വൻകൂവർ: വൻകൂവർ അന്താരാഷ്ട്ര വിമാനത്താവളത്തിൽ നിന്ന് ലണ്ടൻ ഹീത്രോയിലേക്ക് 31 കിലോ കഞ്ചാവ് കടത്താൻ ശ്രമിച്ച കനേഡിയൻ പൗരനെ ആർസിഎംപി അറസ്റ്റ് ചെയ്തു. ഒന്റാറിയോയിലെ വിൻഡ്‌സർ സ്വദേശിയായ അലാദ്ദീൻ കോക്ക് (56) എന്നയാളെയാണ് റോയൽ കനേഡിയൻ മൗണ്ടഡ് പോലീസ് (ആർസിഎംപി) അറസ്റ്റ് ചെയ്തത്. 2024 ഒക്ടോബർ 28-ന് കാനഡ ബോർഡർ സർവീസസ് ഏജൻസി നടത്തിയ പരിശോധനയിലാണ് ലണ്ടനിലേക്ക് പോകാനിരുന്ന സ്യൂട്ട്കേസിൽ നിന്ന് വൻതോതിൽ കഞ്ചാവ് കണ്ടെടുത്തത്. കുറ്റകൃത്യത്തിന് പശ്ചാത്തലമായ വിവരങ്ങൾ അധികൃതർ തിങ്കളാഴ്ചയാണ് വാർത്താക്കുറിപ്പിലൂടെ പുറത്തുവിട്ടത്.
പരിശോധനയ്ക്ക് ശേഷം തുടരന്വേഷണത്തിനായി ആദ്യം വിട്ടയച്ച പ്രതി, പിന്നീട് കോടതിയിൽ ഹാജരാകാതിരുന്നതിനെ തുടർന്ന് പോലീസ് രാജ്യവ്യാപകമായി അറസ്റ്റ് വാറണ്ട് പുറപ്പെടുവിച്ചിരുന്നു. തുടർന്ന് നടത്തിയ തിരച്ചിലിൽ ഒന്റാറിയോയിൽ നിന്നാണ് ഇയാളെ പോലീസിന് പിടികൂടാൻ സാധിച്ചത്. ഈ വർഷം ജൂലൈയിൽ പ്രതി വിചാരണയ്ക്കിടെ കുറ്റം സമ്മതിച്ചു. തുടർന്നാണ് സെപ്റ്റംബറിൽ കോടതി ഇയാൾക്ക് ഒരു വർഷത്തെ തടവുശിക്ഷയും ആജീവനാന്ത തോക്ക് ഉപയോഗ വിലക്കും ഏർപ്പെടുത്തിക്കൊണ്ട് വിധി പ്രഖ്യാപിച്ചത്.
കാനഡയിൽ കഞ്ചാവ് നിയമവിധേയമാണെങ്കിലും നിയമവിരുദ്ധമായ വിപണിയും കയറ്റുമതിയും ശക്തമായി നിലനിൽക്കുന്നുണ്ടെന്ന് പോലീസ് അധികൃതർ വ്യക്തമാക്കി. വിദേശ രാജ്യങ്ങളിലേക്ക് കഞ്ചാവ് കടത്തുന്നത് തടയാൻ അന്താരാഷ്ട്ര തലത്തിൽ സുരക്ഷാ ഏജൻസികൾ കർശന പരിശോധന നടത്തുന്നുണ്ട്. സിബിഎസ്എ നൽകുന്ന മികച്ച പിന്തുണയാണ് ഇത്തരത്തിലുള്ള അനധികൃത മയക്കുമരുന്ന് കടത്തുകൾ തടയാൻ സഹായിക്കുന്നതെന്ന് ആർസിഎംപി പസഫിക് റീജിയൻ സ്റ്റാഫ് സാർജന്റ് റോണ്ട ഹിസ്‌ലോപ്പ് അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
