സെന്റ് ജോൺസ്: ന്യൂഫൗണ്ട്ലാൻഡ് സ്വദേശി ലിസ ഡ്രിസ്കോൾ വ്യാജ നഴ്സ് ചമഞ്ഞ് നടത്തിയ തട്ടിപ്പ് കേസുകളിൽ കോടതി വിധി പറയുന്നത് ഏപ്രിൽ 15-ലേക്ക് മാറ്റി. ജനുവരിയിൽ നടക്കേണ്ടിയിരുന്ന ശിക്ഷാവിധി ലിസ കോടതിയിൽ ഹാജരാകാത്തതിനെത്തുടർന്നും അഭിഭാഷകനെ മാറ്റിയതിനാലുമാണ് നീണ്ടുപോയത്. മോഷ്ടിച്ച രേഖകൾ ഉപയോഗിച്ച് നഴ്സാണെന്ന് വിശ്വസിപ്പിച്ച് സെന്റ് ജോൺസിലെ വിവിധ വയോജന കേന്ദ്രങ്ങളിൽ ജോലി നേടിയതിനാണ് 46-കാരിയായ ലിസ ഇപ്പോൾ നിയമനടപടികൾ നേരിടുന്നത്.
മാനസികാരോഗ്യ പ്രശ്നങ്ങളും മറ്റ് കോടതി നടപടികളും ചൂണ്ടിക്കാട്ടി ലിസ വിധി പറയുന്നത് മാറ്റിവെക്കാൻ അപേക്ഷ നൽകിയിരുന്നുവെങ്കിലും കോടതി അത് തള്ളിയിരുന്നു. എന്നാൽ ഹിയറിംഗ് ദിവസം ലിസ ആശുപത്രിയിലാണെന്ന് അറിയിച്ച് കോടതിയിൽ എത്താതിരുന്നതോടെ നടപടികൾ തടസ്സപ്പെട്ടു. തുടർന്ന് അവരുടെ അഭിഭാഷക കേസിൽ നിന്ന് പിന്മാറുകയും പുതിയ അഭിഭാഷകനായ ഡാൻ ഫൂറിയെ നിയമിക്കുകയും ചെയ്തു. ഫെബ്രുവരി 11-ന് ഫോൺ വഴി കോടതിയിൽ ഹാജരായ ലിസയുടെ ശിക്ഷാവിധിക്ക് പുതിയ തീയതി നിശ്ചയിക്കുകയായിരുന്നു.
അയ്യായിരം ഡോളറിന് മുകളിലുള്ള രണ്ട് സാമ്പത്തിക തട്ടിപ്പുകൾ, മറ്റൊരാളുടെ തിരിച്ചറിയൽ രേഖകൾ ഉപയോഗിക്കൽ, പ്രൊബേഷൻ നിയമലംഘനം എന്നീ കുറ്റങ്ങളിൽ ലിസ ഇതിനോടകം കുറ്റസമ്മതം നടത്തിയിട്ടുണ്ട്. കൂടാതെ വ്യാജ സത്യവാങ്മൂലം നൽകൽ, മോഷണം തുടങ്ങിയ എട്ടോളം കേസുകൾ കൂടി ഇവർക്കെതിരെ സെന്റ് ജോൺസ് കോടതിയിലുണ്ട്. ഗാൻഡറിലെ ഒരു കെയർ ഹോമിൽ നഴ്സായി ജോലി ചെയ്യുന്നതിനിടെ മരുന്ന് മോഷ്ടിച്ചെന്ന പരാതിയിൽ നടന്ന വിചാരണയുടെ വിധിയും ഉടൻ പുറത്തുവരും.
ലിസയുടെ മുൻകാല ചരിത്രവും ഏറെ വിവാദപരമാണ്. ഒന്റാറിയോയിൽ താമസിക്കവെ സ്വന്തം മകൻ മരിക്കാനിടയായ സംഭവത്തിൽ ക്രിമിനൽ അശ്രദ്ധയ്ക്ക് ഇവർ രണ്ടര വർഷം തടവുശിക്ഷ അനുഭവിച്ചിട്ടുണ്ട്. അന്ന് ലഭിച്ച പ്രൊബേഷൻ കാലാവധി നിലനിൽക്കെയാണ് വിവിധ പേരുകളിൽ വ്യാജ നഴ്സ് ചമഞ്ഞ് ഇവർ തട്ടിപ്പുകൾ നടത്തിയത്. മൂന്ന് വർഷം മുമ്പ് റോയൽ ന്യൂഫൗണ്ട്ലാൻഡ് കോൺസ്റ്റാബുലറി നടത്തിയ അന്വേഷണത്തിലാണ് ഞെട്ടിക്കുന്ന ഈ വിവരങ്ങൾ പുറത്തുവന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
NL woman who impersonated nurses awaiting theft trial verdict in Gander, sentencing in St. John’s
