വിദേശ തൊഴിലാളികളെ സ്വാഗതം ചെയ്ത് ന്യൂസിലൻഡ്; സീസണൽ വിസ നിയമങ്ങൾ പരിഷ്കരിച്ചു; നിബന്ധനകൾ അറിയാം

വെല്ലിംഗ്ടൺ: സീസണൽ തൊഴിലാളികളുടെ റിക്രൂട്ട്‌മെന്റ് എളുപ്പമാക്കുന്നതിനായി ന്യൂസിലൻഡ് ഇമിഗ്രേഷൻ സുപ്രധാനമായ നയം പ്രഖ്യാപിച്ചു. ന്യൂസിലൻഡിൽ കൃഷി, ടൂറിസം തുടങ്ങിയ മേഖലകളിൽ സീസണൽ ജോലികൾക്കായി വിദേശ തൊഴിലാളികളെ നിയമിക്കാൻ നിലവിലുള്ള അംഗീകൃത തൊഴിലുടമ വർക്ക് വിസ (AEWV) ചട്ടക്കൂടിന് കീഴിൽ രണ്ട് പുതിയ വിസകൾ പ്രഖ്യാപിച്ചു ‘ഗ്ലോബൽ വർക്ക്‌ഫോഴ്‌സ് സീസണൽ വിസ’ (GWSV), ‘പീക്ക് സീസണൽ വിസ’ (PSV) എന്നിവയ്ക്കുള്ള അപേക്ഷകൾ 2025 ഡിസംബർ 8 മുതൽ സ്വീകരിച്ചു തുടങ്ങും.

ഈ നീക്കം സീസണൽ തൊഴിൽ മേഖലയിലെ നിയമനങ്ങൾ കാര്യക്ഷമമാക്കാനും, അതേസമയം നിലവിലെ സംവിധാനങ്ങളുടെ ദുരുപയോഗം തടയാനുമുള്ള സുരക്ഷാ മാനദണ്ഡങ്ങൾ ഉറപ്പാക്കാനും ലക്ഷ്യമിട്ടുള്ളതാണ്. ഹോർട്ടികൾച്ചർ, കൃഷി, ടൂറിസം, ഹോസ്പിറ്റാലിറ്റി തുടങ്ങിയ സീസണൽ തൊഴിലാളികളെ ആശ്രയിക്കുന്ന വ്യവസായങ്ങൾക്ക് ഇത് വലിയ ആശ്വാസമാകും.

ദീർഘകാല സീസണൽ ജോലികൾ ആവശ്യമുള്ള വ്യവസായങ്ങളെ പിന്തുണയ്ക്കുന്നതിനായാണ് ഗ്ലോബൽ വർക്ക്‌ഫോഴ്‌സ് സീസണൽ വിസ (GWSV) അവതരിപ്പിച്ചത്. ഇത് മൂന്ന് വർഷമാണ് കാലാവധി നൽകുന്നത്. ഈ വിസയുടെ പ്രധാന സവിശേഷതകളിൽ ഒന്ന്, തൊഴിലുടമകൾക്ക് പ്രാദേശികമായി പരസ്യം ചെയ്യുകയോ തൊഴിൽ കമ്പോള പരിശോധന നടത്തുകയോ ചെയ്യാതെ തന്നെ തൊഴിലാളികളെ നേരിട്ട് നിയമിക്കാം എന്നതാണ്.

അപേക്ഷകർക്ക് കഴിഞ്ഞ ആറ് വർഷത്തിനുള്ളിൽ മൂന്ന് സീസണുകളിലെങ്കിലും പ്രസക്തമായ തൊഴിൽ പരിചയം ഉണ്ടായിരിക്കണം. ഈ വിസയുടെ ഉടമകൾ ഓരോ വർഷവും കുറഞ്ഞത് മൂന്ന് മാസമെങ്കിലും ന്യൂസിലൻഡിന് പുറത്ത് ചെലവഴിക്കണം എന്ന നിബന്ധനയുണ്ട്. മറ്റ് പല വിസകളെയും പോലെ, GWSV അപേക്ഷകർക്ക് ഇംഗ്ലീഷ് ഭാഷാ പരീക്ഷയുടെ ആവശ്യമില്ല.

അത്യാവശ്യ സമയങ്ങളിലെ ഹ്രസ്വകാല തൊഴിൽ ആവശ്യങ്ങൾ നിറവേറ്റുന്നതിനാണ് പീക്ക് സീസണൽ വിസ (PSV) രൂപകൽപ്പന ചെയ്തിരിക്കുന്നത്. ഇത് GWSV യേക്കാൾ കർശനമായ വ്യവസ്ഥകളോടെയാണ് വരുന്നത്. തൊഴിലുടമകൾക്ക് ഈ വിസ വഴി വിദേശ തൊഴിലാളികളെ നിയമിക്കുന്നതിന് മുമ്പ് ജോലി പ്രാദേശികമായി പരസ്യം ചെയ്യുകയും, ആളെ കിട്ടാനായി ശ്രമിച്ചു എന്ന് തെളിയിക്കുകയും വേണം.

അപേക്ഷകർക്ക് കഴിഞ്ഞ മൂന്ന് വർഷത്തിനുള്ളിൽ ഒരു സീസണിലെങ്കിലും പ്രസക്തമായ തൊഴിൽ പരിചയം നിർബന്ധമാണ്. ഏഴ് മാസം വരെയാണ് PSVയുടെ പരമാവധി കാലാവധി. മൂന്ന് മാസത്തിൽ കൂടുതലുള്ള ജോലികൾക്ക്, അപേക്ഷകർ താമസിക്കുന്ന കാലയളവിൽ സമഗ്രമായ ആരോഗ്യ ഇൻഷുറൻസ് എടുത്തിരിക്കണം. GWSVക്ക് സമാനമായി PSV അപേക്ഷകർക്കും ഇംഗ്ലീഷ് ഭാഷാ പരീക്ഷ ആവശ്യമില്ല.

AEWV ചട്ടക്കൂടിന് കീഴിലുള്ള പുതിയ വിസ വിഭാഗങ്ങൾ നിരവധി പ്രധാന വ്യവസായങ്ങളിലെ സീസണൽ ജോലികൾക്ക് ബാധകമാകും. കക്ക/ചിപ്പി ഫാം തൊഴിലാളികൾ, കിടാരികളെ വളർത്തുന്നവർ, റിലീഫ് മിൽക്കർമാർ, വനവൽക്കരണ തൊഴിലാളികൾ, മാംസം മുറിക്കുന്നവർ, സീഫുഡ് പ്രോസസ് തൊഴിലാളികൾ, വൈനറി സെല്ലാർ ഹാൻഡുകൾ, കമ്പിളി കൈകാര്യം ചെയ്യുന്നവർ എന്നിവയുൾപ്പെടെയുള്ള ജോലികൾ ഇതിൽ ഉൾപ്പെടുന്നു.

വിസക്ക് അപേക്ഷിക്കാൻ ആഗ്രഹിക്കുന്നവർ അവരുടെ യോഗ്യത തെളിയിക്കുന്നതിന് ആവശ്യമായ രേഖകൾ കൃത്യമായി സമർപ്പിക്കണം. AEWV അംഗീകൃത തൊഴിലുടമയിൽ നിന്നുള്ള തൊഴിൽ ഓഫറും ഒപ്പിട്ട തൊഴിൽ കരാറുമാണ് ആദ്യപടി. കരാറിൽ ജോലി തുടങ്ങുന്നതും അവസാനിക്കുന്നതുമായ തീയതികൾ, ശമ്പള നിരക്ക്, ഉറപ്പുള്ള പ്രവൃത്തി സമയം, ജോലിസ്ഥലം എന്നിവ വ്യക്തമാക്കണം.

തൊഴിൽ പരിചയം തെളിയിക്കാൻ, GWSVക്ക് കഴിഞ്ഞ ആറ് വർഷത്തിനുള്ളിൽ മൂന്ന് സീസണുകളിലെയും PSVക്ക് കഴിഞ്ഞ മൂന്ന് വർഷത്തിനുള്ളിൽ ഒരു സീസണിലെയും രേഖകൾ (ശമ്പള സ്ലിപ്പുകൾ, നികുതി രേഖകൾ, തൊഴിലുടമയുടെ സാക്ഷ്യപത്രം തുടങ്ങിയവ) ഹാജരാക്കണം. കൂടാതെ, GWSV അപേക്ഷകർ ഓരോ വർഷവും ന്യൂസിലൻഡിന് പുറത്ത് മൂന്ന് മാസം ചെലവഴിക്കുന്നു എന്നും, PSV അപേക്ഷകർ രണ്ട് അപേക്ഷകൾക്കിടയിൽ നാല് മാസത്തെ ഇടവേള എടുത്തിട്ടുണ്ടെന്നും തെളിയിക്കുന്ന യാത്രാരേഖകളോ തൊഴിലുടമയുടെ സ്ഥിരീകരണമോ നൽകേണ്ടതുണ്ട്.

മൂന്ന് മാസത്തിൽ കൂടുതലുള്ള PSV ജോലികൾക്ക്, ജനറൽ കെയർ, അത്യാഹിത വിഭാഗം, ആശുപത്രിവാസം, മരുന്നുകൾ, അടിയന്തര ഒഴിപ്പിക്കൽ എന്നിവ ഉൾപ്പെടെയുള്ള സമഗ്ര ആരോഗ്യ ഇൻഷുറൻസ് നിർബന്ധമാണ്. സാധുവായ പാസ്‌പോർട്ട്, സമീപകാല ഫോട്ടോ, ആരോഗ്യ-സ്വഭാവ സർട്ടിഫിക്കറ്റുകൾ (മെഡിക്കൽ, പോലീസ് ക്ലിയറൻസ്) എന്നിവയുൾപ്പെടെയുള്ള സാധാരണ AEWV രേഖകളും എല്ലാ അപേക്ഷകരും നൽകണം. മൂന്ന് വർഷത്തെ കാലാവധിയുള്ളതിനാൽ GWSV അപേക്ഷകർക്ക് മുഴുവൻ മെഡിക്കൽ, സ്വഭാവ പരിശോധനകളും നിർബന്ധമാണ്.

new-zealand-immigration-announces-new-seasonal-visa-categories-under-aewv-framework

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt