നയാഗ്ര : നയാഗ്ര ഫാൾസിലെ പൊതുവിദ്യാലയങ്ങളിൽ പഠിക്കുന്ന വിദ്യാർഥികൾക്ക് ഉന്നതവിദ്യാഭ്യാസം എളുപ്പമാക്കാൻ ലക്ഷ്യമിട്ട് സാമ്പത്തിക സഹായ പദ്ധതിയുമായി പ്രമുഖ ജീവകാരുണ്യ സംഘടനയായ ‘Say Yes’ സംഘടനയും നയാഗ്ര സർവകലാശാലയും. ഇതിനായി 1 മില്യൺ ഡോളറിന്റെ പ്രത്യേക സ്കോളർഷിപ്പ് ഫണ്ട് രൂപീകരിക്കുന്നതിനുള്ള കരാറിൽ ഈ വിഭാഗങ്ങളും ഒപ്പുവെച്ചു. സാമ്പത്തിക പ്രയാസങ്ങൾ കാരണം ഉന്നതപഠനം ഉപേക്ഷിക്കേണ്ടി വരുന്ന വിദ്യാർഥികൾക്ക് വലിയ ആശ്വാസമാകുന്നതാണ് ഈ പദ്ധതി.
നയാഗ്ര സർവകലാശാലയിലെ നാല് വർഷത്തെ ബിരുദ കോഴ്സുകൾക്ക് ചേരാൻ ആഗ്രഹിക്കുന്ന നിർധനരായ കുട്ടികൾക്കാണ് ഈ സഹായം ലഭിക്കുക. സർവകലാശാലയുടെ ദീർഘകാല അഭ്യുദയകാംക്ഷികളായ ലാറി മോണ്ടാനി, മേരി മോണ്ടാനി എന്നിവർ നൽകിയ പ്രാരംഭ സംഭാവനയോടെയാണ് ഫണ്ട് നിലവിൽ വന്നത്. നയാഗ്ര ഫാൾസിനായി ലക്ഷ്യമിടുന്ന 5 മില്യൺ ഡോളറിന്റെ വിശാലമായ സ്കോളർഷിപ്പ് പദ്ധതിയുടെ ഭാഗമാണിത്. അടുത്ത വർഷം മുതൽ തന്നെ നയാഗ്ര ഫാൾസ് ഹൈസ്കൂളിൽ നിന്ന് പഠിച്ചിറങ്ങുന്ന 25-ഓളം വിദ്യാർഥികൾക്ക് ഇതിന്റെ ആനുകൂല്യം ലഭിക്കുമെന്നാണ് പ്രതീക്ഷിക്കുന്നത്.
ഉന്നതവിദ്യാഭ്യാസം നേടുന്നതിലൂടെ കൂടുതൽ വരുമാനം കണ്ടെത്താനും അതിലൂടെ ദാരിദ്ര്യചക്രം തകർത്ത് പ്രാദേശിക സമൂഹത്തിന് തങ്ങളുടേതായ സംഭാവനകൾ നൽകാനും വിദ്യാർഥികൾക്ക് സാധിക്കുമെന്ന് നയാഗ്ര ഫാൾസ് സ്കൂൾ ഡിസ്ട്രിക്റ്റ് സൂപ്രണ്ട് സ്റ്റാൻ വോജ്റ്റൺ പറഞ്ഞു. ഉന്നതപഠനത്തിന് തയ്യാറാകാത്ത പകുതിയിലധികം വിദ്യാർഥികളും പഠനച്ചെലവാണ് പ്രധാന തടസ്സമായി ചൂണ്ടിക്കാണിക്കുന്നത്. സ്വന്തം പ്രദേശത്തെ നിർധനരായ വിദ്യാർഥികൾക്ക് മികച്ച അവസരങ്ങൾ ഉറപ്പാക്കാൻ സർവകലാശാല പ്രതിജ്ഞാബദ്ധമാണെന്ന് നയാഗ്ര സർവകലാശാല പ്രസിഡന്റ് ഫാദർ ജെയിംസ് മഹർ വ്യക്തമാക്കി.
ട്യൂഷൻ ഫീസ് സഹായത്തിന് പുറമെ വിദ്യാർഥികൾക്ക് ട്യൂഷൻ, മെന്റർഷിപ്പ് പ്രോഗ്രാമുകൾ, നേതൃത്വപാടവ പരിശീലനം എന്നിവയും ‘സേ യെസ്’ സംഘടന നൽകും. നയാഗ്ര ഫാൾസ് ഹൈസ്കൂളിൽ നിന്നും പഠിച്ചിറങ്ങുന്ന വിദ്യാർഥികൾക്ക് സർവകലാശാലയിലേക്കുള്ള വാതിലുകൾ തുറന്നുകൊടുക്കാൻ കഴിഞ്ഞതിൽ സന്തോഷമുണ്ടെന്ന് സേ യെസ് സി.ഇ.ഒ ഡേവിഡ് റസ്റ്റ് പറഞ്ഞു. നയാഗ്ര ഫാൾസ് സ്കോളർഷിപ്പ് എൻഡോവ്മെന്റ് വരുംവർഷങ്ങളിൽ 20 മില്യൺ ഡോളറിന്റെ നിക്ഷേപസഞ്ചയമായി വളർത്താനാണ് തങ്ങളുടെ തീരുമാനമെന്ന് മൂന്ന് സംഘടനകളുടെയും ഭാരവാഹികൾ കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
