ദുബായിൽ നിന്ന് ഇസ്രായേലിലെ തെൽ അവീവിലേക്ക് പറക്കുകയായിരുന്ന ഫ്ലൈദുബായ് വിമാനം തകർക്കാൻ ശ്രമിച്ച കേസിൽ അറസ്റ്റിലായ ഒമാനി സഹപൈലറ്റ് ഹമാം അൽ-ഹമ്മാമി ഞെട്ടിക്കുന്ന വെളിപ്പെടുത്തലുകൾ നടത്തിയതായി റിപ്പോർട്ട്. ഗാസയിലെ സംഭവങ്ങൾക്ക് പ്രതികാരം ചെയ്യാനും “രക്തസാക്ഷിത്വം” വരിക്കാനുമാണ് താൻ ഇസ്രായേലിലെ ബെൻ ഗുരിയോൺ വിമാനത്താവളത്തിലേക്ക് വിമാനം ഇടിച്ചിറക്കാൻ പദ്ധതിയിട്ടതെന്ന് ഇയാൾ യു.എ.ഇ അന്വേഷണ ഉദ്യോഗസ്ഥരോട് സമ്മതിച്ചതായി ഇസ്രായേലി മാധ്യമങ്ങൾ റിപ്പോർട്ട് ചെയ്യുന്നു. ദുബായ് ആസ്ഥാനമായുള്ള ഫ്ലൈദുബായ് എയർലൈൻസിൽ ജോലിക്ക് അപേക്ഷിക്കുന്നതിന് മുൻപുതന്നെ ഈ ആക്രമണ പദ്ധതി മനസ്സിലുണ്ടായിരുന്നതായും തെൽ അവീവിലേക്ക് സർവീസ് നടത്തുന്ന വിമാന കമ്പനികളെ തെരഞ്ഞുപിടിച്ചാണ് ഫ്ലൈദുബായിൽ എത്തിയതെന്നും ഇയാൾ ചോദ്യം ചെയ്യലിൽ വ്യക്തമാക്കിയിട്ടുണ്ട്.
യു.എ.ഇ പ്രോസിക്യൂട്ടർ ജനറൽ ഭീകരാക്രമണ ശ്രമമായി വിശേഷിപ്പിച്ച ഈ കേസിൽ, അന്വേഷണത്തിൽ പങ്കുചേരാൻ ഇസ്രായേലിന്റെ ആഭ്യന്തര സുരക്ഷാ ഏജൻസിയായ ‘ഷിൻ ബെറ്റ്’ പ്രതിനിധികളും യു.എ.ഇയിലെത്തിയിട്ടുണ്ട്. ഈ വർഷമാദ്യം തെൽ അവീവിലേക്കുള്ള മറ്റൊരു വിമാനത്തിൽ ഇയാൾ സഹപൈലറ്റായി സേവനമനുഷ്ഠിച്ചിരുന്ന വേളയിലും വിമാനം റാഞ്ചി തകർക്കാൻ ആലോചിച്ചിരുന്നെങ്കിലും പിന്നീട് ആ നീക്കത്തിൽ നിന്ന് പിന്മാറുകയായിരുന്നുവെന്ന് അന്വേഷണ വിവരങ്ങൾ വ്യക്തമാക്കുന്നു. കൂടാതെ, ഇസ്രായേലിനോട് ശത്രുത പുലർത്തുന്ന ചില രാജ്യങ്ങളിൽ അൽ-ഹമ്മാമി സമീപകാലത്ത് സന്ദർശനം നടത്തിയിരുന്നതായി ഇസ്രായേൽ ചാരസംഘടനയായ മൊസാദ് മന്ത്രിസഭാ യോഗത്തിൽ അറിയിച്ചതായും വിവരമുണ്ട്. അന്വേഷണ പുരോഗതി യു.എ.ഇ അധികൃതർ ഇസ്രായേലിനെ നിരന്തരം ധരിപ്പിക്കുന്നുണ്ട്.
സെപ്റ്റംബർ 30-ന് ജോർദാന് മുകളിലൂടെ വിമാനം പറക്കുമ്പോഴാണ് നാടകീയമായ അക്രമ സംഭവങ്ങൾ അരങ്ങേറിയത്. പ്രാർത്ഥനയ്ക്കായി ഇടവേള ആവശ്യപ്പെട്ട ശേഷം കോക്ക്പിറ്റിലേക്ക് മടങ്ങിയെത്തിയ അൽ-ഹമ്മാമി, എമർജൻസി ക്രാഷ് ആക്സ് ഉപയോഗിച്ച് ഇന്ത്യൻ ക്യാപ്റ്റൻ സ്മിത് മച്ചാറിനെ അപ്രതീക്ഷിതമായി ആക്രമിക്കുകയായിരുന്നു. പരിക്കേറ്റിട്ടും സമചിത്തത കൈവിടാതെ ക്യാപ്റ്റൻ കോക്ക്പിറ്റ് വാതിൽ തുറന്ന് യാത്രാ ക്യാബിനിലുണ്ടായിരുന്ന മറ്റൊരു പൈലറ്റിനെയും യാത്രക്കാരെയും വിവരമറിയിച്ചു. തുടർന്ന് യാത്രക്കാരും ക്രൂ അംഗങ്ങളും കോക്ക്പിറ്റിലേക്ക് ഇരച്ചുകയറി സഹപൈലറ്റിനെ കീഴ്പ്പെടുത്തുകയായിരുന്നു. എന്നാൽ, കീഴ്പ്പെടുത്തുന്നതിനിടയിലും വിമാന നിയന്ത്രണ സംവിധാനങ്ങൾ തകരാറിലാക്കി വിമാനം മരുഭൂമിയിലേക്ക് കുത്തനെ താഴ്ത്തി തകർക്കാൻ ഇയാൾ ശ്രമം നടത്തി.
യാത്രക്കാരായി അതേ വിമാനത്തിൽ സഞ്ചരിച്ചിരുന്ന ഡ്യൂട്ടിയിലില്ലാതിരുന്ന രണ്ട് പൈലറ്റുമാർ ഉടനടി ഇടപെട്ട് വിമാനത്തിന്റെ നിയന്ത്രണം ഏറ്റെടുക്കുകയും എമർജൻസി അലേർട്ട് പുറപ്പെടുവിക്കുകയും ചെയ്തതോടെ വൻ ദുരന്തം ഒഴിവായി. സൗദി അറേബ്യയിലെ താബുക് വിമാനത്താവളത്തിലേക്ക് വഴിതിരിച്ചുവിട്ട വിമാനം രാവിലെ 10.57-ഓടെ സുരക്ഷിതമായി നിലത്തിറക്കി. ഭൂരിഭാഗവും ഇസ്രായേൽ പൗരന്മാരടങ്ങുന്ന 170-ലധികം യാത്രക്കാരും ജീവനക്കാരുമാണ് ആ സമയം വിമാനത്തിൽ ഉണ്ടായിരുന്നത്. ക്രൂവിന്റെയും യാത്രക്കാരുടെയും അസാമാന്യ ധീരത ഒന്നുകൊണ്ടുമാത്രമാണ് വിമാനം വൻ ദുരന്തത്തിൽ നിന്നും രക്ഷപ്പെട്ടത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
