സെന്റ്ജോൺ : പ്രമുഖ വിമാന കമ്പനിയായ പിഎഎൽ എയർലൈൻസിലെ പൈലറ്റുമാരും ഫ്ലൈറ്റ് അറ്റൻഡന്റുകളും പുതിയ കൂട്ടായ കരാറിനായി ഫെഡറൽ ലേബർ ബോർഡിന്റെ മധ്യസ്ഥത തേടി. ഒരു വർഷത്തിലേറെയായി പുതിയ കരാറിനായുള്ള ചർച്ചകൾ നടന്നെങ്കിലും കമ്പനിയുമായി ധാരണയിലെത്താൻ സാധിക്കാത്തതിനെ തുടർന്നാണ് ഇരു വിഭാഗവും ഒരേസമയം കൺസിലിയേഷൻ അഥവാ മധ്യസ്ഥത ആവശ്യപ്പെട്ടത്. കിഴക്കൻ കാനഡയിലും ലബ്രഡോറിലും പ്രധാന സർവീസ് നടത്തുന്ന പിഎഎൽ എയർലൈൻസിൽ സമരം ഉണ്ടാകാനുള്ള സാധ്യത നിലനിൽക്കുന്നതായി വിദഗ്ധർ ചൂണ്ടിക്കാണിക്കുന്നു.
കൂട്ടായ കരാർ ചർച്ചകളിൽ ഇരുപക്ഷത്തിനും സമവായത്തിൽ എത്താൻ കഴിയാതെ വരുമ്പോൾ മധ്യസ്ഥനെ തേടുന്നത് സാധാരണമാണെങ്കിലും, പൈലറ്റുമാരുടെയും ഫ്ലൈറ്റ് അറ്റൻഡന്റുകളുടെയും യൂണിയനുകൾ ഒരേ സമയം സമീപിക്കുന്നത് കമ്പനിക്ക് മേൽ വലിയ സമ്മർദ്ദം ചെലുത്തുന്നുണ്ട്. മധ്യസ്ഥൻ ചുമതലയേറ്റ ശേഷം 60 ദിവസത്തിനകം ഇരുവിഭാഗവുമായി ചർച്ച നടത്തി കരാറിലെത്താൻ ശ്രമിക്കും. അതിനുശേഷമുള്ള 21 ദിവസത്തെ കൂളിംഗ് ഓഫ് കാലയളവിനു ശേഷമേ യൂണിയനുകൾക്ക് സമരം പോലുള്ള സംഘടിത നടപടികളിലേക്ക് കടക്കാൻ സാധിക്കൂ എന്ന് എയർലൈൻ പൈലറ്റ്സ് അസോസിയേഷൻ (ALPA) വ്യക്തമാക്കി.
കൂടുതൽ ശമ്പളം, മെച്ചപ്പെട്ട ഡ്യൂട്ടി ഷെഡ്യൂളിംഗ്, ജോലി സാഹചര്യങ്ങൾ, വർക്ക്-ലൈഫ് ബാലൻസ് എന്നിവയാണ് ഫ്ലൈറ്റ് അറ്റൻഡന്റുകളും പൈലറ്റുമാരും പ്രധാനമായും ആവശ്യപ്പെടുന്നത്. പ്രതികൂല കാലാവസ്ഥ കാരണം ഗ്രൗണ്ടിൽ തങ്ങേണ്ടി വരുമ്പോൾ ശമ്പളം ലഭിക്കാത്ത സാഹചര്യം മാറണമെന്നും ഗ്രൗണ്ട് പേ വേണമെന്നുമാണ് കനേഡിയൻ യൂണിയൻ ഓഫ് പബ്ലിക് എംപ്ലോയീസ് (CUPE) ഫ്ലൈറ്റ് അറ്റൻഡന്റുകൾ ഉന്നയിക്കുന്ന പ്രധാന ആവശ്യം.
കമ്പനി ചർച്ചകളിൽ തങ്ങളെ വടംവലിച്ച് സമയം നീട്ടിക്കൊണ്ടുപോവുകയാണെന്നും പ്രശ്നത്തിന് പരിഹാരമായില്ലെങ്കിൽ സമരം പോലുള്ള കടുത്ത നടപടികളിലേക്ക് കടക്കേണ്ടി വരുമെന്നും യൂണിയൻ ഭാരവാഹികൾ മുന്നറിയിപ്പ് നൽകുന്നു. എന്നാൽ ചർച്ചാ പ്രക്രിയയെ സ്വാഗതം ചെയ്യുന്നതായും ഇരുവിഭാഗത്തിനും പ്രയോജനകരമായ കരാറിലെത്താൻ അനുകൂലമായ സമീപനം തുടരുമെന്നും പിഎഎൽ സീനിയർ വൈസ് പ്രസിഡന്റ് ജോസഫ് ഗാലിംബെർട്ടി വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
