പേപ്പർ രേഖകൾക്ക് വിട: രോഗിവിവരങ്ങൾ ഇനി ഒരൊറ്റ ക്ലിക്കിൽ; മാനിറ്റോബയിലെ ആശുപത്രികൾ ഡിജിറ്റലിലേക്ക്

വിന്നിപെഗ്: എല്ലാ ആശുപത്രികളിലും രോഗികളുടെ ചികിത്സാ വിവരങ്ങൾ പരസ്പരം പങ്കിടാൻ കഴിയുന്ന ഇലക്ട്രോണിക് പേഷ്യന്റ് റെക്കോർഡ് (EPR) സംവിധാനം 2027 മാർച്ചോടെ പൂർണ്ണമായി നടപ്പിലാക്കാൻ ഒരുങ്ങി മാനിറ്റോബ. ഒരു ആശുപത്രിയിൽ ചികിത്സ നേടിയ രോഗിയുടെ മെഡിക്കൽ ഹിസ്റ്ററി മറ്റൊരു ആശുപത്രിയിലെ ഡോക്ടർമാർക്കും ഉടനടി ലഭ്യമാക്കുക എന്ന ലക്ഷ്യത്തോടെയാണ് ഈ അത്യാധുനിക ഡിജിറ്റൽ പദ്ധതി സർക്കാർ നടപ്പിലാക്കുന്നത്. ലേക്ക്ഷോർ ജനറൽ ആശുപത്രിയിൽ നിലവിൽ പരീക്ഷണാടിസ്ഥാനത്തിൽ വിജയകരമായി പ്രവർത്തിക്കുന്ന ഈ സംവിധാനം വഴി ഫാക്സ്, ഫോൺ സന്ദേശങ്ങൾ തുടങ്ങിയ പരമ്പരാഗത മാർഗ്ഗങ്ങൾ ഒഴിവാക്കാനും ഏതാനും നിമിഷങ്ങൾക്കുള്ളിൽ രോഗിവിവരങ്ങൾ സുരക്ഷിതമായി കൈമാറാനും ഡോക്ടർമാർക്ക് സാധിക്കുന്നുണ്ട്.

രോഗിയുടെ മരുന്നുകൾ, രോഗനിർണ്ണയങ്ങൾ, മുൻകാല ചികിത്സാ കുറിപ്പുകൾ, വിവിധ വിദഗ്ധരുടെ നിർദ്ദേശങ്ങൾ എന്നിവയെല്ലാം ഉൾപ്പെടുന്ന ഈ സംവിധാനം രോഗികൾക്ക് കൂടുതൽ സുരക്ഷ ഉറപ്പാക്കും. രോഗിയുടെ വ്യക്തിഗത ആരോഗ്യ തിരിച്ചറിയൽ നമ്പർ (PHIN) ഉപയോഗിച്ചാണ് വിവിധ ആശുപത്രികളിൽ നിന്ന് ഈ വിവരങ്ങൾ ഡോക്ടർമാർ ലഭ്യമാക്കുന്നത്. വിവരങ്ങൾ തിരയാൻ ഡോക്ടർമാർക്ക് ചെലവാകുന്ന സമയം ഗണ്യമായി കുറയുന്നതോടെ രോഗീ പരിചരണത്തിന് കൂടുതൽ സമയം ലഭിക്കുമെന്നും, കൈയെഴുത്ത് രേഖകളിൽ നിന്നുണ്ടാകാൻ സാധ്യതയുള്ള പിഴവുകൾ പൂർണ്ണമായി ഒഴിവാക്കാൻ സാധിക്കുമെന്നും ആരോഗ്യവിദഗ്ദ്ധർ വ്യക്തമാക്കുന്നു. പ്രവിശ്യയുടെ പദ്ധതി പ്രകാരം 2027 മാർച്ച് 31-നകം എല്ലാ അടിയന്തിര വിഭാഗങ്ങളും (Emergency Departments), ഇൻ-പേഷ്യന്റ് യൂണിറ്റുകളും, അടിയന്തിര ചികിത്സാ കേന്ദ്രങ്ങളും ഈ ഡിജിറ്റൽ ശൃംഖലയുടെ കീഴിലാകും. എന്നാൽ ഒന്നാം ഘട്ടത്തിൽ കുടുംബ ഡോക്ടർമാർക്കും ഫാർമസിസ്റ്റുകൾക്കും ഈ രേഖകൾ നേരിട്ട് ലഭ്യമാകില്ല.

ആരോഗ്യമന്ത്രി ഉസോമ അസഗ്വാരയുടെ നേതൃത്വത്തിൽ 160 മില്യൺ ഡോളറിലധികം ചെലവഴിച്ചാണ് ഈ പദ്ധതി പുരോഗമിക്കുന്നത്. നിലവിൽ സെന്റ് ബോണിഫേസ് ഹോസ്പിറ്റൽ, വിമൻസ് ഹോസ്പിറ്റൽ, ബ്രാൻഡൺ, അഷേൺ, പോർട്ടേജ് ലാ പ്രെയ്റി, നീപാവ തുടങ്ങിയ പ്രമുഖ കേന്ദ്രങ്ങളിൽ ഈ സംവിധാനം പ്രവർത്തിക്കുന്നുണ്ടെന്നും പ്രവിശ്യയിലെ ഏറ്റവും വലിയ ആശുപത്രിയായ ഹെൽത്ത് സയൻസസ് സെന്റർ വരും ഓഗസ്റ്റിൽ ഈ പദ്ധതിയുടെ ഭാഗമാകുമെന്നും അധികൃതർ അറിയിച്ചു. സാങ്കേതിക തകരാറുകൾക്കുള്ള സാധ്യത മുൻനിർത്തി പൂർണ്ണമായ പേപ്പർ രഹിത ആരോഗ്യസംവിധാനത്തിലേക്ക് മാറാൻ ഇനിയും വർഷങ്ങൾ വേണ്ടിവരുമെന്നും ചില മേഖലകളിൽ പേപ്പർ രേഖകൾ തൽക്കാലം തുടരുമെന്നും ആരോഗ്യവകുപ്പ് കൂട്ടിച്ചേർത്തു.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Goodbye to paper records: Patient information now just a click away; Manitoba hospitals go digital