സെന്റ് ജോൺസ്: ന്യൂഫൗണ്ട്ലാൻഡ് ആൻഡ് ലാബ്രഡോറിൽ (N.L.) ലഹരിമരുന്ന് ഉപയോഗിക്കുന്ന അമ്മമാർക്കും ആ സാഹചര്യത്തിൽ ജനിക്കുന്ന ശിശുക്കൾക്കുമായി ആരോഗ്യ മന്ത്രാലയം പുതിയ പദ്ധതികൾ പ്രഖ്യാപിച്ചു. പ്രവശ്യയിലെ ആരോഗ്യപരിചരണ സംവിധാനത്തിലുള്ള പോരായ്മകൾ പരിഹരിക്കുന്നതിനായി പ്രത്യേക പരിശീലനങ്ങളും പുതിയ നിയമനങ്ങളും ഉൾപ്പെടുത്തിയുള്ള വിപുലമായ പദ്ധതികളാണ് നടപ്പിലാക്കുന്നതെന്ന് ആരോഗ്യ മന്ത്രി ലീല ഇവൻസ് അറിയിച്ചു.
നിലവിലെ ആരോഗ്യ സേവനങ്ങളിൽ പ്രവർത്തിക്കുന്ന വിദഗ്ധർക്കായി പ്രത്യേക പരിശീലനം നൽകുന്നതിനൊപ്പം പ്രവിശ്യാതല ഗർഭകാല മാനസികാരോഗ്യ പരിപാടിയും വികസിപ്പിക്കും. ഇതിന്റെ ഭാഗമായി മൂന്ന് ‘പിയർ സപ്പോർട്ട്’ തസ്തികകളും ‘എർലി ഇയേഴ്സ് കൺസൾട്ടന്റ്’ നിയമനവും നടത്തുമെന്ന് മന്ത്രി പറഞ്ഞു. ലഹരി ഉപയോഗിക്കുന്ന ഗർഭിണികൾക്കും അമ്മമാർക്കും ആവശ്യമായ മാനസിക പിന്തുണയും ചികിത്സയും പ്രവിശ്യയിലുടനീളം ഉറപ്പാക്കുകയാണ് സർക്കാരിന്റെ ലക്ഷ്യം.
പ്രവശ്യയിലെ ഓരോ വർഷവും 50 മുതൽ 60 വരെ ശിശുക്കൾ ലഹരിമരുന്നിന്റെ ആഘാതത്തോടെ ജനിക്കുന്നുണ്ടെന്നാണ് പീഡിയാട്രിഷ്യൻ ഡോ. ആൻ ഡ്രോവർ ചൂണ്ടിക്കാട്ടുന്നത്. കൃത്യമായ വിവരശേഖരണത്തിന്റെ അഭാവം ഈ മേഖലയിൽ വലിയ പ്രതിസന്ധി സൃഷ്ടിക്കുന്നുണ്ട്. കൂടാതെ, കുഞ്ഞുങ്ങളെ സർക്കാർ ഏറ്റെടുക്കുമെന്ന ഭയവും സമൂഹത്തിലെ അവജ്ഞയും കാരണം പല അമ്മമാരും ചികിത്സ തേടാൻ മടിക്കുന്നത് സ്ഥിതി സങ്കീർണ്ണമാക്കുന്നു. ഈ പ്രശ്നങ്ങൾ പരിഹരിക്കാനായി ഡാറ്റാ ശേഖരണം കാര്യക്ഷമമാക്കുമെന്നും ഡോ. ഡ്രോവറുമായി ചേർന്ന് തുടർപ്രവർത്തനങ്ങൾ ആസൂത്രണം ചെയ്യുമെന്നും മന്ത്രി ലീല ഇവൻസ് കൂട്ടിച്ചേർത്തു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Newfoundland launches extensive treatment program to protect mothers and babies who use drugs
