സെന്റ് ജോൺസ്: തദ്ദേശീയമായി തൊഴിലാളി ക്ഷാമം നേരിടുന്ന റൂറൽ പ്രദേശങ്ങളിലെ തൊഴിലുടമകൾക്ക് ആശ്വാസവുമായി ന്യൂഫൗണ്ട്ലാൻഡ് ആൻഡ് ലാബ്രഡോർ പ്രവിശ്യ. കുറഞ്ഞ വേതനമുള്ള താൽക്കാലിക വിദേശ തൊഴിലാളികളെ നിയമിക്കുന്നതിൽ ഫെഡറൽ സർക്കാർ പ്രഖ്യാപിച്ച താൽക്കാലിക ഇളവുകൾ പ്രവിശ്യയിലും നടപ്പിലാക്കാൻ സർക്കാർ തീരുമാനിച്ചു. 2026 ജൂൺ 11 മുതൽ പ്രാബല്യത്തിൽ വരുന്ന ഈ പുതിയ നയം വഴി വിദേശ മലയാളി ഉദ്യോഗാർത്ഥികൾക്കും കാനഡയിലെ ഗ്രാമീണ മേഖലകളിൽ പുതിയ തൊഴിലവസരങ്ങൾ തുറക്കപ്പെടുമെന്നാണ് പ്രതീക്ഷിക്കുന്നത്.
കാനഡയിലെ സാധാരണ നിയമപ്രകാരം കുറഞ്ഞ വേതനമുള്ള താൽക്കാലിക വിദേശ തൊഴിലാളികളുടെ എണ്ണം ആകെ ജീവനക്കാരുടെ 10% ആയി നിജപ്പെടുത്തിയിട്ടുണ്ട്. എന്നാൽ പുതിയ ഇളവുകൾ പ്രകാരം യോഗ്യതയുള്ള റൂറൽ തൊഴിലുടമകൾക്ക് വിദേശ തൊഴിലാളികളുടെ പരിധി 10 ശതമാനത്തിൽ നിന്നും 15 ശതമാനമായി ഉയർത്താൻ സാധിക്കും. കൂടാതെ നിലവിൽ 10% പരിധിക്ക് മുകളിൽ വിദേശ തൊഴിലാളികളുള്ള സ്ഥാപനങ്ങൾക്ക് അവരെ അതേപടി നിലനിർത്താനും അനുവാദമുണ്ടാകും. കാനഡയിലെ വലിയ നഗരങ്ങളിലെ തൊഴിലുടമകൾക്ക് ഈ ഇളവുകൾ ലഭിക്കില്ലെന്നും, പൂർണ്ണമായും ഗ്രാമീണ മേഖലകളിൽ പ്രവർത്തിക്കുന്ന സ്ഥാപനങ്ങൾക്ക് മാത്രമാണ് ഈ ആനുകൂല്യമെന്നും അധികൃതർ വ്യക്തമാക്കിയിട്ടുണ്ട്.
കനേഡിയൻ പൗരന്മാർക്കോ സ്ഥിരതാമസക്കാർക്കോ ജോലി നൽകാൻ ശ്രമിച്ചിട്ടും ആളെ കിട്ടാത്ത സാഹചര്യങ്ങളിൽ മാത്രമേ വിദേശികളെ നിയമിക്കാൻ അനുമതിയുള്ളൂ. 2026 ജൂൺ 11-ന് മുൻപ് സമർപ്പിച്ച എൽ.എം.ഐ.എ (LMIA) അപേക്ഷകൾക്ക് ഈ ഇളവ് ബാധകമല്ലെന്നും, സ്ഥിരതാമസം ലക്ഷ്യമിട്ടുള്ള ‘ഡ്യുവൽ-ഇന്റന്റ്’ അപേക്ഷകളെ ഇതിൽ നിന്ന് ഒഴിവാക്കിയിട്ടുണ്ടെന്നും സർക്കാർ അറിയിച്ചു.
ന്യൂഫൗണ്ട്ലാൻഡിന് മുൻപ് തന്നെ ബ്രിട്ടീഷ് കൊളംബിയ, മാനിറ്റോബ, ന്യൂ ബ്രൺസ്വിക്ക്, നോവ സ്കോഷ്യ, ക്യൂബെക്ക് എന്നീ പ്രവിശ്യകൾ ഈ ഇളവുകൾ അംഗീകരിച്ചിരുന്നു. എന്നാൽ ആൽബർട്ടയും നുനാവത്തും ഈ നയത്തിൽ പങ്കാളികളാകില്ലെന്ന് വ്യക്തമാക്കിയിട്ടുണ്ട്. നിർമ്മാണം, നഴ്സിംഗ്/ആരോഗ്യ മേഖലകൾ എന്നിവയ്ക്ക് ഇതിനകം തന്നെ 20% ഇളവ് ഉള്ളതിനാൽ അവരെ ഈ പുതിയ മാറ്റം ബാധിക്കില്ല. 2027 മാർച്ച് 31 വരെ ഈ താൽക്കാലിക ഇളവുകൾ തുടരുമെന്നാണ് റിപ്പോർട്ടുകൾ സൂചിപ്പിക്കുന്നത്.
Newfoundland and Labrador expands work permit access in rural areas
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
