ഷാർലറ്റ്ടൗൺ: പ്രിൻസ് എഡ്വേർഡ് ഐലൻഡിൽ വ്യക്തിഗത സേവന ദാതാക്കൾക്കുള്ള ആരോഗ്യ-സുരക്ഷാ മാനദണ്ഡങ്ങൾ കർശനമാക്കുന്നു. ബാർബർ ഷോപ്പുകൾ, ബ്യൂട്ടി പാർലറുകൾ, നെയിൽ കെയർ സെന്ററുകൾ, ടാറ്റൂ, പിയേഴ്സിങ് കേന്ദ്രങ്ങൾ തുടങ്ങി ശരീര സൗന്ദര്യവുമായി ബന്ധപ്പെട്ട എല്ലാ സ്ഥാപനങ്ങളിലും ഇനി മുതൽ പതിവ് പരിശോധനകൾ നിർബന്ധമാക്കും. പൊതുജനാരോഗ്യ നിയമത്തിലെ ഭേദഗതികൾക്ക് പിന്നാലെയാണ് ആരോഗ്യ മന്ത്രാലയം ഇതിനായുള്ള പുതിയ കരട് നിയമം പുറത്തിറക്കിയത്.
നിലവിൽ ടാറ്റൂ, പിയേഴ്സിങ് കേന്ദ്രങ്ങളിൽ മാത്രമാണ് കൃത്യമായ ഇടവേളകളിൽ പരിശോധന നടക്കുന്നത്. ബാക്കിയുള്ള സ്ഥാപനങ്ങളിൽ പരാതികൾ ലഭിച്ചാൽ മാത്രമേ അധികൃതർ പരിശോധനയ്ക്ക് എത്താറുള്ളൂ. എന്നാൽ പുതിയ നിയമം നടപ്പിലാകുന്നതോടെ എല്ലാ സ്ഥാപനങ്ങളും പതിവ് പരിശോധനയ്ക്ക് വിധേയമാകേണ്ടി വരും. അണുബാധ തടയുന്നതിനുള്ള കർശന നിർദ്ദേശങ്ങൾ പാലിക്കുന്നതിനോടൊപ്പം, സ്ഥാപനങ്ങൾ സർക്കാരിൽ രജിസ്റ്റർ ചെയ്യുകയും മൂന്ന് വർഷത്തേക്ക് 100 ഡോളർ ഫീസ് അടയ്ക്കുകയും വേണം.
ഉപകരണങ്ങൾ കൃത്യമായി അണുവിമുക്തമാക്കുക, ജീവനക്കാർക്ക് സുരക്ഷിതമായ രീതികളെക്കുറിച്ച് പരിശീലനം നൽകുക, ഉയർന്ന ശുചിത്വം ഉറപ്പാക്കുക എന്നിവയാണ് പുതിയ ചട്ടങ്ങളിലെ പ്രധാന നിർദ്ദേശങ്ങൾ. ഈ മാറ്റം ജനങ്ങൾക്ക് കൂടുതൽ ആത്മവിശ്വാസം നൽകുമെന്നും, ജീവനക്കാരുടെയും ഉപഭോക്താക്കളുടെയും സുരക്ഷ ഉറപ്പാക്കാൻ ഇത് സഹായിക്കുമെന്നും എൻവയോൺമെന്റൽ ഹെൽത്ത് ഡയറക്ടർ താന്യ ഒബ്രിയൻ വ്യക്തമാക്കി. വ്യക്തമായ നിയമങ്ങൾ നടപ്പിലാക്കുന്നത് വഴി സേവനങ്ങളുടെ നിലവാരം ഉയർത്താനും സാധിക്കും.
കരട് നിയമത്തിൻമേലുള്ള പൊതുജനാഭിപ്രായം ജനുവരി ആദ്യം വരെ അറിയിക്കാം. ഫെബ്രുവരി മുതലായിരിക്കും പുതിയ നിയമം പ്രാബല്യത്തിൽ വരിക. നിയമം നടപ്പിലാക്കുന്നതിന്റെ ആദ്യഘട്ടത്തിൽ ശിക്ഷാ നടപടികൾക്ക് പകരം, പുതിയ മാറ്റങ്ങളെക്കുറിച്ച് സ്ഥാപന ഉടമകളെ ബോധവൽക്കരിക്കാനാണ് അധികൃതർ ലക്ഷ്യമിടുന്നത്. ഇതിനായി ഉദ്യോഗസ്ഥർ സ്ഥാപനങ്ങൾ സന്ദർശിച്ച് വേണ്ട നിർദ്ദേശങ്ങൾ നൽകുമെന്ന് അധികൃതർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
PEI tightens inspections at beauty salons; new rules effective February
