ഹാലിഫാക്സ്: ഹാലോവീൻ ആഘോഷത്തിനിടയിൽ കുട്ടികളുടെ മിഠായി ബാഗിൽ നിന്ന് സിറിഞ്ച് കണ്ടെത്തിയ സംഭവത്തിൽ നോവ സ്കോഷ്യ റോയൽ കനേഡിയൻ മൗണ്ടഡ് പോലീസ് അന്വേഷണം ആരംഭിച്ചു. ബീവർ ബാങ്ക് പ്രദേശത്താണ് സംഭവം നടന്നത്. കുട്ടികളുടെ സുരക്ഷ മുൻനിർത്തി മാതാപിതാക്കൾ അതീവ ജാഗ്രത പാലിക്കണമെന്ന് അധികൃതർ കർശന നിർദ്ദേശം നൽകിയിട്ടുണ്ട്.
കഴിഞ്ഞ ശനിയാഴ്ച രാത്രിയായിരുന്നു സംഭവം. ബീവർ ബാങ്ക് പ്രദേശത്ത് കുട്ടികൾ ‘ട്രിക്ക് ഓർ ട്രീറ്റ്’ ആഘോഷങ്ങളുടെ ഭാഗമായി വീടുകൾ തോറും കയറി മിഠായികൾ ശേഖരിക്കുന്നതിനിടയിലാണ് ഒരു കുട്ടിയുടെ ബാഗിൽ സിറിഞ്ച് ശ്രദ്ധയിൽപ്പെട്ടത്. ഉപയോഗിച്ച നിലയിലുള്ളതും അടപ്പ് ഇല്ലാത്തതുമായ സിറിഞ്ചാണ് മിഠായികൾക്കൊപ്പം ലഭിച്ചതെന്ന് രക്ഷിതാക്കൾ പോലീസിൽ പരാതി നൽകി. ഉടൻ തന്നെ വിവരം പോലീസിനെ അറിയിക്കുകയും ചെയ്തതിനാൽ വലിയൊരു അപകടം ഒഴിവാകുകയായിരുന്നു.
സംഭവത്തെ തുടർന്ന് പോലീസ് സ്ഥലത്തെത്തി സിറിഞ്ച് കസ്റ്റഡിയിൽ എടുത്തു. ഒ’ലിയറി ഡ്രൈവ് പ്രദേശത്തുനിന്നാണ് ഈ സിറിഞ്ച് ബാഗിലെത്തിയതെന്നാണ് പോലീസിന്റെ പ്രാഥമിക നിഗമനം. ഈ വിലാസത്തിന് ചുറ്റുമുള്ള വീടുകളിലും അയൽപക്കങ്ങളിലും പോലീസ് നേരിട്ടെത്തി വിശദമായ അന്വേഷണം നടത്തുന്നുണ്ട്. ഇതുവരെ ആർക്കും പരിക്കേറ്റതായി റിപ്പോർട്ട് ചെയ്തിട്ടില്ലെങ്കിലും സംഭവത്തിന്റെ ഗൗരവം കണക്കിലെടുത്ത് പോലീസ് ശക്തമായ നടപടികളാണ് സ്വീകരിച്ചിരിക്കുന്നത്.
Also Read: കാനഡയുടെ പുതിയ ബജറ്റ് പ്രഖ്യാപനം ഈ ആഴ്ച: വ്യാപാര യുദ്ധത്തിനിടെ ജനങ്ങളെ കാത്തിരിക്കുന്നത് എന്തൊക്കെ?
കുട്ടികൾ ശേഖരിച്ച മിഠായികളും മറ്റ് ഭക്ഷ്യവസ്തുക്കളും കഴിക്കുന്നതിന് മുൻപ് മാതാപിതാക്കൾ കർശനമായി പരിശോധിക്കണമെന്ന് ആർ.സി.എം.പി ആവശ്യപ്പെട്ടു. ഇത്തരം സംഭവങ്ങൾ ആവർത്തിക്കാതിരിക്കാൻ പൊതുജനങ്ങൾ ജാഗ്രത പാലിക്കണമെന്നും സംശയകരമായ എന്തെങ്കിലും വസ്തുക്കളോ സാഹചര്യങ്ങളോ ശ്രദ്ധയിൽപ്പെട്ടാൽ ഉടൻ തന്നെ പോലീസിനെ വിവരമറിയിക്കണമെന്നും rcmp കൂട്ടിച്ചേർത്തു. കേസിനെക്കുറിച്ച് എന്തെങ്കിലും വിവരങ്ങൾ അറിയുന്നവർ ഹാലിഫാക്സ് റീജിയണൽ ഡിറ്റാച്ച്‌മെന്റുമായി ബന്ധപ്പെടണമെന്ന് പോലീസ് അഭ്യർത്ഥിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
