ഒട്ടാവ : ഒട്ടാവ ബൈലോ ആൻഡ് റെഗുലേറ്ററി സർവീസസ് പുറത്തുവിട്ട 2025-ലെ വാർഷിക റിപ്പോർട്ട് പ്രകാരം കഴിഞ്ഞ വർഷം ആകെ 4,76,342 പാർക്കിംഗ് ടിക്കറ്റുകളാണ് വിതരണം ചെയ്തത്. 2024-ൽ ഇത് 4,52,202 ആയിരുന്നു. ഏപ്രിൽ 16-ന് എമർജൻസി ആൻഡ് പ്രൊട്ടക്റ്റീവ് സർവീസസ് കമ്മിറ്റിക്ക് സമർപ്പിക്കാനിരിക്കുന്ന റിപ്പോർട്ടിൽ, പാർക്കിംഗ് എൻഫോഴ്സ്മെന്റ് ആവശ്യപ്പെട്ടുള്ള പരാതികളിൽ റെക്കോർഡ് വർധനവുണ്ടായതായി അധികൃതർ വ്യക്തമാക്കി. കഴിഞ്ഞ വർഷം ലഭിച്ച 50,786 പരാതികളിൽ ഭൂരിഭാഗവും സ്കൂൾ മേഖലകളിൽ നിന്നും റെസിഡൻഷ്യൽ ഏരിയകളിൽ നിന്നുമായിരുന്നു.
സ്വകാര്യ വസ്തുക്കളിൽ അനുമതിയില്ലാതെ വാഹനം പാർക്ക് ചെയ്യുന്നതാണ് ഏറ്റവും വലിയ നിയമലംഘനമായി റിപ്പോർട്ടിൽ ചൂണ്ടിക്കാട്ടുന്നത്. ഈ വിഭാഗത്തിൽ മാത്രം 1,26,286 ടിക്കറ്റുകൾ നൽകി. ആകെ ടിക്കറ്റുകളുടെ നാലിലൊന്നിലധികം വരുമിത്. ഇതിനുപുറമെ, നോ-സ്റ്റോപ്പിംഗ് ഏരിയകളിൽ വാഹനങ്ങൾ നിർത്തിയതിന് 54,043 ടിക്കറ്റുകളും, മൂന്ന് മണിക്കൂറിൽ കൂടുതൽ പാർക്ക് ചെയ്തതിന് 41,277 ടിക്കറ്റുകളും വിതരണം ചെയ്തു.
നോ-പാർക്കിംഗ് മേഖലകളിൽ വാഹനം നിർത്തിയതിന് 38,488 കേസുകളാണ് രജിസ്റ്റർ ചെയ്തത്.
പാർക്കിംഗ് നിയമലംഘനങ്ങൾക്കുള്ള പിഴ ശിക്ഷ 60 ഡോളർ മുതൽ 130 ഡോളർ വരെയാണ്. എന്നാൽ പിഴ തുക നേരത്തെ അടയ്ക്കുന്നവർക്ക് ഇളവുകൾ ലഭ്യമാണ്. നഗര സുരക്ഷയെയും ഗതാഗതത്തെയും ബാധിക്കുന്ന വിധത്തിൽ നോ-സ്റ്റോപ്പിംഗ് മേഖലകളിൽ വാഹനം നിർത്തുന്നതിനെ ഗൗരവകരമായാണ് അധികൃതർ കാണുന്നത്. പാർക്കിംഗ് സ്ഥലങ്ങളുടെ കുറവാണ് സമയപരിധി ലംഘിച്ചുള്ള പാർക്കിംഗുകൾ വർധിക്കാൻ കാരണമെന്ന് റിപ്പോർട്ടിൽ വിലയിരുത്തുന്നു.
ബൈലോ സർവീസസിന് കഴിഞ്ഞ വർഷം ലഭിച്ച ആകെ പരാതികളിൽ 46 ശതമാനവും പാർക്കിംഗുമായി ബന്ധപ്പെട്ടവയായിരുന്നു. പ്രോപ്പർട്ടി സ്റ്റാൻഡേർഡ് സംബന്ധിച്ച് 15 ശതമാനവും മൃഗസംരക്ഷണവുമായി ബന്ധപ്പെട്ട് 11 ശതമാനവും ശബ്ദമലിനീകരണം സംബന്ധിച്ച് 9 ശതമാനവും പരാതികളാണ് ലഭിച്ചത്. മൃഗസംരക്ഷണവുമായി ബന്ധപ്പെട്ട പരാതികളിൽ മുൻവർഷത്തെ അപേക്ഷിച്ച് നേരിയ കുറവുണ്ടായപ്പോൾ ശബ്ദമലിനീകരണ പരാതികൾ 9,903 ആയി വർധിച്ചുവെന്നും റിപ്പോർട്ട് വ്യക്തമാക്കുന്നു.
Parking violations on the rise in Ottawa; 476,000 tickets issued in 2025
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
