽ വിദ്വേഷത്തിനും ഭീഷണിപ്പെടുത്തലിനും ഇസ്ലാമോഫോബിയയ്ക്കും സ്ഥാനമില്ലെന്ന് വ്യക്തമാക്കി. കുറ്റവാളികളെ നിയമത്തിന് മുന്നിലെത്തിക്കാൻ പൊലീസ് നടത്തുന്ന അന്വേഷണത്തിന് പൂർണ പിന്തുണയുണ്ടെന്ന് പ്രധാനമന്ത്രി മാർക്ക് കാർണിയും അറിയിച്ചു. ഇതുവരെ സംഭവവുമായി ബന്ധപ്പെട്ട് ആരെയും അറസ്റ്റ് ചെയ്തിട്ടില്ല. അതേസമയം, ഇത്തരം ആക്രമണങ്ങൾ ഉണ്ടായാലും ആരാധനയിലും സാമൂഹിക ജീവിതത്തിലും നിന്ന് മുസ്ലിം സമൂഹത്തെ പിന്തിരിപ്പിക്കാനാവില്ലെന്ന് നേതാക്കൾ വ്യക്തമാക്കി.

2017-ൽ ക്യുബെക്കിലെ ഒരു പള്ളിയിലുണ്ടായ ആക്രമണത്തിൽ ആറുപേർ കൊല്ലപ്പെട്ടതും 2021-ൽ ഒന്റാറിയോയിലെ ലണ്ടനിൽ മുസ്ലിം കുടുംബത്തിലെ നാല് പേർ ട്രക്ക് ആക്രമണത്തിൽ കൊല്ലപ്പെട്ടതുമുള്‍പ്പെടെയുള്ള സംഭവങ്ങളുടെ ഓർമ്മകൾ ഈ ആക്രമണം വീണ്ടും ഉയർത്തിക്കൊണ്ടുവന്നതായും അവർ ചൂണ്ടിക്കാട്ടി.

Pellet gun attack on Islamic Centre in Winnipeg

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt