പ്രിൻസ് എഡ്വേഡ് ഐലൻഡ്; ന്യൂ ബ്രൺസ്വിക്കിൽ ഈ ആഴ്ച ഉണ്ടായ ആംബുലൻസ് അപകടത്തിൽ മരിച്ച പ്രിൻസ് എഡ്വേഡ് ഐലൻഡ് സ്വദേശികളായ ഐലൻഡ് ഇ.എം.എസ് പാരാമെഡിക്കുകളായ മൈക്ക് മക്കെൻസി (56), ജെന്ന ക്രൗച്ചർ (23) എന്നിവരുടെ മൃതദേഹങ്ങൾ വെള്ളിയാഴ്ച പി.ഇ.ഐയിലേക്ക് എത്തിച്ചത് വൻ ജനാവലിയോടെ. റോത്ത്സെയിലെ ഹൈവേ 1-നടുത്തുള്ള സ്ഥലത്ത് നിന്ന് ആരംഭിച്ച യാത്ര ന്യൂ ബ്രൺസ്വിക്കിലൂടെ കോൺഫെഡറേഷൻ പാലം കടന്ന് സോറിസിലെ ഡിങ്വെൽ ഫ്യൂണറൽ ഹോമിലെത്തുംവരെ നിരവധി പേർ റോഡരികിൽ നിരന്ന് അന്തിമോപചാരം അർപ്പിച്ചു.
ഫയർഫോഴ്സ്, ആർ.സി.എം.പി., മറ്റ് അടിയന്തരസേവന വിഭാഗങ്ങൾ എന്നിവരും വിവിധ ഇടങ്ങളിൽ ഗാർഡ് ഓഫ് ഓണർ ഒരുക്കി ആദരവ് രേഖപ്പെടുത്തി. ആദ്യ പ്രതികരണ സേനാംഗങ്ങളെ പിന്തുണയ്ക്കുന്ന അറ്റ്ലാന്റിക് 911 റൈഡ് ഫൗണ്ടേഷന്റെ നേതൃത്വത്തിലായിരുന്നു ഘോഷയാത്ര. ഇരുവരും സംഘടനയുടെ പ്രവർത്തനങ്ങളിൽ സജീവ സാന്നിധ്യമായിരുന്നുവെന്നും സമൂഹസേവനത്തിൽ എല്ലായ്പ്പോഴും മുന്നിലുണ്ടായിരുന്നവരാണെന്നും സംഘാടകർ പറഞ്ഞു.
ജെന്നയുടെ പിതാവും പി.ഇ.ഐ വിദ്യാഭ്യാസ മന്ത്രിയുമായ റോബിൻ ക്രൗച്ചർ മകളുടെ മൃതദേഹം ദ്വീപിലേക്ക് എത്തിക്കുന്ന വാഹനവ്യൂഹത്തിന്റെ ഭാഗത്തെ നയിച്ചു. ചൊവ്വാഴ്ച കോൺഫെഡറേഷൻ പാലത്തിന് സമീപമുള്ള മെൽറോസിൽ റൂട്ട് 16-ൽ ആംബുലൻസും ട്രാൻസ്പോർട്ട് ട്രക്കും കൂട്ടിയിടിച്ചുണ്ടായ അപകടത്തിലാണ് മൈക്ക്, ജെന്ന, ആംബുലൻസിലുണ്ടായിരുന്ന 77-കാരിയായ രോഗി എന്നിവർ മരിച്ചത്. അപകടസമയത്ത് ആംബുലൻസ് ഓടിച്ചിരുന്നത് മൈക്ക് മക്കെൻസിയായിരുന്നു.
ജെന്ന ഏവരോടും എളുപ്പത്തിൽ ബന്ധം സ്ഥാപിക്കാൻ കഴിവുള്ള അപൂർവ വ്യക്തിത്വമായിരുന്നുവെന്നും സെപ്റ്റംബറിൽ വിവാഹത്തിന് തയ്യാറെടുക്കുകയായിരുന്നുവെന്നും പിതാവ് പറഞ്ഞു. കുട്ടികളുടെ ആരോഗ്യപരിപാലനത്തിനായി പ്രവർത്തിക്കുന്ന ഐ.ഡബ്ല്യു.കെ ഫൗണ്ടേഷനും ദീർഘകാല സന്നദ്ധപ്രവർത്തകനായിരുന്ന മൈക്ക് മക്കെൻസിയെ അനുസ്മരിച്ചു.
ഇതിനിടെ ഇരുവരുടെയും കുടുംബങ്ങളെ സഹായിക്കാൻ അറ്റ്ലാന്റിക് 911 റൈഡ് ഫൗണ്ടേഷനും ഐലൻഡ് ഇ.എം.എസ്ും ചേർന്ന് ആരംഭിച്ച ധനശേഖരണത്തിലൂടെ വെള്ളിയാഴ്ച ഉച്ചയോടെ 70,000 ഡോളറിലധികം സമാഹരിച്ചതായും അധികൃതർ അറിയിച്ചു. സമാഹരിക്കുന്ന തുക സംസ്കാരച്ചെലവും മറ്റ് അടിയന്തര സാമ്പത്തിക ആവശ്യങ്ങൾക്കും വിനിയോഗിക്കുമെന്ന് സംഘാടകർ വ്യക്തമാക്കി.
Paramedics who lost their lives in the line of duty given an emotional farewell by PEI.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
