ടൊറന്റോ: കാനഡയിൽ സ്ഥിരതാമസമാക്കാൻ (PR) ആഗ്രഹിക്കുന്ന ഉദ്യോഗാർത്ഥികളെയും വിദേശ തൊഴിലാളികളെയും നേരിട്ട് ബാധിക്കുന്ന വൻ പരിഷ്കാരങ്ങളുമായി ഒന്റാറിയോ പ്രവിശ്യാ ഭരണകൂടം. ഒന്റാറിയോ ഇമിഗ്രേഷൻ ആക്ട് (2015) പ്രകാരമുള്ള വ്യവസ്ഥകളിലാണ് ഒന്റാറിയോ തൊഴിൽ, ഇമിഗ്രേഷൻ, നൈപുണ്യ വികസന മന്ത്രാലയം (The Ministry of Labour, Immigration, Training and Skills Development) നിർണായക ഭേദഗതികൾ വരുത്തിയത്. 2026 ജൂൺ 26 മുതൽ പുതിയ മാറ്റങ്ങൾ പൂർണ്ണമായി പ്രാബല്യത്തിൽ വന്നു കഴിഞ്ഞു. നിലവിലുണ്ടായിരുന്ന ജനപ്രിയമായ എട്ട് ഇമിഗ്രേഷൻ സ്ട്രീമുകൾ പൂർണ്ണമായും നിർത്തലാക്കിക്കൊണ്ട്, പകരം ‘ഒന്റാറിയോ വർക്ക്ഫോഴ്സ് പ്രയോറിറ്റി സ്ട്രീം’ (Ontario Workforce Priority Stream) എന്ന ഏകീകൃത സംവിധാനമാണ് പ്രവിശ്യ അവതരിപ്പിച്ചിരിക്കുന്നത്.
രണ്ട് ഘട്ടങ്ങളായി നടപ്പിലാക്കുന്ന ഇമിഗ്രേഷൻ പുനഃക്രമീകരണത്തിന്റെ ആദ്യ ഘട്ടമാണ് ഇപ്പോൾ പ്രഖ്യാപിച്ചിരിക്കുന്നത്. ഒന്റാറിയോയിൽ ഇതിനകം തൊഴിൽ ഉറപ്പാക്കിയിട്ടുള്ള വിദേശികൾക്ക് സ്ഥിരതാമസത്തിനുള്ള നടപടികൾ ലളിതമാക്കുക, പ്രാദേശിക തൊഴിലുടമകൾക്ക് അനുയോജ്യരായ തൊഴിലാളികളെ ദീർഘകാലത്തേക്ക് നിലനിർത്താൻ സഹായിക്കുക എന്നിവയാണ് ഈ പരിഷ്കാരത്തിന്റെ പ്രധാന ലക്ഷ്യങ്ങൾ. എന്നാൽ, ഇതോടൊപ്പം തന്നെ അപേക്ഷകരുടെ ഭാഷാ നിലവാരത്തിലും വിദ്യാഭ്യാസ യോഗ്യതയിലും ഉയർന്ന മാനദണ്ഡങ്ങൾ നിശ്ചയിച്ചിട്ടുണ്ട്. കൂടാതെ ഗ്രാമീണ, വടക്കൻ മേഖലകളിലെ (Rural and Northern Communities) തൊഴിലുടമകൾക്ക് ഇമിഗ്രേഷൻ നടപടികൾ കൂടുതൽ എളുപ്പമാക്കുന്നതിനായി വാർഷിക വരുമാന പരിധിയിൽ ഇളവുകളും പ്രഖ്യാപിച്ചിട്ടുണ്ട്. പൊതുജനങ്ങളിൽ നിന്നും വിവിധ മേഖലകളിൽ നിന്നുമുള്ള അഭിപ്രായങ്ങൾ ക്രോഡീകരിച്ചാണ് പുതിയ നിയമ നിർമ്മാണം.
പുതിയ സ്ട്രീമിലെ പ്രധാന യോഗ്യതകൾ:
നാഷണൽ ഒക്യുപേഷണൽ ക്ലാസിഫിക്കേഷൻ (NOC TEER) അടിസ്ഥാനമാക്കിയാണ് പുതിയ ഒന്റാറിയോ വർക്ക്ഫോഴ്സ് പ്രയോറിറ്റി സ്ട്രീമിലെ അപേക്ഷകൾ സ്വീകരിക്കുക. ഇതിനെ പ്രധാനമായും താഴെ പറയുന്ന വിഭാഗങ്ങളായി തിരിച്ചിരിക്കുന്നു.
