തീരദേശ മേഖലകളിൽ രോ​ഗം പടരുന്നു, കക്കകൾ ചത്തുപൊങ്ങുന്നു, പി.ഇ.ഐ.യിലെ കർഷകർ പ്രതിസന്ധിയിൽ

പ്രിൻസ് എഡ്വേർഡ് ഐലൻഡ്: കാനഡയിലെ പ്രമുഖ കക്ക (Oyster) ഉൽപ്പാദന മേഖലയായ പ്രിൻസ് എഡ്വേർഡ് ഐലൻഡിലെ കർഷകർ കടുത്ത പ്രതിസന്ധിയിൽ. തീരദേശ മേഖലകളിൽ പടർന്നുപിടിക്കുന്ന മാരകമായ രോഗബാധയെത്തുടർന്ന് കക്കകൾ കൂട്ടത്തോടെ ചത്തുപോകുന്ന സാഹചര്യത്തിൽ, കൃഷി പൂർണ്ണമായും ഉപേക്ഷിക്കുന്നതിനെക്കുറിച്ച് ആലോചിക്കുകയാണ് പല ചെറുകിട കർഷകരും.

വെസ്റ്റേൺ പി.ഇ.ഐ.യിലെ ഡോക്ക് നദിയിൽ കക്ക കൃഷി നടത്തുന്ന ബ്രൂസ് റിച്ചാർഡ്, കൈല റിച്ചാർഡ് ദമ്പതിമാരുടെ അവസ്ഥ ഇതിനൊരു ഉദാഹരണമാണ്. തുടർച്ചയായ രണ്ടാം വർഷവും ഇവരുടെ കൃഷി പൂർണ്ണമായും തകർന്നു. ഈ സീസണിൽ കേവലം പത്ത് ശതമാനത്തിൽ താഴെ കക്കകൾ മാത്രമാണ് ഇവരുടെ കൃഷിയിടത്തിൽ ജീവനോടെയുള്ളത്. വീട് പണയപ്പെടുത്തി എടുത്ത ലോണിന്റെ തിരിച്ചടവ് പോലും മുടങ്ങിയ സാഹചര്യത്തിൽ ഇനിയും മുന്നോട്ട് പോകാൻ കഴിയില്ലെന്നാണ് ഇവർ പറയുന്നത്.

മനുഷ്യന്റെ ആരോഗ്യത്തിന് ഹാനികരമല്ലെങ്കിലും കക്കകൾക്ക് ജീവഹാനിയുണ്ടാക്കുന്ന ‘MSX’, ‘Dermo’ എന്നീ പരാദ രോഗങ്ങളാണ് കാനഡയിലെ രണ്ടാമത്തെ വലിയ കക്ക ഉൽപ്പാദന പ്രവിശ്യയായ ഇവിടെ വില്ലനായിരിക്കുന്നത്. സാധാരണയായി ഒരു കക്ക വിപണിയിലെത്താൻ മൂന്ന് മുതൽ അഞ്ച് വർഷം വരെ സമയമെടുക്കും. വർഷങ്ങളോളം പണവും അധ്വാനവും മുടക്കിയ ശേഷമാണ് കർഷകർക്ക് ഈ വലിയ തിരിച്ചടി നേരിടേണ്ടി വരുന്നത്. ചില കർഷകർക്ക് നൂറ് ശതമാനം ഉൽപ്പാദന നഷ്ടം സംഭവിച്ചതായി പി.ഇ.ഐ. അക്വാകൾച്ചർ അലയൻസ് എക്സിക്യൂട്ടീവ് ഡയറക്ടർ പീറ്റർ വാരിസ് വ്യക്തമാക്കുന്നു.

പ്രതിസന്ധി പരിഹരിക്കാൻ ഫെഡറൽ-പ്രൊവിൻഷ്യൽ സർക്കാരുകൾ ധനസഹായം പ്രഖ്യാപിച്ചിട്ടുണ്ട്. രോഗപ്രതിരോധ ശേഷിയുള്ള കക്ക വിത്തുകൾ വാങ്ങാനും ലൈസൻസ് തിരികെ വാങ്ങാനുമായി 4.2 മില്യൺ ഡോളറിലധികം അനുവദിച്ചു. പി.ഇ.ഐ. പ്രവിശ്യാ സർക്കാർ ശമ്പള സഹായവും പലിശ ഇളവുകളും ഉൾപ്പെടെ 12 മില്യൺ ഡോളറിന്റെ പാക്കേജും പ്രഖ്യാപിച്ചിട്ടുണ്ട്. എന്നാൽ കടബാധ്യതയുള്ള കർഷകർക്കായുള്ള പലിശ ഇളവ് പദ്ധതി 2027-ൽ മാത്രമേ ആരംഭിക്കൂ എന്നത് കർഷകരെ കൂടുതൽ ആശങ്കയിലാക്കുന്നു. വരും വർഷങ്ങളിൽ തങ്ങൾ എങ്ങനെ ബാങ്ക് പലിശ അടയ്ക്കുമെന്നാണ് കർഷകർ ചോദിക്കുന്നത്.

കക്കകളുടെ ലഭ്യത കുറഞ്ഞത് പ്രാദേശിക റെസ്റ്റോറന്റുകളെയും വിനോദസഞ്ചാര മേഖലയെയും ബാധിച്ചു തുടങ്ങിയിട്ടുണ്ട്. സ്റ്റാൻലി ബ്രിഡ്ജിലെ പ്രശസ്തമായ ‘കാർസ് ഓയ്സ്റ്റർ ബാർ’ ഉടമ ബ്രയാൻ കാർ പറയുന്നത്, തദ്ദേശീയമായി കക്കകൾ കിട്ടാത്ത സാഹചര്യത്തിൽ മറ്റ് സ്ഥലങ്ങളിൽ നിന്ന് ഇവ എത്തിക്കേണ്ടി വരുമെന്നാണ്. കക്ക കൃഷിയെ ആശ്രയിച്ച് കഴിയുന്ന ഗാരേജുകൾ, ബേക്കറികൾ, ഗ്യാസ് സ്റ്റേഷനുകൾ എന്നിവയുൾപ്പെടെയുള്ള ഗ്രാമീണ സമ്പദ്‌വ്യവസ്ഥയെയും ഈ പ്രതിസന്ധി ദോഷകരമായി ബാധിക്കും. തലമുറകളായി കൈമാറിവന്ന ഈ പരമ്പരാഗത തൊഴിൽ മേഖലയെ സംരക്ഷിക്കാൻ സർക്കാരിന്റെ ഭാഗത്തുനിന്ന് അടിയന്തര വരുമാന സഹായം വേണമെന്നാണ് കർഷകരുടെ പ്രധാന ആവശ്യം.

P.E.I. oyster growers consider quitting as diseases devastate farms

.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla