കറാച്ചി: പാകിസ്താനിലെ കറാച്ചിയിലുണ്ടായ ഭീകരാക്രമണത്തിന് മറുപടിയായി അഫ്ഗാനിസ്ഥാൻ അതിർത്തി കടന്ന് പാക് സൈന്യം ശക്തമായ കര, വ്യോമാക്രമണങ്ങൾ നടത്തി. ഞായറാഴ്ച അഫ്ഗാനിലെ പക്തിയ, പക്തിക, കുനാർ മേഖലകളിലെ ഭീകരകേന്ദ്രങ്ങൾ ലക്ഷ്യമിട്ട് നടത്തിയ ആക്രമണങ്ങളിൽ 29 ഭീകരരെ വധിച്ചതായി പാക് വാർത്താവിനിമയ മന്ത്രി അത്തൗള്ള തരാർ അവകാശപ്പെട്ടു. അതേസമയം, പാകിസ്താന്റേത് ഭീരുത്വം നിറഞ്ഞ ആക്രമണമാണെന്നും ഇതിൽ സാധാരണക്കാരാണ് കൊല്ലപ്പെട്ടതെന്നും അഫ്ഗാനിലെ താലിബാൻ ഭരണകൂടം പ്രതികരിച്ചു.
കഴിഞ്ഞദിവസം പാകിസ്താനിലെ കറാച്ചിയിൽ അർധസൈനിക വിഭാഗമായ സിന്ധ് റേഞ്ചേഴ്സിന്റെ പ്രാദേശിക ആസ്ഥാനത്തിന് നേരെ ഭീകരസംഘടനയായ തെഹ്റീകെ താലിബാൻ പാകിസ്താന്റെ (ടിടിപി) വിഘടനവാദ ഗ്രൂപ്പായ ജമാഅത്തുൽ അഹ്റാർ ആക്രമണം നടത്തിയിരുന്നു. സ്ഫോടകവസ്തുക്കൾ നിറച്ച വാഹനം ആസ്ഥാനത്തിന്റെ പ്രധാന കവാടത്തിലേക്ക് ഇടിച്ചുകയറ്റി നടത്തിയ ഈ സ്ഫോടനത്തിലും തുടർന്നുള്ള വെടിവെപ്പിലും മൂന്ന് സൈനികർ കൊല്ലപ്പെട്ടു. തുടർന്ന് പാക് സൈന്യം നടത്തിയ പ്രത്യാക്രമണത്തിൽ മൂന്ന് ഭീകരരെ വധിക്കുകയും പരിക്കേറ്റ ഒരു അഫ്ഗാൻ സ്വദേശിയെ അറസ്റ്റ് ചെയ്യുകയും ചെയ്തിരുന്നു. ഈ സംഭവത്തിന് തൊട്ടുപിന്നാലെയാണ് അതിർത്തി കടന്നുള്ള പാകിസ്താന്റെ സൈനിക നടപടി.
പാകിസ്താനിൽ നിരന്തരം ആക്രമണങ്ങൾ നടത്തുന്ന ടിടിപി ഉൾപ്പെടെയുള്ള ഭീകരസംഘടനകൾക്ക് അഫ്ഗാനിസ്ഥാനിലെ താലിബാൻ ഭരണകൂടം താവളമൊരുക്കുന്നുവെന്നാണ് ഇസ്ലാമാബാദിന്റെ പ്രധാന ആരോപണം. എന്നാൽ തങ്ങളുടെ മണ്ണ് ഭീകരവാദത്തിനായി ഉപയോഗിക്കാൻ അനുവദിക്കുന്നില്ലെന്ന് കാബൂൾ ആവർത്തിച്ച് വ്യക്തമാക്കുന്നു. ഈ തർക്കത്തെച്ചൊല്ലി ഇരുരാജ്യങ്ങളും തമ്മിൽ കഴിഞ്ഞ കുറച്ചുമാസങ്ങളായി അതിർത്തിയിൽ കടുത്ത സായുധ സംഘർഷങ്ങൾ നിലനിൽക്കുന്നുണ്ട്. പുതിയ ആക്രമണങ്ങളുടെ പശ്ചാത്തലത്തിൽ ഇരുരാജ്യങ്ങളും തമ്മിലുള്ള നയതന്ത്ര ബന്ധം കൂടുതൽ വഷളാകുമെന്നാണ് വിലയിരുത്തലുകൾ.
Pakistan retaliates on Afghan border; claims to have killed 29 terrorists
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