ടീയർ 0, 1, 2, 3 വിഭാഗങ്ങൾ (TEER 0-3): ഉയർന്ന നൈപുഷ്യമുള്ള തൊഴിലുകളിൽ ഒന്റാറിയോയിൽ മുഴുവൻ സമയ-സ്ഥിര ജോലി വാഗ്ദാനം (Job offer) ഉള്ളവർക്കുള്ളതാണ് ഈ വിഭാഗം. കഴിഞ്ഞ 12 മാസത്തിനിടെ അതേ തൊഴിലുടമയ്ക്കൊപ്പം തുടർച്ചയായി 6 മാസമെങ്കിലും ജോലി ചെയ്ത പരിചയം അപേക്ഷകർക്ക് ഉണ്ടായിരിക്കണം. ഒന്റാറിയോയിലെ വിദ്യാഭ്യാസ സ്ഥാപനങ്ങളിൽ നിന്ന് അടുത്തിടെ ബിരുദം നേടിയവരാണെങ്കിൽ ഈ തൊഴിൽ പരിചയം 3 മാസം മതിയാകും. അല്ലാത്തപക്ഷം കഴിഞ്ഞ 5 വർഷത്തിനിടെ കുറഞ്ഞത് രണ്ട് വർഷത്തെ പ്രവൃത്തിപരിചയം ആവശ്യമാണ്. ഭാഷാ യോഗ്യതയായി കനേഡിയൻ ലാംഗ്വേജ് ബെഞ്ച്മാർക്ക് (CLB) 6 അല്ലെങ്കിൽ 5 (ചില പ്രത്യേക തൊഴിലുകൾക്ക്) നിർബന്ധമാണ്. പോസ്റ്റ്-സെക്കൻഡറി ബിരുദമോ ഡിപ്ലോമയോ ആണ് കുറഞ്ഞ വിദ്യാഭ്യാസ യോഗ്യത.
സ്വയം തൊഴിൽ ചെയ്യുന്ന ഡോക്ടർമാർ (Self-employed Physicians): ഒന്റാറിയോയിൽ സ്വയം തൊഴിൽ ചെയ്യുന്ന ഫിസിഷ്യൻമാർക്ക് തൊഴിൽ വാഗ്ദാനം (Job Offer) ഇല്ലാതെ തന്നെ ഈ സ്ട്രീമിൽ അപേക്ഷിക്കാം. കോളേജ് ഓഫ് ഫിസിഷ്യൻസ് ആൻഡ് സർജൻസ് ഓഫ് ഒന്റാറിയോയിൽ അംഗത്വവും, അർഹമായ ക്ലാസിൽ സാധുതയുള്ള രജിസ്ട്രേഷൻ സർട്ടിഫിക്കറ്റും, ഒന്റാറിയോ ഹെൽത്ത് ഇൻഷുറൻസ് പ്ലാൻ (OHIP) വഴി ബിൽ ചെയ്യാൻ യോഗ്യതയുമുള്ളവരായിരിക്കണം ഇവർ.
ടീയർ 4, 5 വിഭാഗങ്ങൾ (TEER 4-5): ഈ വിഭാഗത്തിലുള്ളവർക്ക് കഴിഞ്ഞ 2 വർഷത്തിനിടെ ഒന്റാറിയോയിലെ ബന്ധപ്പെട്ട തൊഴിലുടമയ്ക്കൊപ്പം ഒൻപത് മാസത്തെ പ്രവൃത്തിപരിചയവും, സിഎൽബി 4 (CLB 4) ഭാഷാ യോഗ്യതയും, കനേഡിയൻ സെക്കൻഡറി സ്കൂൾ ഡിപ്ലോമയ്ക്ക് തുല്യമായ വിദ്യാഭ്യാസ യോഗ്യതയും ഉണ്ടായിരിക്കണം. ജനസംഖ്യ 1,50,000-ൽ താഴെയുള്ള ഗ്രാമീണ മേഖലകളിലെ തൊഴിലുടമകൾക്ക് ബിസിനസ്സ് വരുമാന പരിധിയിൽ ഇളവുകൾ ലഭിക്കും.
പഴയ അപേക്ഷകളുടെ സ്ഥിതിയും തുടർനടപടികളും:
പുതിയ പരിഷ്കാരത്തോടെ നിലവിലുണ്ടായിരുന്ന എട്ട് ഇമിഗ്രേഷൻ സ്ട്രീമുകൾ (Employer Job Offer: Foreign Worker, International Student, In-Demand Skills, Master’s Graduate, PhD Graduate, കൂടാതെ മൂന്ന് എക്സ്പ്രസ് എൻട്രി സ്ട്രീമുകൾ എന്നിവ) പൂർണ്ണമായും അടച്ചുപൂട്ടി. താല്പര്യപത്രം (Expression of Interest – EOI) സമർപ്പിക്കാനുള്ള ഓൺലൈൻ പോർട്ടൽ പുതിയ അപേക്ഷകൾക്കായി ഇപ്പോൾ താൽക്കാലികമായി നിർത്തലാക്കിയിരിക്കുകയാണ്. മുൻപ് അപേക്ഷ നൽകി ക്ഷണക്കത്ത് (ITA) ലഭിക്കാത്തവരുടെ അപേക്ഷകൾ വരും ആഴ്ചകളിൽ സ്വയമേവ റദ്ദാക്കപ്പെടും. ഇതിന്റെ അറിയിപ്പ് അപേക്ഷകർക്കും തൊഴിലുടമകൾക്കും നേരിട്ട് ലഭിക്കുന്നതാണ്. എന്നാൽ പഴയ നിയമപ്രകാരം ക്ഷണം ലഭിച്ച് അപേക്ഷ സമർപ്പിച്ചുകഴിഞ്ഞവരുടെ ഫയലുകൾ പഴയ മാനദണ്ഡങ്ങൾ അനുസരിച്ച് തന്നെ തുടർന്നും പരിശോധിക്കും.
ഈ വേനൽക്കാലത്തിന്റെ അവസാനത്തോടെ പുതിയ ‘ഒന്റാറിയോ വർക്ക്ഫോഴ്സ് പ്രയോറിറ്റി സ്ട്രീമിനായുള്ള’ താല്പര്യപത്രം സമർപ്പിക്കൽ ആരംഭിക്കുമെന്നാണ് മന്ത്രാലയം വ്യക്തമാക്കുന്നത്. പോർട്ടൽ വീണ്ടും തുറക്കുമ്പോൾ യോഗ്യരായ അപേക്ഷകർക്ക് പുതിയ സംവിധാനത്തിന് കീഴിൽ അപേക്ഷ നൽകാം. തൊഴിലുടമകൾ പോർട്ടലിൽ വീണ്ടും രജിസ്റ്റർ ചെയ്യേണ്ടതില്ലെങ്കിലും, തങ്ങളുടെ ജീവനക്കാർക്കായി പുതിയ ജോബ് ഓഫറും പുതിയ അപേക്ഷയും സമർപ്പിക്കേണ്ടതുണ്ട്. നിയമലംഘനങ്ങൾ നടത്തുന്നവർക്കെതിരെയുള്ള പിഴയും വിലക്കുകളും സംബന്ധിച്ചുള്ള നോട്ടീസ് നടപടികൾ വേഗത്തിലാക്കാനും 60 ദിവസത്തെ മറുപടി സമയം 30 ദിവസമായി കുറയ്ക്കാനും പുതിയ ഭേദഗതിയിൽ വ്യവസ്ഥയുണ്ട്. കാനഡ കുടിയേറ്റം ലക്ഷ്യമിടുന്ന ലക്ഷക്കണക്കിന് ഉദ്യോഗാർത്ഥികൾ പുതിയ മാനദണ്ഡങ്ങൾ കൃത്യമായി മനസ്സിലാക്കി വേണം ഇനി മുന്നോട്ടുള്ള നടപടികൾ സ്വീകരിക്കാൻ. കൂടുതൽ വിവരങ്ങൾക്കായി ഔദ്യോഗിക വെബ്സൈറ്റ് നിരീക്ഷിക്കാവുന്നതാണ്.
Ontario PR rules revised, 8 streams abolished and replaced with new system
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
