നയാഗ്ര: ഹാലോവീൻ വാരാന്ത്യത്തെ വരവേൽക്കാൻ അവിസ്മരണീയമായ ആഘോഷ പരിപാടികളുമായി നയാഗ്ര-ഓൺ-ദി-ലേക്. ഒക്ടോബർ 30 വെള്ളിയാഴ്ച മുതൽ നവംബർ 1 ഞായറാഴ്ച വരെ നീളുന്ന വിവിധ വിനോദ പരിപാടികളാണ് നഗരത്തിലുടനീളം സംഘടിപ്പിച്ചിരിക്കുന്നത്. ഭയപ്പെടുത്തുന്ന പ്രേത കഥകൾ മുതൽ തത്സമയ സംഗീത കച്ചേരികളും കോമഡി ഷോകളും കുടുംബങ്ങൾക്കായുള്ള ഹാലോവീൻ പാർട്ടികളും വരെ നഗരത്തിൽ അരങ്ങേറും.
ഷോ ഫെസ്റ്റിവലിന്റെ നേതൃത്വത്തിൽ ഒക്ടോബർ 29, 30 തീയതികളിൽ രാവിലി 9 മണിക്ക് ആർട്ടിസ്റ്റ് വില്ലേജ് ഡിജിറ്റൽ ലാബിൽ ‘ഗോസ്റ്റ് റേഡിയോ തിയേറ്റർ’ സംഘടിപ്പിച്ചിട്ടുണ്ട്. പഴയകാല റേഡിയോ നാടകങ്ങളുടെ അന്തരീക്ഷം പുനഃസൃഷ്ടിക്കുന്ന ഈ പരിപാടിക്ക് 30 ഡോളറാണ് ടിക്കറ്റ് നിരക്ക്. ഒക്ടോബർ 30-ന് എക്സ്ചേഞ്ച് ബ്രൂവറിയിൽ ഹാലോവീൻ കോമഡി നൈറ്റും നടക്കും. കൂടാതെ, ഐറിഷ് ഹാർപ്പ് പബ്ബിൽ ഗേലിക് ഉത്സവമായ ‘സംഹൈൻ’ ആസ്പദമാക്കി ഒക്ടോബർ 30 മുതൽ നവംബർ 1 വരെ മൂന്ന് ദിവസത്തെ വേഷവിധാന പാർട്ടികളും തത്സമയ സംഗീത വിരുന്നുകളും സൗജന്യ പ്രവേശനം നൽകി ഒരുക്കിയിട്ടുണ്ട്.
ഹാലോവീൻ ദിനമായ ഒക്ടോബർ 31-ന് കുടുംബങ്ങൾക്കായി പ്രത്യേക പരിപാടികളാണ് പ്രാദേശിക ഫയർഹാളുകളിൽ ക്രമീകരിച്ചിരിക്കുന്നത്. ക്വീൻസ്റ്റൺ ഫയർഹാളിലും സെന്റ് ഡേവിഡ്സ് ഫയർഹാളിലും വൈകുന്നേരം 7 മണി മുതൽ ബാർബിക്യൂ, കാൻഡി വിതരണം, കോസ്റ്റ്യൂം പരേഡ്, മത്സരങ്ങൾ എന്നിവ നടക്കും. ഹ്യൂബൽ ഗ്രേപ്പ് എസ്റ്റേറ്റ്സുമായി ചേർന്ന് പ്രൊജക്റ്റ് ഷെയർ നയാഗ്രയ്ക്കായി ഭക്ഷണസാധനങ്ങൾ ശേഖരിക്കുന്നതിന്റെ ഭാഗമായാണ് ക്വീൻസ്റ്റൺ ഫയർഹാളിലെ ആഘോഷം.
നയാഗ്ര-ഓൺ-ദി-ലേകിലെ പ്രശസ്തമായ ‘ഗോസ്റ്റ് വാക്ക്’ ആണ് മറ്റൊരാകർഷണം. ഒക്ടോബർ 31-ലെ ടിക്കറ്റുകൾ പൂർണ്ണമായും വിറ്റഴിഞ്ഞെങ്കിലും, നവംബർ 1-ന് രാത്രി 7, 7:15, 7:30 സമയങ്ങളിലായി നടക്കുന്ന ഹെറിറ്റേജ് ഗോസ്റ്റ് വാക്കിൽ പങ്കെടുക്കാൻ ഇപ്പോഴും അവസരമുണ്ട്. പ്രിൻസ് ഓഫ് വേൽസ് ഹോട്ടൽ, നയാഗ്ര അപൊത്തിക്കരി, ഓൾഡ് എയ്ഞ്ചൽ ഇൻ തുടങ്ങിയ ചരിത്രപരമായ സ്ഥലങ്ങളിലൂടെയാണ് ഈ റാലി കടന്നുപോകുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
