ഒന്റാറിയോ; ഒന്റാറിയോ പ്രവിശ്യയിലുള്ള 22 പബ്ലിക് സർവകലാശാലകളിൽ പഠിക്കുന്ന വിദേശ വിദ്യാർത്ഥികളുടെ നിർബന്ധിത ആരോഗ്യ ഇൻഷുറൻസ് (UHIP) നിരക്കുകൾ കനേഡിയൻ അധികൃതർ വർദ്ധിപ്പിച്ചു. ഓഗസ്റ്റ് 2026-ലെ പുതുക്കിയ പ്രഖ്യാപനപ്രകാരം, 2026 സെപ്റ്റംബർ 1 മുതൽ നിലവിൽ വരുന്ന ഈ മാറ്റം വഴി പ്രതിവർഷം ഓരോ വിദ്യാർത്ഥിക്കും 156 കനേഡിയൻ ഡോളറും, മൂന്നംഗ കുടുംബങ്ങൾ 468 ഡോളറും അധികമായി അടയ്ക്കേണ്ടി വരും.
പ്രവിശ്യാ സർക്കാരിന്റെ പൊതു ആരോഗ്യ പരിരക്ഷയ്ക്ക് (OHIP) വിദേശ വിദ്യാർത്ഥികൾക്ക് യോഗ്യതയില്ലാത്തതിനാലും ഇൻഷുറൻസ് തുക നൽകേണ്ടത് നിർബന്ധമായതിനാലുമാണ് ഈ അധിക സാമ്പത്തിക ഭാരം വിദ്യാർത്ഥികളിലേക്ക് എത്തുന്നത്. ഈ വർദ്ധനവോടെ ഒരു വിദ്യാർത്ഥിയുടെ വാർഷിക യു.എച്ച്.ഐ.പി (UHIP) പ്രീമിയം 792 ഡോളറിൽ നിന്ന് 948 ഡോളറായും, മൂന്നംഗ കുടുംബത്തിന്റേത് 2,376 ഡോളറിൽ നിന്ന് 2,844 ഡോളറായും ഉയർന്നു. യൂണിവേഴ്സിറ്റി ഓഫ് ടൊറന്റോ, വാട്ടർലൂ, ഒട്ടാവ തുടങ്ങിയ പ്രമുഖ സ്ഥാപനങ്ങളിലെല്ലാം ട്യൂഷൻ ഫീസിനൊപ്പമാണ് ഈ തുക ഈടാക്കുന്നത്.
ALSO READ ; നാടുകടത്തലിന്റെ വക്കിലും കാനഡയോട് നന്ദി!; റോമാന്റെ 29 വർഷത്തെ ജീവിതം നിയമക്കുരുക്കിൽ
പോളിസി വർഷത്തിൽ പരമാവധി 10 ലക്ഷം ഡോളർ വരെ ഡോക്ടർ പരിശോധനകൾക്കും അടിയന്തര ചികിത്സകൾക്കും ഇൻഷുറൻസ് പരിരക്ഷ ലഭിക്കുമെങ്കിലും, ഇതിൽ നിന്ന് ഇളവ് ലഭിക്കുന്നത് മറ്റ് സർക്കാർ/നയതന്ത്ര പരിരക്ഷയുള്ള വളരെ കുറച്ച് വിദ്യാർത്ഥികൾക്ക് മാത്രമാണ്. പ്രാഥമിക കവറേജിന് പുറമെ പ്രിസ്ക്രിപ്ഷൻ മരുന്നുകൾ, ഡെന്റൽ, വിഷൻ പരിശോധനകൾ എന്നിവയ്ക്കായി വിദ്യാർത്ഥി യൂണിയനുകൾ വഴി ‘എക്സ്റ്റെൻഡഡ് ഹെൽത്ത് ഇൻഷുറൻസ്’ കൂടി എടുക്കേണ്ടി വരുന്നത് വിദേശ വിദ്യാർത്ഥികളുടെ പഠനച്ചെലവ് വീണ്ടും വർദ്ധിപ്പിക്കും.
ഒന്റാറിയോയിലെത്തുന്ന വിദ്യാർത്ഥികൾ കാനഡയിൽ ഇറങ്ങുന്ന ദിവസം മുതലോ അല്ലെങ്കിൽ അധ്യയന വർഷം ആരംഭിക്കുന്നതിന് തൊട്ടുമുമ്പുള്ള മാസത്തിലെ 10-ാം തീയതി മുതലോ തങ്ങളുടെയും കൂടെയുള്ള ആശ്രിതരുടെയും ഇൻഷുറൻസ് എൻറോൾമെന്റ് ഉറപ്പാക്കേണ്ടതാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
